Депутаттар ел ішінде

Алматы облыстық мәслихатының төрағасы Қуат Байғоджаевтың басшылығымен облыстық мәслихат депутаттары Б.Нұрбеков, Д.Жарасбаев, Ж.Алтанғадас, Қ.Бекиев, С.Сарсеков, облыстық мәслихат аппаратының бас инспекторлары А.Өмірбекова, А.Құрманғалиева, облыстық құрылыс басқармасының басшысы Ж.Оңалбаев Кеген ауданына жұмыс сапарымен келіп, аудан көлеміндегі әлеуметтік және инфрақұрылымдық маңызы бар бірқатар құрылыс нысандарын аралады. Аталған жұмыс сапарына Кеген ауданының әкімі Н.Теңізбаев, аудандық мәслихат төрағасы А.Нұғман, аудан әкімінің орынбасарлары М.Исаев, М.Батырханұлы және жауапты бөлім басшылары қатысты.
Сапардың негізгі мақсаты-аудан аумағындағы құрылыс нысандарының барысымен танысып, олардың сапасы мен құрылыс мерзімін бағалау, сондай-ақ өзекті мәселелерді анықтап, оларды шешу жолдарын қарастыру.
Іс-сапар барысында Саты ауылының ішкі жолдарының және Қайынды көліне баратын автокөлік жолының құрылысымен, Жалағаш ауылындағы салынып жатқан үйлермен спорттық кешеннің құрылыс жұмыстарымен, күрделі жөндеу жұмыстары жүріп жатқан Қарқара орта мектебінің жағдайымен, Қарқара ауылындағы ауылшаруашылығы мақсатында салынып жатқан каналдың жұмысымен, Кеген ауылында жаңадан салынып жатқан тұрғын үйлердің жағдайымен, Тасашы ауылдық округіндегі су шайып кеткен көпір құрылысының қазіргі жай-күйімен танысты.
Делегация Жалағаш ауылындағы спорттық кешенінің құрылысы мен салынып жатқан үйлерді және Шырғанақ, Кеген ауылдарында салынып жатқан тұрғын үйлердің құрылыс барысын көзбен көріп, жобалық- сметалық құжаттамалармен танысты.
Сондай-ақ мердігер ұйымдардың өкілдерімен кездесіп, атқарылып жатқан жұмыстар бойынша пікір алмасты.
Халықтың тұрғын үй жағдайларын жақсарту үшін әкімдік тарапынан жасалып жатқан жұмыстарға облыстық мәслихат төрағасы Қуат Байғоджаев оң бағасын берді.
Сондай-ақ, делегация Қарқара ауылындағы құрылыс жұмыстарының 40 пайызы аяқталған Қарқара орта мектебін аралап, көрді. Жобаның жалпы құны- 876,0 млн.теңге. Құрылыс кестеден едәуір артта қалуда, терезелер дұрыс орнатылмаған, инженерлік желілердегі кемшіліктер жетерлік. Жұмыс күші жетіспейді.
– Нысанда жұмыс өте баяу жүріп жатыр, ал сапасы белгіленген талаптарға сәйкес келмейді,-деген облыстық мәслихат төрағасы Қуат Байғожаев мердігерге жұмысты барынша жеделдетіп, жұмыс күшін арттыруды тапсырды.
Құрылыс сапасы мен мектептің заманауи білім беру талаптарына сай болуы мәселесіне ерекше мән берілді. Делегация мүшелері құрылыс сапасы мен талаптардың сақталуы қажеттігін атап өтті.
Бұдан бөлек, делегация Қарқара ауылындағы «Қарқара», «Мөңкебай» каналдардың алаңына барды. Шөл және шөлейт жерлерді суару мақсатында жүзеге асырылып жатқан жоба аясындағы құрылыс жұмыстарының кестеден кешігіп жатқаны анықталды. Жобаның жалпы құны- 16,848 млрд. теңге. Жобаны ұтып алған компания талапқа сай өз уақытында жұмыс жасап жатқан жоқ. Қазіргі уақытта жұмыс тоқтап тұр. Жергілікті шаруаларда өз уәждерін облыстық мәслихат депутаттарына жеткізіп, су тапшылығы болып жатқандығын айтты.
Сапар соңында делегация Тасашы ауылдық округіндегі наурыз айында қарғын су шайып кеткен көпір құрылысының барысымен танысты. Жұмыс аяқталуға жақын, аз күнде қолданысқа берілмек.
Аталған нысандарды аралау барысында Қуат Байғоджаев және облыстық мәслихат депутаттары құрылыс сапасы мен белгіленген мерзімдердің сақталуы қажеттігін атап өтіп, аудан басшылығы мен жауапты мердігер ұйымдарға нақты тапсырмалар жүктеді.

Дәурен
ӘБУТӘЛІПОВ.