ТАБАНДЫЛЫҚ ТҰҒЫРЫ

34

Негізі тұрақтылықтың бір  тірегі – кәсіби біліктілік болып табылады. Кеген қазақ орта мектебін өте жақсы тәмәмдаған қазақтың қарапайым қызы   Талғар медициналық училищесін 1984 жылы мейірбике мамандығы бойынша оқып бітіріп,  дипломмен ауылға оралған еді. Сөйтіп,  Кеген аудандық орталық ауруханасы қабылдау бөлімінде  мейірбике қызметімен еңбек  жолын бастаған  Гүлнара Жетібаева осы мекемеде тұрақтылығын танытып 40 жыл еңбек етті. Білсем, білген үстіне біле түссем деген ынталы жан төл міндетін мінсіз атқарды. Дерекке дәйектеме келтірсек, – жедел жәрдем бөлімінің фельшері,  аға мейірбике, мед статист, онкология бөлімінің мейірбикесі, тері аурулары бөлімінің аға мейірбикесі,  емхана бөлімінің мед статисты, емхана бөлімінің аға мейірбикесі, емхана бөлімі балалар кабинетінің мейірбикесі қызметтерін абыроймен атқарды.

Өзі үшін күнделікті жұмыс болып саналғанымен уақытпен санаспай әрі медициналық талапқа сай істеген жұмысы дәрігерлер тарапынан жақсы бағаланып, сырқаттардың тез айығуына себепші болғаны ақиқат. Жылжыған жылдармен толысқан тәжірибесі  кәсіби біліктілігін арттыра берді. Нәтижесінде бірнеше  рет аудан,  облыс әкімдерінің Алғыс хаттарын алса, кәсіподақ ұйымдары медицина қызметкерлерін марапаттауларынан да тыс қалтырмады. Әрине, сырт ел үшін кезекті марапаттың бірі болып саналғанымен өзі үшін жауапкершілік жүгін арттырды. Ел сеніміне селкеу түсірмеуді ойлады. Сенімге сапалы жұмысыммен жауап бергенім дұрыс деп ой түйді. Сөйтіп, ақ халатты абзал жанның жұмысына деген ынтасы артып, ел ықыласына бөлене берді.

Қазақта «Қуана білгенге құт қонады, бағалай білгенге бақ қонады» деген жақсы сөз бар. Жақында  Мемлекет басшысы Қасым- Жомарт Кемелұлы Тоқаевтың « Әділетті мемлекет. Біртұтас ұлт. Берекелі қоғам» атты Қазақстан халқына жолдауын қоғамға кеңінен насихаттау мақсатында өткен  «Қазақстан Республикасының еңбек сіңірген қызметкері» атты республикалық байқауына қатысып, жеңімпаз атанған Жетібаева Гульнара Сейітқожа қызы марапатталады деген төсбелгісін куәлігімен Астана қаласына арнайы барып алып келуі нұр үстіне нұр болды!

Жақсы адамдар жаныңда жүр деген тәмсілді ауыз екі тілде айтқанымызбен күнделікті өмірде жете мән бермейтініміз жасырын емес. Ес тоқтатқан кезде Гүлнараның анасының өне бойынан есіп тұрған адами құндылығана тәнті болмасқа әддім қалмады. Бұл дегеніміз, зеректік, сұңғылалық, алғырлық, қанағатшылдық, сабырлылық секілді адами құндылықты көрсететін асыл қасиеттер Гүлнара Сейітқожақызына ана сүтімен дарығанын аңғартады.

«Бұлақ басынан тұнады», «Не ексең соны орасың» деген ұлағатты  сөздер дәл осындай абзал жандар өмірінен ойып алып айтылса керек.  Отағасымен тату-тәтті өмір сүріп  екі ұл, екі қыз тәрбиелеп өсірді. Перзенттері жоғарғы оқу орындарын бітіріп, қәзіргі уақытта елімізге қызмет атқарып жатыр. Үлкен ұлы әскери қызметкер, шені  – майор. Екінші ұлы инжерен-құрылысшы. Қызы он бірінші сыныпты алтын белгіге бітіріп КазНудың мех-мат факультетіне грантқа түсіп, бітіріп бүгінгі таңда  мұғалім болып еңбек етуде. Кенже қызы мектепті қызыл аттестатпен  аяқтап, Астана халықаралық университетінің 3 курс студенті, жақында ТМД елдерінің арасындағы ең үздік студент атағын алды. Әсілі, ұлағатты ұл, инабатты қыз тәрбиелеп өсіре білген абзал жанға қандай теңеу айтсаңыз да жарасымды. Себебі, алыстағы аудан орталығында тұрса да замана көшінен қалмай, тіпті аудан халқына абыройлы, үлгілі отбасы бола білу екінің бірінің қолынан келмейді. Нақтылай түссек, әркімге бұйырмайтын бақыт!

Қорыта айтқанда, қырық жыл бойы тұрақтылық пен табандылықтан таймай адал еңбектің жемісін жеп тұғырына көтеріле білу ақылдылық  болып та саналатыны анық.

Нұрбол Әлдібаев,

Заңгер-журналист.

Алматы облысы.