«Менің сөзім…» атты ақын Шеризат Мекебаевтың шығармашылық кеші өтті

Жуырда аспантаудың аясында, Кеген ауылының төрі саналған аудандық мәдениет үйінде ақын, спортшы-бапкер Шеризат Мекебаевтың 70 жас мерейтойына орай «Менің сөзім…» атты жыр кеші өтті. Ақынның жүріп өткен жолы мен саф күмістей жырлары, жүректен шыққан туындыларын, өмір белесін дәріптеу мақсатында дүйім жұртты жинаған дүбірлеген кеш өтті.

Мұқағалидың топырағынан дарып, Қарасазда кіндігі кесілген елге танымал Шеризат Сәрсенбайұлы жетпіске шығып, елін-жерін қуантқан думанды кеште, еңкейген қарттан бастап, еңбектеген балаға дейін төбе көрсетті. Демек, жауһазын жырларын елі сүйіп оқиды деген сөз. Сүйіп қана оқымайды, бүгінгі жасөркен сахна төрінде жатқа оқып, ақынның жырларынан шөл қандырды.

Алғаш сөз алған аудан әкімінің орынбасары Кеңес Күнесбайұлы ақынға ізгі ниетін-тілеген білдіре отырып, облыс әкімі М.Солтанғазиевтың арнайы жіберген «Алғыс хатын», сондай-ақ аудан әкімі Н.Теңізбаевтың «Алғыс хатын» табыс етіп, ақынның иығына шапан жапты. Ақынның жаңа ғана баспадан шығып, сыясы кебе қоймаған жаңа туындысы «Өмір деген» атты жыр жинағының тұсауы кесіліп, оқырмандарына жол тартты. Жаңа туындының атауы «Өмір деген» өлеңін ақын сахна төрінде дүйім жұртқа ұсынып, жүректен шыққан туынды жүректерге жол тартып.

Ауданнан шыққан ел ағалары да осы кеште бой көрсетті. Қазақстан Жазушылар одағының мүшесі, ақын, әдебиет танушы, өнер зерттеуші Сағатбек Медеубеков, «Өлке тынысы» ЖШС директоры Кәдірбек Құныпияев, айтыскер ақын Даубай Мамытұыл, Ереже Тоқтар, Кәмнұр Тәлімұлы, Мұқтархан Қалиев, Бақытжан Атакелдиев сөз сөйлеп, ақынға деген ізгі ниеттерін білдірді.

Ақының кешіне арнайы  Қазақстан жазушылар одағы басқармасынан келген Мерке Құлкенов басқарманың арнайы «алғыс хатымен» Шеризат Мекебаевты марапаттап, ақынға шапан жапты.

Халқаралық «Д.Қонаев» қорының вице-президенті, Қазақстанның Құрметті азаматы  Дәулетбек Құрманәлі, ақынға деген ілтипатын білдіріп, кеудесіне «Мерей» орденін тақты. Сондай-ақ, ақын Шеризат Мекебаев «Алаш» орденімен марапатталды.

«Жүрегімнің көзінен жас тамады», «Ол күндер оралмайды» атты жыр жинағының авторы Шеризат Сәсенбайұлының жыр жауһарынан маржан терген ақын ғана емес, белгілі жаттықтырушы, бапкер, спорт шебері. Талай шәкірттерді тәрбиелеп бәйгеге қосты. Соның бірі Азияның үш дүркін, әлемнің екі дүркін чемпионы Бауыржан Тәліпті атауға болады.

Жыр қанатында қалықтап, айналасын жырға бөкен ақынның өмір дастаны кейінгі өсіп келе жатқан буынға өнеге болмақ. Ақын аға, халқына жақын аға демекші, жырымен елдің мұңын мұңдап, жоғын жоқтайтын ақындардың әр сөзі киелі десек болар.

Ақын ағамызға жетпісіңізде жігеріңіз тасып, сексенге сергек жетіп, тоқтамай тоқсанға еліп,  ел алғысын арқалап, сыялы қаламыңыздың сыясы кеппей, ғасыр жасаңыз демекпіз.

Лаура Мұхаметқали,

Қарқара.