Қазыналы қаламгер
Қазыналы қаламгер
Кеген аудандық кітапханасының ұйымдастыруымен Жастар ресурстық орталығында «Туған жерге тағзым» жобасы аясында, ардагер – журналист, жазушы, Кеген ауданының Құрметті азаматы Марат Тақабайұлымен «Қаламды серік еткен жазушы» атты кездесу өтті. Шараның мақсаты – қаламгердің өмір жолы, еңбектерін дәріптеу. Жерлес қаламгердің шығармашылығын оқырманға таныту, жастардың әдебиетке деген қызығушылығын арттыру, жергілікті тұлғаларға деген құрметті қалыптастыру.
Шараға қаламгер қария Марат Тақабаев, аудандық ақсақалдар алқасының төрағасы Сабыр Досымбеков, аудандық Аналар кеңесінің төрайымы Бақытгүл Демежанқызы, Жастар ресурстық орталығының психолог- маманы Гүлназ Толанқызы, кітапханашылар, бір топ замандастары және оқырмандар қатысты.
Қазіргі таңда зейнет жасындағы ардагер-журналист Тақабаев Марат Тақабайұлы Кеген ауданы, Ақтасты ауылында дүниеге келген. Осындағы Сарыжаз орта мектебін аяқтаған соң, Абай атындағы мұғалімдер даярлайтын институтты және Алматы зоотехникалық- мал дәрігерлік институтын бітірген. Еңбек жолын қазақ тілі мен әдебиет пәнінің мұғалімі болып бастаған. Әр жылдары «Ұзынбұлақ» асыл тұқымды қой кеңшарында бастауыш комсомол ұйымының хатшысы, Ыдырыс Көшкінов атындағы және Ақсай орта мектептерінде мұғалім, Кеген аудандық партия комитетінде нұсқаушы, «Ұзынбұлақ» асыл тұқымды қой кеңшарында партия комитетінің хатшысы, Қазақстан Компартиясы Кеген аудандық комитетінің екінші хатшысы, «Жылысай» қой кеңшарының директоры болды. 1994 жылдың қаңтар айынан 2008 жылдың желтоқсан айына дейін Ұзынбұлақ ауылдық округінің әкімі қызметін абыроймен атқарып, зейнеткерлікке шықты. Сонымен бірге, қаламгерлік пен қайраткерлікті қатар алып жүрді. 2012 жылдан Ұзынбұлақ ауылдық ақсақалдар алқасының төрағасы. Қаламгердің жазған әңгіме, новелла, очерк, мақалалары республикалық баспасөз беттерінде, облыстық «Жетісу», аудандық «Қарқара» газеттерінде үзбей жарияланып келеді. 2006 жылы «Бақыт баспалдақтары», 2014 жылы «Ағалар аманаты» атты кітаптары жарыққа шығып, оқырманға жол тартты. Басқа да публицистикалық және естелік мақалалары кітап болып жарық көрді. Еңбек жолында 5 медалі, Алғыс хат, Құрмет грамоталарымен марапатталған, 2005 жылдан Райымбек ауданының Құрметті азаматы. Жан жары Бүбіхан Нүсіпова мұғалім. Төрт бала тәрбиелеп өсірді. Балалары жоғары білім алды. Бүгінде әр сала да қызмет жасайды. Немере-шөбере сүйіп отырған, ауылдағы үлгілі отбасылардың бірі.
Аудандық кітапхананың абономент бөлімінің меңгерушісі Жібек Молдасанова «Қаламды серік еткен жазушы» тақырыбында баяндамасын оқып, іс-шараның маңызына тоқталып, кітапхананың тұрақты оқырманы Марат Тақабаевтың шығармашылығын насихаттап, ұрпақ тәрбиесіне қатысты ойымен бөлісу үшін бас қосып отырғандарын айтты. Өңірде әкелер мектебі құрылғанын да қуанышпен жеткізді.
Библиограф Жаңылай Дәулетбай көпшілікке ардагер- журналистің кітаптары мен қолжазбалары қойылған шағын көрмемен таныстырып өтті.
Сондай-ақ, іс-шара қонақтары С.Досымбеков, Р.Мырзағалиев, Р.Әділжанов, Б.Таубалдиев, И.Тастанов, Ж.Демежанов және жастар атынан Г.Толанқызы қаламгер қақында сөз қозғап, өркениеттің оқудан, тәрбиенің оны миға тоқудан басталатынын айта келе, ұлттық құндылық, кітап, қазіргі қоғам туралы тұшымды ойлар қозғап, оқырман қауымды кітап оқудан қол үзбеуге шақырды. Жастарды кітап оқуға баулу керектігін тілге тиек етіп, өз ойларымен бөлісті.
Кездесу барысында қазыналы қаламгер Марат Тақабайұлы өмірінің қызықты сәттерін, қиындығы мен қызығы қатар жүретін журналист мамандығының қыр- сырын оқырмандармен бөлісті. Мектепте жүргенде-ақ еңбекқорлығымен көзге түскен ардагер ағамыздың айтар естелігі көп-ақ екен. Әрине, бір ғана кездесумен қаншама оқиғаны айтып, әңгімелеу біте салмайды. Оқырмандар Марат Тақабайұлының әңгімелерін зейін қойып тыңдай отырып, өз кезегінде сұрақтар қойды.
– Балаларды кітап оқуға бейімдеу керек, кітап үлкен байлық. Әр жыл сайынғы оқиғаларды қойын дәптеріме түртіп, күнделік жазып отырамын. Көп оқып, іздену керек, халықты сүю керек, шындықты жазу керек. Жалқау болмай, бастаған ісің болса, соның нәтижесіне жету керек. Рахмет, барлықтарыңызға!
Осылай пікірлесіп отырған дұрыс,- деп түйіндеді сөзін қаламгер.
Кеш соңында кітапхана ұжымы әсерлі әңгімесімен бөліскен қарт журналиске құрмет көрсетті.
Дәурен ЕРМЕКБАЙ,
Кеген ауылы.
