Журналистер марапатталды
Лаура МҰХАМЕТҚАЛИ, Суреттерді түсірген: Мира МУРАТАЛИЕВА, «Қарқара» газеті.
28 маусым– Бұқаралық ақпарат құралдары қызметкерлері күніне орай аудан әкімі Нұрбақыт Молдахметұлы бір топ журналистерді қабылдап, мереке қарсаңында толассыз еңбектеріне табыс, отбасына амандық тілеп, ел экономикасының өсуіне, ауданымызда атқарылып жатқан игі істерге қосқан үлесі үшін бір топ журналистерді марапаттап сый-сияпат табыс етті.
Таулы өлкенің тынысты-тіршілігі мен бүгінгі күнде атқарылып жатқан игі істерге мұрындық болып халық пен билік арасындағы көпір саналатын журналистер қауымының толассыз еңбегіне табыс тілеп, ізгі ниетін білдірген аудан әкімі ардагер журналистермен қатар бүгінде ел мен жердің жалынды жаңалықтарын бүкпесіз, қаз қалпында, дер кезінде оқырмандармен қауыштырып отырған қалам мен қағазды жандарына серік еткен, жақсылыққа қанатымен су сепкен қарлығаштай, ізгіліктің игі жолында жүрек түкпірін сел еткізіп, тайға таңба басқандай ақпарат бетіне жария етіп келе жатқан журналистердің еңбегін бағалап, мереке қарсаңында құрмет көрсетілді. Бұл да бір бүгінгі замана көшінің ілгері қадам басып, журналистердің тың ақпаратын айырықша бағалау болып табылады.
Журналист – қара қылды қақ жарған, әділдіктің туын жалау етіп, халықтың мұң-мұқтажын билікке бағамдар тіл мен шешендік өнердің тұспа-тұс келуімен өз өрнегін қалаған мамандық иесі. Осы тұста кешегі қатталған мақала бүгінге тарих. Газет бетіне жарияланған ақпарат балталасаңда кетпес, демекші журналистің жазған әрбір мақаласы сары қағазда тарих болып қатталары ақиқат.
«Алатау арайы» газетінің Кеген аудандық тілшісі Дәурен Ермекбай облыс әкімінің Құрмет грамотасымен, сонай-ақ ауданға елеулі еңбегімен танымал бір топ журналистер және де ардагер журналистер марапатталды. Құрметті әріптестер илегеніміз бір терінің пұшпағы демекші, ауданның өркендеу жолында жақсылыққа жол басшы болған қаламдарыңыз мұқалмасын, жазарларыңыз ортаймасын, алар асуымыз биіктен болып, мәртебеміз асқақтай берсін демекпін.
