БІР КҮНДЕ ҚОС КІТАПТЫҢ ТҰСАУЫ КЕСІЛДІ

319

Кеген аудандық мәдениет үйінде өткен қасиетті жұма күні жанға шуақ сяйлаған тамаша, жайдары кеш болып өтті. Атап айтқанда, Әлем Халықтары Жазушылар Одағының мүшесі, қарымды жазушы, таулы өңірдің бір перзенті Ақсәуле Әбдіхалыққызының «Сағындым, сағым жылдарым!» атты шығармашылық кеші өрнек тапты. Сөз орайында айта кеткен жөн, Ақсәуленің қымбатты жары, белгілі тележурналист, айтулы қаламгер Абдолла-Алтый Сүлеймен небары 49 жасында бұл өмірден ғайып болған екен. Осынау мәнді де мағыналы кешке Ақсәуленің және жұбайы Абдолла-Алтый Сүлейменнің республиканың түкпір-түкпірінен бар жақындары, достары, сыйластары, сыныптастары жалпы қолына қасиетті қалам ұстаған бір топ қаламгерлер арнайы келіп қатысты. Иә, кеш иесі Ақсәуле Әбдіхалыққызы туралы мөлтек сыр. Ол алыста жүрсе де жанарыында туған елі-жерін ұстап, жүрегіне қимас мекенін ұялатқан нәзік жан. Ақсәуле сол туған жері үшін тамаша дүниелерін жазып, кітап етіп шығарған ойы тұнық, қаламы ұшқыр, сөзі маржан, тілі ажарлы қазақ қыздарының арасынан шыққан қарымды қаламгер. Ол сүйікті жарының артында қалған 3 ұлын өсіріп, тәрбиелеп, бүгінде немере сүйіп отырған адамгершілік асыл қасиеттері мол, адал, жан-жағына шуағын ғана шашып, ізгілік пен игілік дүниелерді ғана теріп келе жатқан бақытты әже. Ақсәуледей жазушының соңғы оншақты жылдар ауқымында «Арамыздасың, Абдолла!», «Қалдырған ізің мәңгілік», «Мәңгілік сағынышым», «Сағындым, сағым жылдарым», «Жұмақ мекен, талбесігім – Тасбұлақ», «Сағыныш екен сол бір шақ», «Тау қызы» атты айтары мол, берері толымды, ғибратты кітаптары жарық көріп үлгірді. Сол үшін де Әлем Халықтары Жазушылар Одағының бір мүшесі болды. Әр туындысының айтары сыры, қыры бар. Бәрінен туған елі-жерін, сүйікті Тәуелсіз Отанын жанындай жақсы көретін ана жүрегінің үліпілі, сағынышы, сезімі бәрі-бәрі айқын сезіліп тұрады. Жүректен шыққан дүниелер оқырмандарының ыстық ықыласын алған. Дәл осы күні тамаша кеште Ақсәуледей қаламы жүрдек жазушының қос кітабының тұсауы кесілді. Атап айтқанда, қазақтың атын әлемге танытып жүрген Димаш Құдайбергендей таңғажайып үнді, тамаша әндерімен дүниежүзі тұрғындарын тамсандырып келе жатқан әншіміз туралы «Димаш» атты кітабы жарық көріпті. Бұл шын мәнінде қазақтың ән әлеміне жұлдыздай жарқырап шыққан, бір Алламыздың өзі сыйға тартқан Димаштай әнші ұлымызға, қымбатты перзентімізге деген үлкен құрмет. Бұл өзімізді өзіміз бағалап, өзіміз үшін шынайы қуанған жазушы ананың Димашқа деген тамаша сыйы. Димаштай әнші туралы көп жайды алға тартатын кітап та оқырман жүрегіне ыстық ұялары даусыз. Одан бөлек «Елік қыз» атты кітабының тұсауы кесіліп, оқырмандарына жол тартты. Кеште филология ғылымының докторы, профессор Гүлжахан Орда Ақсәуленің өмірі, шығармашылығы туралы шұрайлы да шырайлы тілімен жақсылап жеткізіп берді. Кеген ауданы әкімінің орынбасары Кеңес Қабылбеков аудан халқының атынан лайықты сый-құрметін көрсетті. Ақсәуледей жазушының алғашқы ұстазы, ҚР Білім беру үздігі Тұрсынхан Шәлдибекова, Әлем Халықтары Жазушылар Одағының төрағасы Қайрат Дүйсенұлы, Қызылорда облысы Жаңақорған аудандық мәслихатының хатшысы Ерғали Ілиясұлы, облыстық «Өлке тынысы» ЖШС-нің бас директоры Мейрам Базарұлы, Жамбыл облыстық телеарнасының тілшісі, ақын Ғайни Әлімбекқызы, Түркістан облысы Қазықұрт ауданынан келген Абдолланың курстасы, ардагер журналист Әшірбай Еркебаев, Қызылорда облысы әкімінің құттықтауын табыстау үшін Жаңақорған ауданының Құрметті азаматы Мадияр Ахметов, ҚР Мәдениет қайраткері, Жаңақорған ауданының Құрметті азаматы, «Дарын» сыйлығының иесі Сауранбек Елеуов, ҚР Мәдениет қайраткері, сазгер Жақсылық Әбдіраманов тағы басқалар сөз алып, Ақсәулеге жүрекжарды тілектерін білдіріп, отбасына амандық, мықты денсаулық, шығармашылық табыс тіледі. -Туған жерімнен айналайын! Тасбұлағым дәйім жүрегімде тұрады. Әр жыл сайын келіп, көк шалғынына аунап, әсем гүлдерін иіскеп, мөлдір бұлақтарынан шөлімді бір қандырып кетпесем көңілім көншімейді. Тасбұлағымды кітапта қалдырдым. Бұл менің туған жеріме деген перзенттік борышым. Сол арқылы Тастұлағымды бір көтеріп тастадым десем, артық айпаймын. Оған елім-жұртым риза шығар. Туған елі-жерім, таулы өлкем аман-есен болсын! Қайта құрылған ауданымда жақсылық мол болсын! Дәйім сол жағымды жақсылықтарына келіп тұрайын. Менің осынау шығармашылық кешімнің өткізілуіне мүдделі болған аудан әкімі Талғат Байедиловке, аудан әкімінің орынбасары Кеңес Қабылбековке, барша жерлестеріме және туған Отанымның түкпір-түкпірінен ат арылтып келген барша жақындарыма алғыстан басқа айтарым жоқ,-деді шығармашылық кешінде сөз алған жазушы Ақсәуле Әбдіхалыққызы тебірене, толқи тіл қатты. Әсерлі кеште Ақсәуле мен Абдолланың әулеті туралы түсірілген бейне көріністер, арнайы теле хабарлар көрсетіліп, кеш ажарын аша түсті. Қазақстан Республикасының мәдениет саласының үздігі Жанат Қарман, Бахаргүл Айтбаева, Бақытжан Құсайынов тағы басқалар әсем әндерімен көп көңілін желпінтіп тастады. Аудандық ардагерлер мен ақсақалдар кеңесінің төрағасы Сабыр Досымбековтың ақ батасымен қорытындыланған кеш шын мәнінде ел жүрегіне ыстық ұялады.