Журналистер – елмен бірге

304

Ғани БЕЙҚҰТБАЙ, аудандық «Қарқара» газетінің бас редакторы.

Жүйрік уақыт та тоқтау болған ба?! Міне, тағы да бір жылмен қоштасар сәт жақын қалды. Тарих қойнауына аттанғалы отырған биылғы жылға өкпеміз жоқ. Негізінен төрт түлік мал өсіріп, дән толқытып жағдайларын жақсартып отырған халқымызға бергені аз емес. Егіншіліктің де жайы жаман болған жоқ. Еткен еңбек, маңдай терді өтеуін жинайтын күз маусымы да жайдары мінез танытты. Соның нәтижесіндей, егіншіліктен де ойдағыдай өнім алынып, қамбалар дәнге тола түсті. Төрт түлік мал бойынша облыста алдыңғы қатардамыз. Түлік төлімен жараса өрісті толтырып отырған жайымыз бар.
Аудандағы А. Түркебаев, І. Жұмағұлов, Майлы Орманов, С. Бейсембетов, Ниязбеков атындағы мектептер ағымдағы жөндеу жұмыстарынан өтіп, ел игілігіне пайдалануға беріліп, ел қуанышы еселене түсті. Басты-басты жолдарымыз қалыпқа келді. Бірсыпыра елдімекендерде ауыз су мәселесі шешілді. Биылғы жылдың ауқымында Тұйық, Алғабас, Бөлексаз ауылдарын ауыз сумен қамтамассыз ету жұмыстары жүріп жатыр. Ұзынбұлақ, Тасашы ауылдарында да Мәдениет үйлері ДКЗ бағдарламасы аясында күрделі жөндеуден өткізіліп, Жаңа жыл қарсаңында ел игілігіне пайдалануға берілді.
Таулы өлкенің үні мен тіліндей – аудандық «Қарқара» газеті де басына түскен қиындықтарына қарамастан жылды аяқтаған жайы
бар. Оқырманымыз 3200 дейін көбейсе, жаңа жылда да оның қатары азаймақ емес. Ең бастысы, халықтың жоғын жоқтап, мұңын мұңдайтын, өлкенің бар жақсылығын, қуанышын дер кезінде көрсетіп отыратын журналистер қауымы әрдайым елмен бірге. Халқының жанында.
Журналистер алдағы уақытта да елмен бірге болып, жоспарлы түрде шығармашылықпен еңбек ете береміз. Ұстаздар мен дәрігерлерге, өнер мен әдебиетке, кәсіпкерлік пен спортқа арналған арнайы беттеріміз жаңа сипатпен, тың дүниелермен көз тартатын болады. Газет өнер мен өлеңге деген талабы бар жас ұрпақтың ұшар қанатына жол ашады. Округтерге, өңірлерге арналған арнаулы «Көшпелі редакция» айдарымен жарық көреттін беттеріміз тұрақты жарық көреді. Оқырмандардың хаттарына да кеңінен орын беріліп отырылады. Ең негізі, аудан әкімінің құрылтайшылығымен шығатын басылым болғандықтан өңір басшысының Қазақстан Республикасының Президентінің алға қойған міндеттерін, тапсырмаларын орындауға бағытталған сан қырлы істерін, 100 нақты қадам – Ұлт жоспарын, ауылшаруашылығын қолдауға арналған мемлекеттік 33 бағыттағы бағдарламалардың орындалуын тұрақты түрде көрсетіп отыратын болады.
2021 жыл журналисттер қауымы үшін өзгеше жыл болмақ. Аудандық «Қарқара» газетіміз 90 жасқа толып, мерейлі мерекелерін атап өтпек. Жолшы Бікебаев, Нұрданбек Тоққожаев, Төлеген Баялиев, Келеке Құсайынов, Шыңғыс Тұрсынов, Тұрықбай Бейсебаев, Шаюп Авахриев, Кәдірбек Құныпияев, Нұрболат Тастанқұлов, Биғайша Ақшалова, Рыскүл Дүйсембекова, Гүлжан Ермекбаева сынды журналистер қауымының еңбектері ерекше атап өтуге болады.
Есігімізден еніп, төрімізге қадам басқалы отырған Сиыр жылы барлық оқырмандарымыздың шаңырақтарына шаттық, бақыт пен қуаныш әкелсін! Жаңа жыл – жаңа бақыт, жаңа табыс жылы болсын! Аңсаған армандарымыз орындалып, аты жаман аурудан аман есен құтылып, жақсылықтарда ғана жүздесе берейік, құрметті оқырмандар!