Көк туды желбіреткен жеті жасар әлем чемпионы
Қазақ елінің көк туын желбіреткен споршыларымыз жетіп артылады. Спорттың қай түрімен айналысаң да жігерің ұшқын оттай жалындап, шыныққан шымыр денеңмен қайратың тасып тұруы керек.
«Қуаншты бөліссең көбейеді» демекші құлағымызға жеткен жеңіс үні теңізді жағалаудан естілген хабар, құлаққа жағымды естіліп, жоғымыз толығып түгелденгей күй кешкеніміз рас. «Жақсы сөз жарым ырыс» демекші көгілдір экраннан көзіміз көргенен соң көңіл шіркін қобалжуын қойып, жүрегіңе жылылық үміті жылт етіп алға қарай аяқ бассаң атталып жүргің келіп тұрады. Қазақ елі үшін қуаныштан бөркін аспанға ататын қуанышты күн десек жаңылыса қоймаймыз – ау. Жақында Араб әмірлігінде өткен самбодан ДЖИУ -ДЖИСУ бойынша дүние жүзілік фестивалі АБУ ДАБИ чемпионатына Қазақстаннан он бес бала жолдама алып, өз күштерін сынамаққа аттанған болатын. Олардың бәрі спорттың дәмін татқан тәжірибелі саңлақтар үшін, ұзақ жыл жаттығып, ыстығы мен суығын сезінген спортшылар дегенге келмейтін бүлдіршіндер еді. Олардың жасы жеті мен сегіздің арасындағы көктемде алғаш шыққан бәйшешек гүлге ұқсаған бүлдіршіндер болатын. Баласы атқа мінсе, анасы үйде отырып тақымын қысады демекші намысы мен жігерін жанып тыпыршыйтыны шындық. Бірақ біздің болашағымыз дейтін сенімге селкеу түсірмей, құдды бір талай жыл шеберлігін шыңдаған шебердей намысты қолдан бермегендері бізді қуантты. Спорт кез – келгеннің айналыса салатын әшейінгі ермегі емес. Кезінде Кеген ауданы, Ақтасты ауылынан шыққан Айсара Керімбекова деген қарындасымыз Әлемнің екі дүркін, Азияның бір неше дүркін, қыздардың арасынан алғашқылардың бірі болып, дзюдо – самбо күресінен чемпион атанғанда, қуанғанымыздан бөркімізді аспанға лақтырып, мәз болған едік. Ол күн әлі есімізден ұмытыла қоймады.
Командалық жолда Қазақстан республикасы 2-ші орынды қанжығасына байлап, көк байрақты көгімізде желбіретті. Теледидардан Абжан Әл-Фарабидің жеңісін көріп қуаныштан тағы да жанарымызға жас алдық, жеңісің құтты болсын балапанымыз!
Әл-Фараби 2017 жылы тамыздың он бірінші жұлдызында Алматы шаһарында өмірге келген. Әкесі Ілиясов Манас Райымбек ауданы Сарыбастау ауылының тумасы, анасы Байсабаева Майнұр Сағатқызы Кеген ауданы Ақтасты ауылының тумасы. Байсабаева Майнұр алты баланы дүниеге әкелген «алтын алқа» иегері. Әкесі Ілиясов Манас спортқа жаны құмар ұл – қызына «Мен жетпеген биіктерге сендер жетіңдер»,- деген ұстанымдағы жылы жүректі әке. Қазіргі уақытта Абжан Әл-Фараби Алматы қаласындағы Шаңырақ-2 ықшам ауданындағы № 26 орта мектептің екінші сыныбында оқу озаты. Шаңырақ-2 ықшам ауданындағы «Арал» спорт мектебіне әкесі Манас үш жарым жасында жаттықтырушысы, тәлімгері Жәйшібеков Мәдиге табыстаған. Тәлімгер Жәйшібеков Мәди Кеген ауданы, Қарқара ауылының тумасы. Мектептегі сынып жетекшісі ұстазы Жылқыбаева Жанат Бақтыбекқызы Әл-Фараби сыныпта мінезі жайдарлы, оқу озаты екенін айтты. Енді әлем чемпионы аталып көк байрақты көгімізде желбіреткен Әл-Фарабиге нағашы ағасы Байсабаев Нұрболат пен Нұрғанат әлем чемпионы атанған жиеніне жеңісімен құттықтап астына ат мінгізді. Жаттықтырушы Жәйшібеков Мәди тәлімгеріне иығына шапан жауып, ақшалай сыйлық табыс етті. Жеңіспен оралған барлық чемпиондарды Алматы әуежайында әуезді әнмен қарсы алып, барлығына оқуда озат, спортта саңлақ қазақ елінің көк байрағын көкте желбірете беріңдер деген ақ бата мен ізгі тілектер жеңімпаз чемпиондардың көңіл қошын көкке көтерді. Ақ жарма ақ көңілдері мен әкелік, ағалық, аналық тілектерін жаудырған Әл-Фарабидің туыстары, нағашылары ыстық ықыластарын білдірді. Жұмабай Дәурен, Қожалімов Бақыт, Жұмабай Рауан, Смағұлов Сабазжан, Думан Абрахман, Сабазжанұлы Дастан жанашырлық ақ тілеу мен отырған Қуаныш Нұрболатұлы қазақ елі атынан Абжан Әл-Фарабиге саулық, спортшыларға жеңіс туын көк аспанымызда желбірете беріңдер деген ізгі тілектері мен ақ баталарын берді.
Абжан Әл-Фараби баламызға Кеген ауданы мен көршілес жатқан Райымбек ауданы халқының атын зор денсаулық, ата-анаңның сүйкімді де, ақылды ұлы болып, әлемнің бірнеше дүркін чемпионы атанып қазақ елінің ойшыл, білім қуған азаматы болуыңа «Қарқара» газетінің барша оқырмандарының атынан шын жүректен тағыда жеңісің құтты болсын деген ақ батамыз бен ізгі тілегімізді білдіреміз.
Нұрболат Тастанқұлов.
