Жұдырықтай жұмылсақ ауданымыздың экономикасы өркендеп гүлдене түсері сөзсіз

325

Қазақ халқында «Жақсылыққа жақсылық – әр кісінің ісі, жамандыққа жақсылық – ер кісінің ісі» деген мақалды негізге ала отырып, бір сөзбен айтқанда жақсы жаман демей адамға жақсылық жасаудың маңыздылығы оның аса құнды қасиет екені айдан анық. Бабаларымыз «Асыл туған адамның алтын жетпес нарқы бар, Жақсы менен жаманның аспан мен жердей  парқы бар» деген дана сөздер Қуаныш Мұқанбекқызы жайлы айтылғандай. Бұл кісі жаңақұрылған  Кеген ауданына белгілі, көпке үлгі іс танытып жүрген жанның бірі де бірегейі. Көз көріп те, құлақ естіп те жүр. Дәрияға тамған тамшыдай бұл кісінің өнегеге толы істері жанға жылу сыйлап, көптің көңіліне қуаныш ұялатып жүргені көңіл қуантады. Жақсының жаршысына айналған Қуаныш Мұқанбекқызы жайлы аз-кем әңгіме құрған едік.

— Елбасы Н. Назарбаевтың жылдағы дәстүрлі Жолдаулары ел өркендеуіне елеулі үлес қосып келеді, биылғы кезекті Жолдауынан алған әсеріңіз, түйер ойыңыз?

Қуаныш Мұқанбекқызы:— Ел президенті Нұрсұлтан Әбішұлы Назарбаевтың қазан айындағы Жолдауын үлкен қызығушылықпен танысып шықтым. Жыл сайынғы Жолдауларда ол халықты экономикалық және саяси тұрғыдан жаңғыртуға күш салса, бұл жолдауында Қазақстан азаматтарының әлеуметтік жағдайын, тұрмыс сапасын арттыруға бағытталған. Оның ішінде білім, денсаулық сақтау саласын жетілдіру, еңбекақыны көбейту, халықтың табысын арттыру болып отыр. Сонымен қатар жұрттың қызығушылығын тудырған көкейіме қонған жайттардың бірі «Нұрлы жол» және «Нұрлы жер» мемлекеттік бағарламалары. Оның біріншісі көлік инфрақұрылымын дамыту болса, екіншісі тұрғын үй шаруашылығы құрылысын кеңейту халыққа ең қажетті, өзекті мәселелердің бірі. Сонымен қатар «Рухани жаңғыру» бағдарламасы оның жалғасы болып келетін «Ұлы даланың жеті қыры» атты мақаласы жаппай қолдауға ие болып жатыр. Халқымыздың байқуатты өмір сүруі және де еліміздің озық дамыған 30 елдің қатарына қосылуы бұл мемлекетіміздің басты мұраты десек болады. Әрбір қазақстандық Елбасымыздың жүргізіліп жатқан саясатын құптап, реформалардың мәнін, Отанымыздың өркендеу жолында жүргізіліп жатқанын түсіну керек деп ойлаймын. Оны жүзеге асыру үшін халықтың бірлігі, ынтымағы жарасса болашақ ұрпағымыздың келешегі де жақсы болады деп сенемін.

— Шағын және орта бизнесті қалай бастадыңыз? Не түрткі болды?

Қуаныш Мұқанбекқызы: — Мен Алматы қаласында жұмыс атқарып жүргенімде бұрынғы Райымбек ауданының әкімі болған Қаһарман Күдеров деген азамат маған телефон шалып Сіздей өжет, алғыр азаматша біздің ауданымызға қажет. Неге ауылға келіп шағын бизнеспен айналысып, ауылдың экономикасын көтеруге еңбек етіп, өз үлесіңізді қоспайсыз. Ауыл үшін, ел үшін, туған жер үшін еңбек етіп тер төкпеске деп шақырған еді. Көмек қолын созатынын да айтты. Сол жылдары бизнес жаңадан аяқ алып келе жатқан кез. Келіскен уәде бойынша келсем, ол азамат қызмет бабымен басқа жаққа ауысып кетіпті. Сонымен не керек екі қолға бір күрек демекші әр түрлі жұмыстар істедім. Басымда бас-пана жоқ, тұрақты жұмысымда жоқ, қиын қыстау күндер өтіп жатты. Сөйте жүріп, осы мәслихаттың астындағы буфетке тендр болады дегенді құлағым шалды. Тәуекелге бел буып, қалтамда 200 теңге ақшамен осы «Құмар баб» атты питцерияны ұтып алдым. Содан бері ел игілігі жолында еңбек етіп келемін десем де артық айтқандық емес.

Ел игілігі жолындағы қыруар істеріңіз елге өнеге. Кеген ауданындағы жалғыз басты қарт, әлеуметтік аз қамтылған отбасыларына, жетім- жесірлерге қол ұшын беріп жүрген айтулы жанның бірісіз, осы тұрғыда өз ойыңыз?

Қуаныш Мұқанбекқызы: — Өздеріңіз білетіндей мен шамамның келгенінше осы уақытқа дейін көмек беруден шаршаған адам емеспін. Қызметіме кедергі жасап алдыма оралған адамдарға бой бермей «бандыны қуған Хамит-тей» болып өмір сүріп жатқан жандардың бірімін. Адамның адамдығы кісілігінен, оның құндылығы адамгершілік қасиетінде. Ісіміз ілгері басуы үшін қай салада болмасын барынша сапалы қызмет жасап, адал еңбек етуіміз керек. Сондай-ақ жемқорлық, парақорлық атты жаман әдеттерге жол бермеуіміз керек. Кейде кәсіпкерлікке кедергі келтіретін жайлар көптеп кездесіп жатады. Осындайдан арылып, кәсіпкерлікке қолдау, көмек жасалынып отыратын болса, ісіміз алға басып, еліміздің тұғырлануына лайықты үлесімізді қосуға мүмкіндік молынан болар еді. Ел алғысы қашанда жақсы ғой. Алғыс арқалаған адамның ісі алға басып, еңбегінің жемісін көрмек. Осындай алға қойған ізгі ниетім мен пейілімнің арқасында көп нәрсеге қол жеткізіп, өмір белесінің биік тұғырын өз еңбек жолымда сезіндім. Олай деуге негіз жоқ емес, осынау жүріп өткен өмір жолымда қанатымен су сепкен қарлығаштай, азда болса үлкенді – кішілі жандарға шапағатым тиіп, алғысқа бөленіп те жүрмін. Жақсылық жасау мен үшін үлкен бақыт. Оны тек шарапатын сезінген жан ғана ұғына алар деп топ-шалаймын. Шама шарқым келгенше ізгі іске мұрындық болып жүрген ісімнің өтеуі тек алғыс. Мен осыған дән ризамын.

— Мәслихаттың алдын жазда гүлдестеге орадыңыз, қыран бүркіттің мүсінін орнатып, жақсылыққа мұрындық болып жүргеніңізді көзіміз көріп жүр, осы тұрғыда айтарыңыз?

Қуаныш Мұқанбекқызы: —Халқымызда «Ердің артында мол байлық қалғанша, жақсы ат қалғаны игі» деген аталы сөз бар. Осы мәслихат ғимаратында халыққа қызмет көрсетіп жүрген соң, оның іш – сыртының жарқырап көз тартатындай ету менің ең бірінші мақсатым. Өсіп келе жатқан жас ұрпаққа үлгі боларлықтай өнегелі іс жасасам деп ойлайсың. Ал адамның шынайы байлығы қанағат пен еңбекте жатыр. Бір күні үлкен қария түсімде менің қолыма қыран бүркітті ұстатып жатқанын көрдім. Ол қария қызым ел сияқты дүниеге қызықпа осы бүркітті үлкен ғимараттың алдына қой деді. Сол көрген түсім қыран бүркіттің мүсінін орнатуға мұрындық болды. Содан бері Аллаға шүкір, ішкі түйсік мені алдаған емес. Алмақтың да салмағы бар, ерудің де берекеті мол. Осы ұстаным жаныма тіпті жақын. Ал гүлге келер болсам, жаным әдемілікті, көркемдікті қалайды. Жаны таза жанның ішкі әлемі сұлу келеді. Бойдағы қуат іспен ұштасса, сұлулықтан тазалық, тазалықтан береке тарайды. Берекем ырыспен астасып, ынтымаққа жол ашса ол айып па?! Жүрген жерімізді, өскен ортамызды рухани әлемімізді өркендете түссек оның берер шарапаты сондайлық болмақ.

Өмірдің құндылығы не деп ойлайсыз? Өмірдегі ұстанымыңыз?

Қуаныш Мұқанбекқызы: — Адам бар жерде құндылықта қатар жүреді. Ол адамға ғана емес, оны қоршаған ортаға да тікелей байланысты. Адамның бар құндылығы оның өмірі. Өмірді ойламаса, алдына белгілімақсат қоймаса, адам өз өмірінің құндылығын түсінбейді. Мен туғанымнан бері тағдырдың сан түрлі соқпақтарында кездескен қиындық атаулының барлығын шынайы сенімділікпен «Тек алға» деген өмірлік ұстанымым арқылы шамамның келгенінше жеңіп келемін. Өмірдегі ұстанымым – өмірді адал және өзіңе лайықты етіп сүру деп ойлаймын. Ертеңгі күні қартайғаныңда өткеніңнен рахат алатындай, қолдағы бардың қадірін біліп, уақытты құр бекерге жібермеу. Адамдар сенен көмек сұраса, қол ұшын созудан бас тартпау. Сені сыйлаған адамды сенде сыйла және де әрқашанда бір Аллаға ғана сену. Менің өмірдегі ұстанымым осы.

— Алға қойған жоспарыңыз?

Қуаныш Мұқанбекқызы: Алға қойған жоспарыма келер болсақ. Мен зейнеткерлік жасыма қарамай әлі де болса ауданымызға, ауылыма өз үлесімді қосып, күш қуатым барда халыққа еңбек еткім келемін, еңбек ете де беремін. Ауылымның көркейіп, гүлденуіне бар күшімді са-ламын. Жаңадан тәй- тәй басқан ауданымның алдыңғы қатарлы аудан болатынына кәміл сенемін. Айта кететін жайт аудан әкімі Т.Байедилов, аудан әкімінің орынбасары Қ.Омархалық, қаржы бөлімінің басшысы Қ.Бектенов, ауыл шаруашылығы бөлімінің басшысы Б.Садықов, аудандық  мәслихат хатшысы Н. Советов,мәслихат аппаратының басшысы Ұ. Ақжігітов, аудандық өртке қарсы қызмет бөлімінің бастығы Р.Нариманұлы, құрылыс бөлімінің басшысы Д.Маусымбаев сында ауыл аза-маттары ел басқарып, ауданның өркендеп- өсуіне қыруар жұмыс атқарып жатқандарына дән ризамын. Осындай туған жерден түлеген азаматы бар ел азбайды. Сондай-ақ, сол тұста үлкен көмегімен қол ұшын созып, жақсылыққа мұрындық болған жанның бірі жеке кәсіпкер, ауданымыздың азаматы Бейсебайға да үлкен алғысымды білдіре отырып, тек жақсылықтар, биік мәртебе, толайым табыс өнегелі өмір белесін тілеймін. Осындай ізгілікке жаны жақын жандар ауданымызда көбейе берсін, бір-бірімізге деген пейіліміз ниетіміз арта берсін. Жаңа түлеген ауданымыздың іргесі бекіп, ел экономикасы өркендей берсін демекпін. 21 жылдан кейін ауданымыз бөлініп, қуанышымыз еселеніп жатыр. Ауданның одан әрі өркендеуі әкімге болмаса басшыларға ғана сын емес екенін айтқым келеді. Себебі, әркім өзім, өз өлкем деп қарап, жұмыла көтерген жүк жеңіл демекші, бір жұдырықтай жұмылсақ, ауданымыздың экономикасы өркендеп, гүлдене түсері сөзсіз. Барлық аудан азаматтары мен жастарына аналық ақ ниетімді осылай жеткізгім келеді. Еліміз аман тынышты заман болсын!

— Әңгімеңізге рахмет!

Сұхбатты  жүргізген: Лаура МҰХАМЕТҚАЛИ.