“Ауыл тынысы” атты шара өтті

Мемлекет басшысы Қасым-Жомарт Тоқаевтың бастамасымен елімізде жүзеге асырылып жатқан «Таза Қазақстан» ауқымды республикалық экологиялық акциясы қоғам өмірінде айрықша мәнге ие. Жастар ресурстық орталығының ұйымдастыруымен өтті. Бұл тек қоршаған ортаның тазалығын сақтауға бағытталған шаралар жиынтығы ғана емес, ең алдымен азаматтардың экологиялық санасын қалыптастыруға, ой мен сана тазалығын дәріптеуге, табиғатқа жанашырлықпен қарау мәдениетін орнықтыруға бағытталған маңызды қадам болмақ.
Аталған акция аясында өткен шарада экологиялық мәдениетті қалыптастырудың төрт кешенді бағыты айқындалған. Атап айтқанда, халықтың экологиялық санасы мен тәртібін дамыту, экологиялық жауапкершілікке негізделген өмір салтына ынталандыру жүйесін қалыптастыру, экологиялық ағартушылық пен білім беруді күшейту, сондай-ақ экология мәселелерін ақпараттық кеңістікте кеңінен насихаттау басты назарда.
Осы бағыттағы атқарылып жатқан жұмыстарды саралау және алдағы кезеңге арналған міндеттерді айқындау мақсатында Кеген ауданында «Таза Қазақстан» акциясы аясында «Ауыл тынысы» атты мазмұнды кездесу ұйымдастырылды. Жиын барысында экология саласындағы өзекті мәселелер талқыланып, табиғатты қорғауға бағытталған нақты іс-шаралар жөнінде ой бөлісіп, шақырылған қонақтар тарапынан пікірлер айтылып, тұрғындар мен жастардың көкейіндегі сұрақтарға тұшымды жауаптар берілді.

Шараның мазмұнын байыта түскен маңызды бөлімдердің бірі – «Таза Қазақстан – жас суретшілер көзімен» атты экологиялық сурет байқауы болды. Байқаудың басты мақсаты – жастардың табиғатты қорғауға деген сүйіспеншілігін арттыру, олардың шығармашылық қабілеттері арқылы экологиялық мәдениетті қалыптастыру және қоғамда экологиялық жауапкершілікті кеңінен насихаттау. Байқауға ұсынылған жұмыстардан туған жерге деген махаббатты, табиғатқа деген жанашырлықты айқын аңғаруға болды.
Шара барысында үздік деп танылған жас суретшілер дипломдармен және Алғыс хаттармен марапатталды, ал үздік шығармалар көрмеге қойылатын болады. Бұл – жастар еңбегін бағалау ғана емес, олардың экологиялық бастамаларға белсенді қатысуына берілген үлкен қолдау.
Жалпы алғанда, «Таза Қазақстан» акциясы аясында өткен бұл кездесу жастардың туған жерге деген жауапкершілігін арттырып, қоғамды ортақ мақсатқа жұмылдырудың жарқын үлгісіне айналды. Кеген ауданында тұрақты түрде ұйымдастырылып келе жатқан экологиялық шаралар табиғатты қорғауға, ауылдың тазалығын сақтауға және тұрғындардың азаматтық белсенділігін арттыруға елеулі үлес қосып келеді.
Табиғатқа деген құрмет – болашақ ұрпақ алдындағы аманат. «Таза Қазақстан» бастамасы әрбір азаматты осы жауапкершілікті сезінуге үндейді. Жастардың белсенділігі мен ынтасы– ауданның дамуы мен еліміздің өркендеуінің берік кепілі. Туған жердің тазалығы мен көркемдігі– баршамыздың ортақ ісіміз.

Лаура Мұхаметқали, “Қарқара” газеті.