Домбырамен музейге күй сыйла

Домбыра — қазақ халқының ең кең тараған екі ішекті, көп пернелі музыкалық аспабы. Жалпы, әрбір қазақ үшін киелі домбыра – ұлтымыздың символы. Қазақ күйі адам жанын тебірентеді, жүрекке терең бойлайды, керемет сезімге бөлейді. Көшпенділер заманында да солай болған, бүгін де солай. Домбыра бағзы заманнан бері қазақ халқымен бірге жасап келеді. Адамдар оны қайғыда да, қуанышта да қолынан түсірмейді. Сыңғырлаған домбыраның қоңыр үні халқымыздың тарихын, салт-дәстүрі мен ұлттық құндылықтарын ұрпақтан-ұрпаққа әуенмен жеткізіп келеді. Аталған аспап туралы қазақ ертегілерінде де, аңыз әңгімелерінде де айтылады. Ал Құрманғазы, Дина Нүрпейісова, Нұрғиса Тілендиев сынды домбыраның құлағында ойнаған дәулескер күйшілердің есімдері қазақ мәдениетінің символына айналып, олардың шығармалары қазақ музыкасының жылнамасында сақталған.
2018 жылдан бастап шілде айының бірінші жексенбісі Ұлттық домбыра күні болып аталып келеді. Ұлттық домбыра қүніне орай Кеген аудандық тарихи өлкетану музейінде «Домбыра – бабадан қалған бағзы мұра» атты тақырыпта домбыралар көрмесі, «Домбырамен музейге күй сыйла» атты тақырыпта мәдени іс-шара ұйымдастырылды. Мәдени іс-шараға дәстүрлі әнші Нұрым Байбала, З.Нұрқаділов атындағы өнер мектебінің оқушылары қатысып, өз өнерлерін көрсетті.

Назым Темирхан,
Кеген аудандық тарихи өлкетану музейінің қызметкері.