Жапонияның Қазақстандағы Төтенше және Өкілетті Елшісі Касаи Тацухико Талдықорғандағы Қаратал ықшамауданында орналасқан, 2014 жылы Елдос Баялышбаев негізін қалаған «Асар» спорттық-сауықтыру орталығына келді. Оны облыс әкімінің орынбасары Батыржан Байжұманов күтіп алды.
Еңбеккер азамат Елдос Баялышбаевтың жобалары талай жерде мақұлданып, жүзеге асыру үшін арнайы гранттар ұтып алған. Жобаларының негізгі мақсаты – мүмкіндігі шектеулі жандарға көмек қолын созу, олардың қоғамға қалыптасуына септігін тигізу.
Еліміз егемендік алғаннан кейін жұмысын бастаған Жапонияның «Кусанонэ» адам қауіпсіздігін сақтауға арналған әлеуметтік жобаларға арналған қайтарымсыз көмек бағдарламасы талайдың жолын ашты. Бұл тізімде Елдос Баялышбаев та бар. Залдағы Польшадан, Ресейден келген жаттығу құралдарына дәл осы бағдарлама грантын ұтып алу арқылы қол жеткізді.
«Кусанонэ» (біздің тілде «Шөп тамыры») бағдарламасы 1997 жылдан бастап 2018 жыл аралығында елімізде 92 жобаны қолға алып, жалпы 6 429 688 АҚШ долларын жұмсаған. Елдостың жобасы 2017 жылы қабылданып, оған 82,818 АҚШ доллар грант беріліпті. Құрал-жабдықтарды жетікізген – «МК Интерна» ЖШС. Омыртқаға, белге, аяққа, буындарға, қолға арналған жаттығу құралдары заман талабына сай. Жалпы орталыққа 5 жыл ішінде 500-ден астам қаралушы келген. Елімізден ғана емес, алыс-жақын шет мемлекеттен де келетіндер бар. Мәселен, біз барғанда Өзбекстаннан келген екі адам жаттығу жасап жатты. Оның алдында бір жылға жуық Қырғызстаннан келген 15 адам орталықта болған. Елдостың 2014-2016 және 2017-2019 жылдарға арналған жоспары түгелімен орындалды. Енді 2020-2022 жылдарға арналған ауқымды істер күтіп тұр.
Әр аппаратпен жеке танысқан Касаи Тацухико:
– Бағдарламаның оң нәтижесін өз көзіммен көрдім. Мүмкіндігі шектеулі жандар – қоғамның бір бөлігі. Оларға деген істеріңізге береке тілеймін. Келесі жылы Жапонияда Олимпиада ойындары өтеді. Сол кезде паралимпиадада осы залдан шыққандардың бірі Қазақстанның Туын жоғары желбірететіндігіне сенімдімін, – деді.
Артынша Батыржан Байжұманов пен Елдос Баялышбаев қадірменді қонаққа сый-сияпат берді.
Серік ҚАНТАЙ.
