Бөлексаз ауылында қақпа ашылды

412

Бөлексаз ауылында соңғы жылдар жақсылығына толы. Ауылдағы орта мектеп заманауи күрделі жөндеуден өткізілді. Өткен жылы ауыл орталығынан мешіт салынып, ел игілігіне айналды. Өңірдің жап-жақсы тұрғындары бірігіп жұмыс жасап, жүздеген гектарға астық өсіріп жүрген жайлары бар. Жақында ауылда қуанышты оқиға болды. Ауылдың бір перзенті, Алматы қаласында кәсіпкерлікпен айналысып жүрген азамат Тұрғанжан Бұршақбайұлының тікелей қаржысын шығарып, қолдауымен Бөлексаз ауылының кіреберісіне айшықты да ажарлы қақпа орнатылды. Оны орнатуға ауылдың ел-жұрты атсалысқан. Қақпаның салтанатты ашылысында аудан әкімі аппаратыының басшысы Медет Исаев лентасын қиуға қатысып, аудан әкімдігі атынан жаңадан бой көтерген қақпаның ащылуымен құттықтады. Жиналған көпшілікті ауылдың қадірменді қариясы, ауданның Құрметті азаматы Амантай Жақашев, ауыл тұрғындары Мұқатай Тоқтасынов, көршілес Шырғанақ ауылдық округінің әкімі Оразбай Бекбатыров тағы басқалар шын көңілдерімен құттықтап, ізгі тілектерін жеткізді. Салтанатты сәттерде ауылының жоғын жоқтап, кем-кетігін бүтіндеп жүрген Тұрғанжандай азаматтың әке-шешесі Бұршақбай Белеков пен Дүйсехан анаға сый-құрмет көрсетілді. Ауыл әкімі Жасұлан Өмірзақов Тұрғанжанға ауыл атынан естелік сыйлығын табыстап, ауыл тұрғындары атынан алғысын жеткізді. -Туған жерімізден айналайық! Қолымыздан келгенінше көмегімізді тигізіп тұрамын. Ауыл орталығынан саябақ ашсақ деген жоспарлар бар екен. Жақсы болады. Туған ауылымның жақсылығы мол бола берсін!,-деді Тұрғанжан Бұршақбайұлы шын көңілімен. Қақпаның ашылу салтанаты ән-күймен ажарланып, жұрт көңілін бір серпілтті.

Қанат Біржансал, Бөлексаз ауылы.