Қарт қаламгер қара шаңырақта
Бірлік бар жерде, өнегелі тірлік бар
Жыл жылжып, уақыт сырғып кешегі күн тарих қойнауына сіңіп жатыр. Сол секілді өткенінен сыр шертетін бүгінгі басылымның тарихы ғасырға жуық белесті бағындырып үлгерді. Сол тұстан еңбек етіп газетпен бірге жасасып келе жатқан қарт журналист Нұрданбек Тоққожаев десек қателеспейміз. Өткеннен өнеге, бүгінге берер тәлім мен тәрбие деп білер Нұрданбек ағаның аз-кем тарихтан шертер сыры мен айтар ақыл кеңесіне құлақ түре отырып сұхбаттарсқан едік. Соны назарларыңызға ұсынып отырмыз.
Ауданымыз бөлініп еншісін алғалы да 1 жыл уақыт сырғып өтті, Ауданмен қоса 21 жыл тоқтау салып қайта құрылғын аудандық «Қарқара» газеті де жылды еңсеріп отыр. Өзіңіз қарт журналист ретінде аудан айнасы газетіміздің сонау уақыттан бергі үндесі, тілдесісіз. Осы тұста қайта түлеген аудан мен бүгінгі баспасөз жайлы айтар ойыңыз?
Нұрданбек Тоққожаев:– Ең бірінші айтарым, сонау 71 жылдан бері тағдырымыз, өміріміз осы газетпен тығыз байланысты. Бұл газеттен небір қоғамдық, білімді азаматтар өсіп шыққан, ауданның бүкіл тарихы қамтылған десек артық айтпаймыз. Ал енді мына 1997 жылдан екі аудан қосылғалы «Хантәңірі» болып аты өзгерді. Өзіңіз айтқандай 21 жыл салып қайта құрылған ақпарат көзінің жаңа ауданымен қауышып, зерделегеніне 1 жыл уақыт толып отыр. Бұның «Қарқара» деп аталуы, ең соңғы атауы болатын, сол атауы қайта өзіне оралды. Газет бұрындары аптасына 3 рет шыққан кезінде де бар ықылас, пейілімізбен жұмыс істедік, қазір енді 8 бет болып шығып келеді. Онда аудан халқының өмір тынысы қамтылып келеді, «газет халықтың құлағы, һам тілі»,- деп А. Байтұрсынов айтқандай ауданның үні мен тілі осы аудандық газет екеніне дау жоқ. Күн санап қарыштап дами беретініне аудан халқының, мұндағы мекеме басшысы, қызметкерлерінің, атсалысып еңбек ете береріне сенімдімін. Басшысы жақсы ел азбайды, демей ме, ауданымыздың іргелі дамуы бүгінгі өздеріңдей жастарды қолдында. Елім жерім деген ұлдан үміт көп. Сондықтан бірлесе істеген іс келте болмас. Осындай ақиқатты дүние әрине елінің ертеңі мен бүгіні жасаланып, атқарылып жатқан істер аудан айнасында жарыққа шығып отырса нұр үстіне нұр емес пе?! Айтар ақылым ел бірлігінің ұйытқысы, ауданның жаңаруы өздеріңнің, кейінгі буынның ұйымшылдығы мен еңбегінде жатыр демекпін. Қазіргі газеттің ұжымы творчествалық адамдар. Өйткені газетте көп жұмыстар жүріп жатыр. Тек қана ресми материалдар емес, жақсы мақалалар жарыққа шығуда. Аудандық газеттің ең ұтымды жері әдебиетке құмар жандардың шығармашылық ордасы.
Биыл «Жастар жылы» деп жарияланғанын жақсы білесіз. Осы тұста жас журналистер, өкше басарларыңызға аға буын ретінде айтарыңыз, бүгінгі төл газетіңіздің келбеті, мазмұнына қосар ұсыныңыз болса?
Нұрданбек Тоққожаев: – Биыл «Жастар жылы» деп отырмыз ғой. Әрине, қай жағынынан алып қарасақ та жастарға қолдау қашанда керек-ақ. Себебі, бүгінгі үдерісті заманда ғасырмен тілдес, үндес болу керек. Ол дегеніміз техниканың жетілген шағымен тұстас келген мезет. Біздің кезімізде бәрін қолмен жазып, машинкамен терушілер теретін. Онда таспаға басылғандай жазылған дүние орсаң да кетпейтұғын. Бүгін не, алдыңдағы компьютермен жызып, болмаса түзетіп қайта оқып көз алдыңда бәрі. Заманның жақсылығы болар өміршеңдіктің белесі ме, компьютермен жұмыс жасап отырған жастарға қарап қызығасың да, ертеңнен аларымыз әлі көп екенін ұғынасың. Ал, бүгінгі газетке келер болсам газетің тілі мен ой, мазмұны, оның шығу жолы да жастарға берері, үйретері айтары болуы тиіс деп ойлаймын. Тек жастарға ғана емес қоғаммен тығыз байланыста болуы керек. Сондықтан жастар неғұрым шығармашылық адам болуы тиіс. Біздің тұсымызда да баспада жастар жұмыс істеді. Талай азаматтарды қанаттандырдық, бүгінде Республикалық басылымдарда еңбек етуде. Сол секелді баспа, газет – қоғамның қозғаушы күші, оның ең өзектілігі де сол жастардың білімін, білігін, рухани құндылығын қалыпқа салып отыратын үлкен мектеп. Бүгінгі қайта тұғырға қонған газеттің алар асуы әліде алда екеніне дау жоқ.
1 мамыр – халықтар достығы мен бірлігі күні мерекесіне аудан жұртына тілегіңіз?
Нұрданбек Тоққожаев: – Қазақстан өзі жалпы достықтың, бірліктің, бауырмалдықтың Отаны ғой. Ұлтаралық теңдікті ұстап отырған еліміздің бірлігінде. Бірлік бар жерде өнегелі тірлік бар. Осындай көп ұлтты елді ұйытып отырған біздің халықтың көпшілдігі мен біртұтастығы деп білемін. Әрине, жақсылықтан үмітті елдің биікке ұмтылуы өз еліміздің іргесінің сөгілмеуінде. Сондықтан адамдығымыз биік болсын! Адамдықты өрістеткен де қазағымның мәртебесі өсе береді. Бірлік пен ынтымақтастық күні құтты болып, қаймағы бұзылмаған қазақ елі биікке жете берсін деймін.
– Рахмет. Алла Сізге ұзақ ғұмыр беріп, аталы ақылыңызды айта жүріңіз демекпін.
Сұхбаттасқан Лаура Мұхаметқали, «Qarqara».
