Шекара – Тәуелсіздігіміздің тірегі

Шекара – елдің егемендігін айқындайтын, ұлттық қауіпсіздікті қамтамасыз етудің басты кепілі. Мемлекет аумағының тұтастығын сақтау, шекара белдеуінің заң талаптарына сай қорғалуы – баршаға ортақ маңызды міндет. Осыған орай, жуырда Кеген аудан әкімдігінің кіші залында үйлестіру кеңесінің отырысы өтті. Кеңес шекара қауіпсіздігін қамтамасыз ету және шекаралық аймақтағы өзекті мәселелерді талқылауға арналды. Отырысқа аудан әкімінің орынбасары бастаған бірқатар тиісті мекеме басшылары, құқық қорғау органдарының өкілдері, сондай-ақ шекара қызметінің жауапты мамандары қатысты. Атап айтқанда, Райымбек ауданы бойынша шекара басқармасы бастығының бірінші орынбасары, штаб бастығы, подполковник Ахметов Асхат, Нарынқол шекара бөлімінің бастығы, подполковник Айтахунов Айдос және Қарқара шекара бөлімшесінің бастығы, майор Салауат Ғибрат арнайы келіп, шекара мәселесі бойынша пікір алмасты.
Күн тәртібінде келесі мәселелер қаралды:
1. Кеген ауданы бойынша «Жол картасы» аясындағы жоспарланған және атқарылған іс-шаралар;
2. Мемлекеттік шекараны қорғау бойынша бірлескен жұмыстардың орындалу барысы;
3. Шекаралық аймақтардағы жалпы ахуал;
4. Шекаралық белдеуде иесіз мал жаю мәселесі;
5. Шекара маңындағы жер учаскелерін пайдалану тәртібі.

Жиын барысында Ахметов Асхат мырза шекаралық қауіпсіздікті сақтау – тек шекарашылардың ғана емес, бүкіл қоғамның ортақ міндеті екенін атап өтті. Сонымен қатар, шекаралық тәртіпті сақтау бағытында тұрғындармен түсіндіру жұмыстарын күшейту, шекара белдеуінде бақылауды арттыру туралы ұсыныстарын ортаға салды.
Қатысушылар тарапынан өзекті сұрақтар қойылып, нақты жауаптар берілді. Атап айтқанда, мал шаруашылығымен айналысатын тұрғындардың шекара аймағында мал жаю тәртібін бұзу жағдайлары, жер телімдерін заңсыз пайдалану секілді мәселелер қозғалды.
Кеңесте барлық қатысушылар шекара қауіпсіздігін сақтау — мемлекет тұрақтылығы мен ел тыныштығының басты кепілі екенін ерекше атап өтті. Шекара қызметімен, жергілікті билікпен және құқық қорғау органдарымен бірлескен іс-қимылдарды жүйелі жүргізу арқылы шекаралық тәртіп пен тұрақтылықты қамтамасыз ету жолында нақты шешімдер қабылданды.
«Шекара – ел қорғаны, ұрпақ амандығы»,- деген ұлы ұстанымды берік ұстанып, әрбір азамат бұл бағытта өз үлесін қосуы тиіс.
Кездесу барысында Райымбек аудандық шекара басқармасы өкілдері өз ұсыныстарын ортаға салып, аудандағы шекаралық тәртіпті сақтау бағытында атқарылып жатқан жұмыстармен таныстырды.
Жиын соңында аудан әкімі Нұрбақыт Теңізбаев:
– Біз еліміздің шекара қауіпсіздігін қамтамасыз ету бағытындағы жұмыстарды жүйелі түрде жалғастырамыз. Бұл бағытта барлық мүдделі мемлекеттік органдармен тығыз ынтымақтастық пен үйлесімді өзара іс-қимыл жүргізілуде. Алдағы уақытта бұл ынтымақтастықтың арқасында шекара қауіпсіздігін жаңа сапалық деңгейге көтереміз деп сенемін, – деп атап өтіп, жауапты мамандарға нақты тапсырмалар жүктеді.
Аудан басшысы сонымен қатар, шекара аймағындағы тыныштықты сақтау – тек шекара қызметінің емес, барлық тұрғындардың ортақ міндеті екенін еске салып, азаматтық жауапкершілікті күшейтуге шақырды.
Мемлекеттік шекараны қорғау – әр азаматтың қасиетті борышы.
Осыған сай, ел қауіпсіздігін сақтау – бір күндік емес, тұрақты әрі тыңғылықты жұмыс. Шекараның тыныштығы – елдің тыныштығы. Ендеше, ұлттық қауіпсіздік мүддесі жолында жұмыла еңбек ету – баршамызға ортақ парыз.

Лаура Қарасартова,
Суреттерді түсірген:
Мира МУРАТАЛИЕВА.