Білікті дәрігер
Адам ағзасының қай мүшесі болсын ауырсынса жаныңды қоярға жер таппай кететінің белгілі. Осы тұрғыда ақ халатты дәрігерді желеу етіп, емхана жағалап ауруымызға араша сұрап жүгінеріміз бесенеден белгілі. Сондай, жаныңа батып түн ұйқыңды бөліп, маза бермейтін тіс ауруын бастан өткерген жан жақсы біледі. Сол мезетте ем шара көріп, аурудан айықтырып, тісімізді емдейтін тіс дәрігері Бекбатыров Оразбай Кеген аудандық ауруханасында еңбек етуде. Оразбай Бекбатырұлы медицина саласында 40 жылдан аса қызмет еткен білікті дәрігер.
1987 жылы Алматы мемлекеттік медицина институтының стоматология факультетін тамамдаған. Мамандығы – дәрігер стоматолог.
1988 жылдан бастап Кеген аудандық Шырғанақ ауылдық ауруханасында дәрігер-стоматолог болып еңбек жолын бастаған. 1998-2007 жылдар аралығында Шырғанақ дәрігерлік ауруханасының бас дәрігері, 2016 жылға дейін Шырғанақ дәрігерлік амбулаториясының меңгерушісі болып табанды еңбек етті. 2016-2022 жылдар аралығында Шырғанақ ауылдық округ әкімі болып қызмет етті. 2022 жылдан бері Кеген аудандық ауруханасында дәрігер-стоматолог болып халық денсаулығы үшін еңбек етіп келеді. 2012 жылы “Денсаулық сақтау саласының үздігі” төсбелгісімен марапатталса, Оразбай Бекбатырұлы облыстық, аудандық Құрмет грамотасы, Алғыс хаттармен лайықты награтталған.
Зейнет жасына шығып, отбасының арқа сүйер бәйтергі болған Оразбай Бекбатыровқа өмір белесінде берер тәлімі мен көрсетер өнегесі кейінгі ұрпаққа тәлімді- тәрбие боларына біз сенеміз! Әр ісінен біліктілік дарытып, келер күннің жақсылығына малынып, арайлы таңның шапағатында, ұрпағының алдында мың жасап, елдің ақ батасының шарапатында жаныңыз нұрға бөленсін демекпіз.
Бүгін де еңбек етіп жатқан дәрігер- стоматолог Оразбай Бекбатырұлының алдына күніге 10-12 адам қаралып, тіс жегі, тіс жегінің асқыну түрлерінен шағымданып келіп жатады. Тісі ауырған жан өздігінен ем-шара көріп, асқындырып алу жайлары көптеп кездеседі дейді дәрігер. Жаның ауырса өздігінен ем жасамай дәрігердің біліктілігіне жүгініп, уақтылы қаралуға кеңес береді маман. Профилактикалық тексеру барысында дәрігерлер ем қабылдаушыларға көбіне тіс мәселесінде тіс дәрігеріне жүгіну керектігін ескертіп, кеңес беріп жатады. Тіс – адам денсаулығы үшін маңызды екенін негізге ала отырып, тіс арқылы жақсы өңделген тағам асқазанға жол тартатынын білеміз. Сол себепті де, ас адамның арқауы болса, денімізді сау сақтау үшін тіске де көңіл бөлу керектігін баса айтқым келеді.
Бүгінгі күнде заман талабына сай емхана ғимараты, стоматология кабинеті жасақталып, дәрі-дәрмекте жеткілікті, сонмен қоса сапалы ем жүргізуге толықтай жағдай жасалынған.
Елі үшін қызмет етіп отырған дәрігер-стоматолог Оразбай Бекбатырұлына мықты денсаулық, отбасы бақытын, лайым жақсылық тілейміз!
Л. Мұхаметқали.
