Бірлігіміз бекем болса – шекарамыз берік

Қазақстан Республикасының мемлекеттік шекарасы – ел тәуелсіздігінің ең басты нышандарының бірі. Оны қорғау – мемлекеттің тұтастығы мен ұлттық қауіпсіздіктің басты кепілі.Ол – елдік санамыздың шебі, ұлттық мүддеміздің қорғаны, тәуелсіздіктің шынайы белгісі. Биік тау мен терең сайды бойлай күзеткен шекарашының қырағы көзі – елдің тыныштығы үшін төгілген маңдай тер мен сертке берік адалдықтың айғағы іспетті. Осындай маңызды міндетті абыроймен атқарып отырған бөлімшелердің бірі – Саты шекара бөлімшесі. Географиялық тұрғыдан күрделі әрі алыс аймақтағы шекара сызығын күзету – жауапкершілігі жоғары іс. Бөлімше өз аймағында заңсыз көші-қон, шекара бұзушылардың өтуін, контрабандалық әрекеттерді болдырмау үшін үздіксіз қызмет атқарады.
Қазіргідей алмағайып заманда шекараның қауіпсіздігі бұрынғыдан да маңызды. Шекара тыныш болса – халық бейбіт, еңсесі биік. Сондықтан шекара күзеті – бұл тек шекарашылардың ғана емес, әр азаматтың жүрек түкпірінде тұратын жауапкершілік. Саты бөлімшесінің ерекшелігі – жергілікті тұрғындардан құралған ерікті жасақ құрамын тиімді қолдануында. Ерікті жасақ – шекара қызметіне қолғанат болып, жергілікті жерді жетік білуімен, халықпен тығыз байланыс орнатуымен ерекшеленеді. Еріктілер шекарашыларға күдікті адамдар мен қозғалыстар туралы хабар беріп, шекаралық аймақтағы тәртіптің сақталуына үлес қосады. Шекараны қорғау ісі тек арнайы бөлімшенің міндеті деп қарау – тар түсінік. Себебі ата- бабамыздан қалған ұлан- ғайыр даланың әр сүйем жері сол ел азаматының жүрегіндегі қастерлі аманат. Осы тұрғыдан алғанда, ерікті жасақтарды шекара қызметіне тарту – ежелгі дәстүрдің жаңа сипат алған көрінісі десек, артық айтқандық емес. Ерікті жасақтар – бұл шекара бойында тіршілік кешіп жатқан ауыл халқының өз жеріне, өз мекеніне деген жанашырлығының жарқын дәлелі. Олар өз өлкесінің әр белін, әр сай-саласын жатқа біледі. Мұқият бақылау арқылы күмәнді қозғалыстарды дер кезінде аңғарып, қауіпсіздікті қамтамасыз етуге ат салысады. Еріктілер шекарашыға арқа сүйер серік болып, қол жетпес жердің көзі мен құлағына айналып, шекара тыныштығын күшейтеді. Саты шекара бөлімшесі ерікті жасақты орынды пайдалану арқылы шекара қауіпсіздігін нығайтып қана қоймай, ауыл тұрғындарының патриоттық сезімін күшейтеді. Бұл бір жағынан ел қауіпсіздігіне ортақ үлес қосу мәдениетін қалыптастырады.
Қорытындылай келгенде, Саты шекара бөлімшесінің қызметі – мемлекеттік шекараны қорғау ісінің сенімді тірегі. Шекарашылар мен еріктілердің бірлескен еңбегі ел тыныштығы мен тұрақтылығын сақтауға бағытталған игі іс болып қала бермек.

Саты шекара бөлімшесі.