Мәуліт — береке мен рухани тазару айы

Кеген аудандық Мәдениет үйінде барша мұсылман қауым үшін қасиетті саналатын Мәуліт мерекесіне арналған тағылымды да рухани мазмұны терең іс-шара өтті. Бұл- Пайғамбарымыз Мұхаммедтің (с.ғ.с.) туған айы, күллі мұсылман жұрты асыға күтетін ерекше мейрам. «Мәуліт-береке мен ынтымақ айы» деген атаумен өткен кештің мақсаты Пайғамбарымыздың өнегелі өмірін насихаттап, ел ішіндегі имандылық пен бірлікті нығайту.

Пайғамбарға деген сүйіспеншілік – жүректен.
Шара барысында ең алдымен көрермен назарына «Пайғамбарды білесің бе?» атты әсерлі бейнеролик ұсынылды. Бұл бейнеролик көпшіліктің жүрегіне жол тауып, Алла елшісінің өмірі мен сүннетінің маңызын тереңірек ұғынуға мүмкіндік берді.
Мәуліт кеші Құран аяттарының оқылуымен басталды. Кеген ауданының бас имамы Әзім Сатыбалдыұлы Құран бағыштап, елдің амандығы мен бірлігі үшін дұға жасады. Ізгі тілектермен сахна төріне көтерілген Алматы облысының бас имамы Мадияр қажы Тағайбайұлы жиналған көпшілікті мерекемен құттықтап, Мәуліттің діндегі орны мен мән-маңызы жайлы мазмұнды уағыз айтты.
Мәуліт мерекесіне арналған рухани кеш – елдің рухын көтеріп, жүректерге нұр сепкен, ұлттық және діни құндылықтарды ұлықтаған мәнді шара болды. Алдағы уақытта да осындай тағылымды басқосулар жиі ұйымдастырылып, халқымыздың бірлігі мен имандылығы арта берсін деген ниет бар.
Шарада сөз алған Кеген ауданының әкімі Теңізбаев Нұрбақыт Молдахметұлы жиналған жұртшылықты мерекемен құттықтап, имандылықты ту еткен халықтың рухани жаңғыру жолындағы қадамдарына тоқталып өтті.
«Мәуліт – тек мереке емес, жүректерге иман ұялататын, бауырмалдық пен сабырлықты, кішіпейілділік пен кешірімділікті насихаттайтын ай. Мұндай рухани кештер — қоғамды татулық пен ынтымаққа бастайды»,— деді аудан басшысы.
Рухани кештің әсерлі сәттерінің бірі – Еркебұлан қари оқыған Мәуліт жыры мұсылман қауымының жүрегін тебірентті. Шара соңы аудан өнерпаздарының қатысуымен концерттік бағдарламаға ұласты. Ән мен жыр, терме мен күй арқылы пайғамбарымыздың асыл қасиеттері насихатталып, көрермендер рухани шабыт алды.
Мәуліт – мейірім мен сабыр айы.
Мәуліт мерекесі — тек бір күндік шара емес, бұл — иман мен ізгілікті жаңғырту, бауырмалдық пен бейбіт өмірді дәріптеу айы. Осындай тағылымы мол кештер қоғамда рухани тазалық пен ынтымақты нығайтып, жастарға өнеге болары сөзсіз.