Жұмысшыларға жағдай жасалады
Іле ауданында орын тепкен «Бент» – темірбетон әрі газоблок кірпіштерін шығаратын іргелі компания. Тарихы сонау 1987 жылдан басталатын өндіріс ошағының ел эконономикасына қосып жатқан үлесі мол. Барлық жағынан тәжірибесі толысқан компания БАҚ өкілдері үшін пресс-тур ұйымдастырды. Ондағы мақсат –компанияның тыныс-тіршілігімен таныстыру.
Журналистер алғақы кезекте кәсіпорынның өндірістік блогында болды. Мұнда жылына 1,5 миллионнан астам темірбетон шпалы мен 2 миллионнан астам рельс бекіткішін шығарады. Сонымен қатар компания автоклавты газоблоктар өндіреді, тау кендері арқылы құрылысқа қажетті ұсақ құм-тас шығарады. Өндіріс ошағының материалдардың 400-ден астам түрін сынайтын зертханасы мен оқу орталығы бар.
Пресс-тур барысында «БЕНТ» компаниялар тобы президентінің көмекшісі Алмабек Мулякаев кәсіпорынның 2022 жылы ашылған оқу орталығымен таныстырды. Оқу орталығы жыл сайын 600-ге дейін жұмыссыз азаматты оқытады. Үш айға созылатын оқу кезеңінде тәжірибе жинақтаушыларға ай сайын 350 мың теңге көлемінде шәкіртақы беріледі. Оқу аяқталғаннан кейін түлектер бірден «БЕНТ» компаниясына жұмысқа орналасады.
«Оқыту 11 мамандық бойынша жүргізіледі. Ол – бетоншы, электромонтер, кран машинисі, лаборант, электргазбен дәнекерлеуші, техник, бетон араластыру цехының операторы, жылыту-ылғалдандыру цехының операторы, токарь, фрезерлеуші, стропальщик мамандары. Сондай-ақ зауыттың қызметкерлері әр алты айда оқу орталығында аттестациядан өтеді», – деді Алмабек Мулякаев.
Бұдан соң тілішілер қауымы автоклавты газоблоктар өндірісімен танысты. «Автоклав KZ» компаниясының атқарушы директоры Шамиль Сонуров газоблоктардың қалай өндірілетінін, қоспаның араласуынан бастап, дайын өнімге дейінгі процесті, температуралық режимдерді және құрғату уақытын егжей-тегжейлі түсіндірді.
«Өндірістік қуаттылық жылына 150 000 шаршы метр газоблокты құрайды. Біздің өніміміз әртүрлі құрылыс тапсырмаларына жарамды. Мысалы, қабырғалар, бөлмелер, каркас құру және фасадтарды жылу изоляциялау. Жабдықтарымыз тұтынушының талабына сәйкес газоблоктарды әртүрлі өлшемде шығаруға мүмкіндік береді. Сонымен қатар бізде 10 мың шаршы метр газоблок сақтай алатын қойма бар», – деді Шамиль Сонуров.
Енді бір өндіріс цехта темірбетон шпалдары жасалады екен. Бұл процесс бірнеше кезеңнен тұрады. Демек, қалыптарды дайындау, арқан пакеттерін жасау, оларды қалыпта тартып, пішіндеу, кейіннен пісіру, қалыпқа түсіру, бөлшектеу, кесу және соңында дайын өнім алу.
Темір-бетон шпалдарын өндіру бөлімінде Жұлдыз Балакирева 8 жылдан бері краншы болып жұмыс жасайды. Ол: «Мен кранда жұмыс істей бастаған кезде биіктікке деген қорқынышымды жеңдім. Бұл өте жауапты жұмыс, сондықтан өте мұқият болу керек. Мысалы, егер біз жүк көтеріп бара жатсақ, төменде жұмысшылар болса, қауіп барын уақытында байқап, дабыл беру керек. Жұмысым көңілімнен шығады, өйткені қызығушылығым бар», – дейді Жұлдыз Балакриева.
Өндірілетін өнімнің сапасы тәуелсіз аккредиттелген құрылыс зертханасында тексеріледі. «Stand lab» сертификаттау орталығының басты маманы Али-би Иса әр партиядан үлгі алып, темір және инертті материалдарды зерттеу үшін бірнеше сатыдан өтетінін түсіндірді.
Соңғы өндірістік учаскеде рельс бекіткіштерінің барлық бес бөлшегін өндіру процесін көзбен көрдік. Бұл бекіткіштер үш полимерлік және екі металл бөлшектен тұрады. Олардың бір бөлімінде роботтар жұмыс істеп, серпімді болат қыстырғыштарды шығарады.
«ТОО «Fasteners & Fasteners Metal» – 2023 жылы құрылған және рельс бекіткіштерінің бес бөлшегінен тұратын толық жиынтықты өндіретін Қазақстандағы 100% отандық кәсіпорын. Біздің өніміміз Қазақстанның ішкі сұранысын толық жабады және Қырғызстан, Өзбекстан, Ресейге экспортталады. Қазір біз Таяу Шығыс елдері, сондай-ақ Түркменстан мен Әзербайжанмен жеткізу бойынша белсенді келіссөздер жүргізіп жатырмыз», – деді «Fasteners» компаниясының бас директоры Нижат Ширханов.
«БЕНТ» компаниясының президенті Дінмұхамед Кузиев атап өткендей, компания Қазақстанда ғана емес, Орталық Азия мен ТМД елдерінде теміржол саласы үшін стратегиялық маңызды өнімдерді өндіруге үлкен үлес қосып отыр.
«Біз биыл Ақмола облысында зауыт сатып алдық және онда өндірісті бастауға кірістік. Қазіргі уақытта «БЕНТ» компаниялар тобында шамамен мың адам жұмыс істейді, олардың 85 пайызы –жұмысшы мамандар. Сондай-ақ Қазақстан Президенті жариялаған «Жұмысшы мамандықтар жылы» бізге техникалық мамандарды тартуға және ауыр жұмыс пен төмен жалақы туралы стереотиптен арылуға көмектеседі. Компания үшін әр жұмысшының жағдайының жақсы болуы маңызды», – деп атап өтті Дінмұхамед Кузиев.
Сонымен қатар ол компанияның «Отбасы банк» акционерлік қоғамымен жасаған меморандум негізінде 2023 жылы «Наурыз жұмыскер» бағдарламасы бойынша сегіз қызметкердің өз пәтерлерінің кілттерін алғанын да мәлімдеді.
Пресс-тур «БЕНТ» компаниясының көпсалалы және жоғары технологиялық өндірісін көрсетті. Компания қазіргі уақытта өндірістік қуаттылықты арттыруда, экспортты кеңейтуде және жұмысшы мамандықтары бойынша кадрларды даярлауға белсенді көңіл бөлуде. Өзінің оқу орталығы арқылы компания жұмысшы мамандықтары бойынша тұрақты кадрлық ағынды қамтамасыз етіп отыр. «БЕНТ» қазіргі заманғы өнеркәсіптік кәсіпорын ретінде автоматтандырылған процестерді, сапа бақылауының жоғары деңгейін және жұмысшыларға жақсы еңбек жағдайларын ұсынып, «Жұмысшы мамандықтары жылына» да маңызды үлес қосуда.
Бағдат ШОЙБАС
Іле ауданы
