Қайырлы күн, құрметті жиынға қатысушылар!

1165

Сұрақтардың көптігіне байланысты, сұрақ, ұсыныстарымды осы жерге жолдаймын. Назарға аласыздар деп үміттенемін.
1) Мұрат Абдуламитұлы, Мұхтар Болатханұлының ұсыныстарын қолдаймын. «Көлсай көлдері» аумағында кіре берісте, көлдің маңында, көлдің сол жақ бөлігінде қонақүйлер тұр, тағы да белсенді салынуда, бетондалған аумақ бар, барлығының құрылыс салу бойынша заңды, заңсыздық мәселесі қайта қаралса. Ұлттық парктің құзырына кірмеуі мүмкін, бірақ министрлік деңгейінде жергілікті атқарушы органдармен бірге қарастыру қажет деп ойлаймын.
2) Қайыңды, Саты шатқалы, Көлсайдан бөлек Талды, Өрікті, Мәжінің көлі бағытын да наразға алу маңызды. Бұл бағытта Тимур Дүйсенғалиев те айтып өтті.
3) Ұлттық парктер аумағындағы ауылдар тұрғындарына туристік қызмет көрсету бойынша білім беру жобаларын, тендерлік талаптарға қосып, компанияларға әлеуметтік жауапкершілік ретінде алып жүру ұсынылса.
4) «Көлсай көлдерінің» тарихы бай. Саты ауылында музей ашуға сұранып тұр. Бұл да инвесторларға әлеуметтік жауапкершілік аясында ұсыныс ретінде қосылса.
5) Тендерлік талаптарға қосатын мәселенің бірі – инвесторлар Ұлттық парк, сол маңдағы ауылдар, туристік нысандардың қызметін насихаттау бойынша PR жобасының болуы. Мысалы: қазақ, орыс, ағылшын тілінде «Көлсай көлдері» туралы фотоальбом, деректі фильм, арнайы сайт керек.
6) Ұлттық парктер бойынша жобаны ҰП маңындағы ауыл тұрғындарына таныстырып, жергілікті халықтың қосымша ұсыныстарын қабылдап, ескеруді сұраймын.

Құрметпен, «Көлсай көлдері» бойынша қоғамдық кеңес мүшесі
Ербол Азанбек