Бала қуанса, әлем қуанады

773

Ауданның 90 жылдық мерейтойына орай аудан орталығы Кеген ауылында орталық алаңда «Балалар ойын алаңы» салынып мерейтой қарсаңында салтанатты түрде ашылды. «Достық үйі-Қоғамдық келісім орталығы» КММ-нің директоры Тәңірберген Қасымберкебаев пен Қазақ халықаралық қатынастар және әлем тілдері университетінің кафедра меңгерушісі, филология ғылымдарының докторы, профессор Байынқол Қалиев лентасын қиған ойын алаңы аудан балаларының қуанышын еселеп, көңілдерін шаттандыра түскені анық. «Бала қуанса – әлем қуанады»,- осындай ұранды жалау еткен басшылар — ел мерейі баланың шаттанғанында деп іргесі қайта қаланып, бекемденген ауданның күннен-күнге шарықтап дамуына барынша үлес қосып келеді. Ғасырға жуық уақытты еншілеген ауданның тарихы әріде жатыр. Сонау ата-бабаларымыздан келе жатқан үрдіс те, өнегелі іс балаға жақсылық жасай отырып, болашағыңды қалыптастырасың деген. Бүгіннен егілген дәннің жемісі келешектің еншісі болмақ. Осындай өрнекті істі зерделеген, кешегінің дәстүрімен ел болашағының қамын бүгіннен қамданған іргелі істің бір көрінісі ойын алаңының бой көтеруі еді.  Бала ойнай жүріп есейеді, ойынмен жетіледі. Жас жеткіншектердің, ойын баласының көңілі көк, ертеңі жарқын болуы бүгінгі ел тізгінін ұстаған атқамінерлердің берер тәлімі мен бала деп қарай отырып, зерделі өнеге қалыптастыруында деп білемін. Сондайлық көңіл көгертер істің ертеңге берер тәлімі мен тәрбиесі жетерлік. Зор қуанышқа кенелген, қолдарына шарларын, гүлдерін ұстап алаңның ашылуын асыға, тағатсыздана күтіп тұрған балғындарды көргенде балалығың еріксіз еске түседі екен. «Бала біздің – болашағымыз!» деп бастап, ізгі ниетін білдірген үлкендердің бала үшін жасаған әрбір ісіміздің ертеңі болмақ деген ниет тұрғандай болды көңілдерінде. Балғын тілдерімен аға буынға, ойын алаңының тұрғызылуына себепші болған ел ағаларына алғыстарын жаударған кішкентай бүлдіршіндердің, барша аудан балғындарының атынан Алғыс білдіре шаттанғаны жаныңды тебірентпей қоймады.
Тіліңнен айналайын деп сүйсініп тұрған үлкендерің қарасында мейірім шуағы шашып тұрды. Осындай мейірім ұялатқан ашылу салтанаты ел ертеңіне дәнін сепкен ізгі істің көрінісін берді. Күнде думанға толған ойын алаңы бейбіт күннің бақытты балаларының шадыман қуанышы мен шаттығына бөленуде. Тәуелсіз елдің көк туы астында әрбір бала бақытты болуға лайықты. Бақыттың бастауы балаға зейін қоя, ертеңіне лайықты жағдай туғызу мен саналы да сапалы білім дәнін себуде екенінде дау жоқ.

Лаура Мұхаметқали.