Қазақстан халқы Ассамблеясының 30 жылдығы – Бірлік пен келісім саясатының маңызды кезеңі
*Қазақстан халқы Ассамблеясының 30 жылдығы – Бірлік пен келісім саясатының маңызды кезеңі*
*15 сәуір күні Қонаев қаласындағы Алматы облысы әкімдігінің №4 мәжіліс залында Қазақстан халқы Ассамблеясының 34-сессиясы қарсаңында облыстық Ассамблея Кеңесінің отырысы өтті.*
Іс-шараны Алматы облыстық Қазақстан халқы Ассамблеясының төрағасы Марат Елеусізұлы Сұлтанғазиев ашып, отырысқа қатысушыларды тарихи мәні зор жиынмен құттықтады. Төраға өз сөзінде:
> «Тұрақтылық пен этносаралық келісім – ел дамуының негізі. Ассамблея осы бағыттағы негізгі қоғамдық институт ретінде өз маңызын үнемі дәлелдеп келеді», – деді.
Күн тәртібіндегі негізгі мәселелер:
Отырыс барысында үш маңызды мәселе қаралды:
1. *Облыстық Қазақстан халқы Ассамблеясы төрағасының қоғамдық орынбасарларын сайлау*
Ұсыныс ретінде «Барбанг» күрділер қауымдастығы» және «Ронаи» этномәдени орталығының төрағасы Гамзе Бадриевич Гейдаровтың және облыстық Ақсақалдар кеңесінің төрағасы Амангелді Данибекұлы Беспаевтың кандидатуралары ұсынылды.
Ашық дауыс беру нәтижесінде қарсы немесе қалыс қалғандар болмады. Екі үміткер де бірауыздан қоғамдық орынбасар лауазымына сайланды.
2. *Ассамблея құрамына жаңа мүшелерді қабылдау*
3. *Қазақстан халқы Ассамблеясы мүшесінің куәліктері мен «Қазақстан халқы Ассамблеясына 30 жыл» мерекелік медальдерін табыстау*
Осы сұрақтар бойынша сөз облыстық ішкі саясат басқармасының басшысы Ерік Әзілжанұлы Абитовке берілді. Ол Ассамблея жұмысының бағыттарын атап өтіп, жаңа мүшелердің қосылуы мен марапатталған азаматтардың ел бірлігін сақтау жолындағы үлесін ерекше атап өтті.
Жиын барысында Ассамблеяның 35 белсенді мүшесіне арнайы куәліктер мен мерекелік медальдер табысталды. Бұл марапат – олардың елдегі бейбітшілік пен татулықты сақтауға қосқан үлесінің айғағы.
Кеңес мүшесі, қоғам қайраткері Асылы Әлиқызы Осман өз сөзінде Ассамблеяның қоғамдағы бірлік пен келісім жолындағы орны мен рөліне ерекше тоқталып, алдағы уақытта да бұл институттың ел игілігі үшін қызмет ететініне сенім білдірді.
Отырыс соңында Кеңес төрағасы Марат Сұлтанғазиев барлық қатысушыларға алғыс айтып, Ассамблеяның жаңа кезеңдегі міндеттерін атап өтті. Ол Ассамблеяның бейбітшілік пен тұрақтылықтың тірегі ретінде одан әрі де табысты қызмет ете беретініне сенім білдірді.
