Кәсіпкерлер форумы

Қолайлы мүмкіндіктер сөз болды

Жуырда аудандық әкімдіктің мәжіліс залында аудандық инвестициялық форум болып өтті. Оның жұмысын аудан әкімінің орынбасары Дастан Құдабаев жүргізіп отырды. Іргелі басқосуда «Кеген ауданының инвестициялық мүмкіндіктері және қаржы институттарының мемлекеттік бағдарламаларды аудан кәсіпкерлеріне түсіндіру» туралы мәселе қаралды. Форумда «Алматы облысының өңірлік даму орталығы» ЖШС-нің өкілі Алмаз Өмірбеков сөз алып, бүгінгі өткізіліп отырған форумның мақсатына жан-жақты тоқталды. Облысымызда 5 индустриялық аймақ бар. Аймақтағы инвестициялық ақуалды жақсарту үшін Алматы облысы әкімшілігінің  2016 жылғы 8 сәуірдегі №168 қаулысымен «Инвесторларды тарту және Алматы облысының инвестициялық климатын жақсарту жөніндегі аймақтық кеңесі» консультативтік-кеңесші органы құрылды. Баяндамашы мемлекетіміздің «Бизнестің жол картасы 2020» бағдарламасы туралы кеңінен әңгімеледі. Сонымен қатар агроөнеркәсіп кешенін дамытудың бағдарламаларын сөз етті. Бұл ретте мемлекетіміздің Өнімді жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасының маңызы ерекше. Форумда «Қазмясо» ЖШС-нің өкілі Сержан Стыбаев, «Ауылшаруашылығын қаржылай қолдау қоры» Алматы филиалы акционерлік қоғамының өкілі Бекұлтан Тұрғалиев сөз алып, алда тұрған жоспарларымен таныстырды. «Ауылшаруашылығын қаржылай қолдау қоры» Алматы филиалының өкілі өңірде асыл тұқымды іріқара өсірудің мүмкіндігі туралы әңгімелеп, шаруа қожалықтарының жетекшілерін, фермерлерді жобалы жұмысқа қатысуға шақырды. Форум жұмысын аудан әкімінің орынбасары Дастан Құдабаев қортындылап, фермерлер мен кәсіпкерлерді өздеріне жасалып отырған қолайлы мүмкіндіктерден шет қалмауға шақырды. Шараға арнайы келіп, тиімді ұсыныстарын айтқан мәртебелі қонақтарға алғысын білдірді.

Қанат Біржансал, Кеген ауылы.