«Таза Қазақстан» экологиялық акция өтті
Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.
Жуырда аудан орталық алаңда аудан тұрғындарының, мекеме қызметкерлері мен ардагерлердің қасытуымен 25 қазан – Республика күніне орай, “Таза Қазақстан” республикалық экологиялық акциясы өтті.
Мемлекет басшысы Қасым Жомарт Тоқаевтың «Таза әрі қолайлы орта – елдің өмір сапасының басты көрсеткіші. Табиғатты қорғау – баршамыздың азаматтық міндетіміз» деген сөзі бүгінгі шарада нақты іске айналды.
Аудан әкімі Нұрбақыт Теңізбаев өз сөзінде:
– «Ағаш егу, көгалдандыру науқаны– бұл елдік мүдде, ұрпақ қамы. Әрбір егілген көшет – өмірдің тамыры, болашақтың тынысы. Кеген өңірінің көркін арттыру, жасыл белдеуді көркейту- біздің ортақ міндетіміз»–деді.
Жиын барысында ақсақалдар алқасының төрағасы Нұрлыбай Көпжасар, жастар атынан Оспанжан Ақниет сөз сөйлеп, табиғи орта және оның тазалығы туралы ойларын ортаға салды. Табиғатты қорғау – қоғам байлығы, еліміздің көркеюі мен болашағы екенін атап өтті.
Шара барысы ағаш отырғызу рәсімі аудан әкімі бастаған топтың қатысуымен орталық алаңда үздіксіз жалғасты. Акция аясында аудан көлемінде жалпы алғанда:
70 шырша
400 жеміс ағашы
2910 тал‑терек отырғызылды.
Бүгінгі акцияға үлкен қолдау көрсеткен Кеген орман шаруашылығы мекемесіне аудан жұртшылығы атынан алғыс білдірілді.
«Таза Қазақстан» акциясының мәні- жай акция ғана емес, экологиялық мәдениетті қалыптастыруға бағытталған республикалық бастама. Оның негізгі мақсаты: қоршаған ортаны қорғау, тұрғындардың экологиялық сана‑сезімін арттыру, қала мен ауылды абаттандыру болып табылады. Тұрақты жасыл желекті қалыптастыру, көшеттердің күтімін ұйымдастыру, тұрғындардың экологиялық азаматтық белсенділігін арттыру. Акция аясында бүгінгі атқарылған іс шаралар – болашақ ұрпақтың таза ортадағы өміріне жасалған инвестиция болмақ.
Аудан әкімінің тапсырмасымен алдағы кезеңде: егілген көшеттерді күтіп‑ бағу жоспары бекітілді. Бүгінгі акция– тек ағаш отырғызуды ғана көздемей, ол – табиғатқа деген қамқорлықтың көрінісі.
Әрбір егілген тал – болашақтың тынысы десек артық айтқандық емес.
Жасыл желекке бөленген ауыл – тұрғындарының бірлігі мен ортақ еңбекке деген ұмтылысының символы болары хақ.
