“Отбасын жоспарлау” тақырыбында тағылымды шара өтті
2025 жылдың қыркүйек айының екінші жексенбісі – Қазақстанда алғаш рет Президент Жарлығымен ресми түрде «Отбасы күні» ретінде аталып өтті. Осыған орай «Белсенді ұзақ өмір» орталығы мен Жастар ресурстық орталығының ұйымдастыруымен маңызды әрі тағылымды іс-шаралардың бірі — «Отбасын жоспарлау» атты жиын өтті.
Іс-шараның басты мақсаты — отбасы институтын нығайту, оның құндылықтарын дәріптеу және жастар арасында отбасы жауапкершілігі туралы түсінікті тереңдету болды.
Жиын барысында алғашқы болып сөз алған аудандық емхананың білікті акушер маманы Байбала Мақпал – отбасының қоғамдағы орны, ана мен баланың денсаулығы, жауапты ата-аналық тақырыптарына тоқталып, отбасын жоспарлау- саналы ұрпақ тәрбиелеудің алғашқы қадамы екенін атап өтті.
Сондай-ақ жиында: «Отбасын қолдау орталығының» директоры Мәсімбаев Біләл– орталықтың негізгі қызметі мен отбасыға көрсетілетін әлеуметтік қолдау шаралары туралы баяндады.
Аудандық емхананың психологы Джаныбекова Сара – отбасындағы психологиялық ахуал, ұрпақ тәрбиесіндегі ата-ананың рөлі туралы кеңестер айтты.
Жастар ресурстық орталығының психолог маманы Толонқызы Гүлназ- жас отбасылармен жүргізілетін жұмыстар мен отбасылық жауапкершілікке үйретудің маңыздылығына тоқталды.
«Белсенді ұзақ өмір» орталығы филиалының кеңесшісі, аудандық аналар кеңесінің төрайымы Көннева Бақытгүл – отбасындағы дәстүр сабақтастығы, ана тәрбиесі мен ұлттық құндылықтар жөнінде өз пікірін білдірді.
Шара аясында қатысушыларға отбасын жоспарлау, салауатты өмір салтын ұстану, репродуктивті денсаулықты сақтау және жанұя ішіндегі өзара түсіністікті арттыру бойынша құнды ақпараттар ұсынылды. Қатысушылар арасында пікір алмасу, сұрақ-жауап, тәжірибе бөлісу форматында ашық диалог өтті.
«Отбасын жоспарлау» атты бұл шара аудан тұрғындары үшін пайдалы әрі мазмұнды кездесу болды. Ол отбасылық құндылықтарды дәріптеумен қатар, жастарды жауапты әрі саналы өмірге бағыттайтын маңызды қадамдардың бірі ретінде бағаланды.
