4 маусым – Қазақстан Республикасының мемлекеттік рәміздер күні.
Көңілге қуаныш сыйлаған
Туған Тәуелсіз Отанымыздың құрылғанына міне, 28 жылға аяқ басып барады. Туған Отанымыздан, ел мен жерімізден айналайық! Сан жылдар тәуелсіз ел болуды аңсаған ұлтымыздың арманы орындалды. Бүгінде қазақ деген елімізді бүкіл дүниежүзі таниды. Әлем картасында Қазақстанның аты жарқырап жазылып тұр. Тұңғыш Президентіміз, Елбасы Н. Назарбаевтың сындарлы саясатының арқасында мемлекетіміз биік-биік белестерінен өтті. Ауыртпалыққа толы кезеңдерін артқа тастады. Бүгінде Тәуелсіз мемлекетімізде әлемдегі дамыған 30 елдің қатарына кіруге арналған сан қырлы жұмыстар жүргізілуде. Ең басты қуанышымыз, ұлттық рәміздеріміз бар. Көгімізде көк байрағымыз желбірейді. Асқақ Елтаңбамыз төрімізде. Ән Ұранымыз естілген сайын жанымызды қуаныш кернейді. Аудандық мәдениет үйінде мемлекеттік рәміздер күні мерекесі лайықты аталып өтті. Салтанатты шақта көзімізге ыстық, көңілімізге сондайлық жақын рәміздеріміз туралы бейне көрініс көрсетілді. Көк байрағымыз бен Елтаңбамыз құрметпен сахна төріне әкелінді. Ән Ұранымыз көңілімізді марқайтқан соң жиналған жұртшылықты аудан әкімі Талғат Байедилов, аудандық ақсақалдар кеңесінің төрағасы Сабыр Досымбеков, аудан прокурорының орынбасары Талғат Төлегенов, С.Серкебаев атындағы орта мектептің мұғалімі Нұрбек Досымханов құттықтап, ізгі тілектерін алға тартты. Мерекені аудандық мәдениет үйінің қызметкерлері әсем ән мен күміс күйге толтырды.
Н. Тастанқұлов, Кеген ауылы.
