МӘДЕНИЕТ ХАЛЫҚТЫҢ РУХАНИ МҰРАСЫ
Мәдениет – халықтың рухани байлығы мен өмір сүру салтын айқындайтын маңызды құндылықтардың бірі. Ол тек бүгінгі күннің емес, ғасырлар бойы қалыптасқан рухани мұраның бір бөлігі. Жылысай ауылдық Мәдениет үйі де осы құндылықтарды дәріптеуде және ауыл тұрғындарының рухани қажеттіліктерін қанағаттандыруда маңызды рөл атқарады. Мәдениет үйі аудандық мәдениет үйінің бекіткен жылдық жоспарға сай, ауылда іс-шаралар өткізіп, халыққа мерекелік көңіл-күй сыйлауды басты міндеттерінің бірі етіп келеді. Мұндағы өнерпаздар аудандық деңгейдегі түрлі байқауларға қатысып, өнерлерін паш етіп, жүлделі орындарға ие боллып келді.
Жылысай ауылдық мәдениет үйінің басты мақтанышы – ауыл тұрғындарының өнерге деген сүйіспеншілігі мен белсенділігін дамыту.
Ауылымызда мәдениет пен өнерді дәріптеп, өнерімен халықтың көңілінен шығып жүрген шығармашылық топтар мен талантты жастар саны артып келеді.
Кеген ауданының 90 жылдық мерейтойында жас әнші Дәурен Әнуарбек «Мәдениет музасы» медалімен марапатталды. Жас дарынды әншінің жеке авторлық әндері жарыққа шығып жүр. Осындай талантты жастардың шығуы ауылымыздың да мәртебесі. Сонымен қатар, ауылымыздың талантты музыканты Ермек Баққожаұлы домбырашы шәкірттерді тәрбиелеп, олардың ұлттық өнерге деген сүйіспеншілігін оятуына үлес қосты.
Өнер жанашыры Таубалдиев Болат Әбікенұлы – Райымбек ауданының «Құрметті азаматы» және Жылысай ауылдық ақсақалдар алқасының төрағасы, ауылдың мәдени дамуына зор үлес қосып келе жатқан тұлға. Ол жастайынан ауылдың өсіп-өркендеуіне атсалысып, Әлмерек бабамыздың рухани мұраларын насихаттауды жалғастырып келеді. Сонымен қатар, Болат Әбікенұлы – «Елдей – Жайық» толғауының авторы, баян мен домбырада қатар өнер көрсететін дарынды әнші. Шығармашылық жолы ауыл тұрғындарына рухани азық беріп, ұлттық өнерді дәріптеуге бағытталған.
«Ауылым әнім» деп Әншілік шеберлігін танытып жүрген ауыл азаматтары Сауыт Байболов, Есенаман Намазбаев, Қобыланды Бітейов, Амантай Аблақитов, Нұрқанат Мәнкеев, Дархан Жұмабеков, Нұрболат Нүсіпбеков, Құралбек Әлдибеков, Дәурен Иманбеков, Ернат Бақаев бар. Бұл азаматтар ауылдың мәдени өмірінде белсенділік танытып, ауыл тұрғындарына мерекелік көңіл-күй сыйлап келеді.
Ауылымыздың мәдени өміріне үлес қосып жүрген өнерпаздардың бірі – «Асыл әжелер» ансамблі. Мәдениет үйіндегі концерттер мен мерекелік кештердің сәнін келтіріп жүрген ансамбльдің жетекшісі – Мадина Сыдықжанова, ансамбль мүшелері музыкант-Бақытгүл Қасенова, Баян Тойжанова, Забира Баялиева, Ғалия Қозекейева, Зинахан Заманбекова, Жұмакүл Сейтбекова, Гүлбақыт Күмісбекова, Нұргүл Жексенбиева, Күлиза Байсейітова, Бағлан Аубакирова, Әсем Сүлейменова. Ауылдық және аудандық іс-шараларға қатысып, ұлттық өнерді дәріптеп, халықтың ықыласына бөленуде. Жақында осы ансамбль аудандық «Ауылым – алтын бесігім» байқауында «Әжелер тобы» номинациясының жеңімпазы атанып, лайықты марапат – дипломға ие болды. Бұл марапат ауылымыздағы мәдениеттің, соның ішінде ұлттық өнерге деген сүйіспеншіліктің көрсеткіші болып отыр.
М.Орманов атындағы орта мектеп оқушыларының қатысуымен құрылған «Ерке қыз» бишілер тобы да ауыл мәдениетінің сәнін келтіріп, ерекше орнын айқындап жүр. Топ жетекшісі Искра Өскенбайқызы балалардың өнерге деген қызығушылығын арттырып, шығармашылық дамуына жағдай жасап келеді. Топ құрамындағы Қуандық Інжу, Сауыт Іңкәр, Тәсі Жанел, Шөкен Инабат, Рауанқызы Айнұр, Дүйсехан Асыл, Талғарбек Толғанай, Мәдіш Ақнұр, Нұрбақытқызы Кәусар, Нұртас Аяна, Совет Айжұлдыз, Тойғанбек Нұрай, Бисембай Жансая сынды жас бишілер аудандық және ауылдық мәдени шараларда би билеп, халықтың ықыласына бөленуде. Осы дарынды қыздарымыз облыстық, аудандық байқауларға қатысып, жүлделі орындарға ие болып жүр.
Мектепте Роза Усманованың жетекшілігімен жұмыс жасайтын домбырашылар үйірмесі ауыл балаларының ұлттық өнерге деген махаббатын оятып келеді. Ол балаларға домбыра шертуді үйретіп, мектептегі концерттерде өнер көрсетуіне ықпал етуде. Осы еңбегі үшін Роза ұстазға ауыл тұрғындары зор алғыс білдіреді және оның өнерлі шәкірттерінің жетістіктерін мақтан тұтады.
Ауылымыздың өнерлі келіндері де көптеген мәдени шараларға қатысып, ауыл өмірінің сәнін келтіруде. Олардың ішінде әншілік шеберліктерімен танылған Гүлжанат Түбекбаева, Арай Солтанбекова, Арай Керімбаева мерекелердің көркін ашып, жұртшылықтың ықыласына бөленуде.
Ауылымыздың мықты жігіттері де түрлі байқауларға қатысып, өздерінің шеберліктерін дәлелдеп жүр. Мысалы, Нұралы Нұрланұлы «Жігіт жампозы – 2024» аудандық байқауына қатысып, ІІ орынды иеленді. Сондай-ақ, «Ақ келін» байқауында ауылымыздан Ұлдана Алимпияева қатысып, «Өнерлі келін» номинациясын жеңіп алды. Жас буын да өнерлерімен қуантады. «Балауса 2024» өнерлі балалар байқауында «Ерке наз» бишілер тобы және эстрадалық номинация бойынша Илянура Садық, Ақнұр мен Аянат «Бипыл» биін билеп, көрермендерге ұмытылмас әсер сыйлады. Сонымен қатар, домбырашылар – Асылай Сұлтан, Нұрай Кеңесжан, Іңкар Қасымқан, Исманұр Дәулеталы да байқауда тамаша өнер көрсетті.
Жаз айларында өтетін дәстүрлі «Қымыз мұрындық» тойында ауылымыздың ұлттық дәстүрлерін жаңғыртып жүрген Сәуле, Фариза, Ақерке, Қымбат өз қолөнер туындыларын көпшілікке таныстырды. Олардың арқасында ауылымыздағы ұлттық мәдениет сақталып, жас ұрпаққа үлгі болуда.
Бұл аталып өткен жеңімпаздар – тек биылғы жетістіктердің бір бөлігі ғана. Алдағы уақытта ауылымыздағы өнерпаздар мен талантты жастар жаңа белестерді бағындырады деген сенімдеміз.
Ауылымыздағы мекеме басшылары мен қоғамдық ұйымдар да мерекелер мен іс-шаралардың өтуіне үлкен қолдау көрсетіп келеді. Ауыл әкімі Қайрат Нарынбаев, Қаламқас Сахметова, Жарқынгүл Шойтанова, Ақмарал Қозыбаева, Дархан Масенов, Баян Тойжанова, Алмат Әуезбеков сияқты азаматтарымыз бар.
Бүгінгі таңда ауылымыздың мәдени дамуына байланысты үлкен жаңалықтардың бірі – жаңа екі қабатты мәдениет үйінің құрылысы қарқында салынуда. Бұл ғимарат – тек көркемдік шаралардың емес, сонымен қатар жастардың бос уақытын тиімді өткізуге бағытталған әртүрлі үйірмелер мен іс-шаралардың орталығы болады деп күтілуде. Жаңа ғимаратта кітапхана ашылып, көркем өнер мен мәдениетке қызығатын жастар үшін түрлі үйірмелер жұмыс істейді.
Мәдениет үйінің меңгерушісі Жантаев Дулат Садықұлы ауылдың мәдени өмірінде үлкен орын алатын мерекелер мен шаралардың ұйымдастырушы болып аядай ауылдың өнерін басқарып келеді. 15 жылдан астам уақыт бойы мәдениет саласында үздіксіз еңбек етіп, түрлі алғыс хаттар мен марапаттарға ие болды.
Мәдениет үйіндегі шараларды ұйымдастыруда көркемдік жетекшілердің еңбегі зор. Мәдениет үйінде көркемдік жетекші болып жұмыс жасаған Күлшат Жансерік пен Ақгүл Сакенайдың атқарған жұмыстарын ерекше бағалауға болады. Музыкалық шығармаларды таңдап, концерттердің сценарийін жазып, өнерпаздардың дайындықтарын үйлестіруіне ат салысты. Шығармашылық топтарды құрып, ауылдық, аудандық байқауларда ауыл намысын қорғайтын үміткерлерді дайындады.
Ауылымызда өнерге құштар жандар көп болғанымен, олардың барлығы кәсіби әртістер емес. Көркемдік жетекшілер әр адаммен жеке тіл табысып, олардың қабілеттерін дамытуға көп күш салады. Бұл да – үлкен еңбекті талап ететін жұмыс.
Алдағы уақытта ауылымыздың мәдениетінің дамуына бағытталған жұмыстар жалғаса бермек. Жаңа мәдениет үйі ауыл тұрғындарына рухани байлық сыйлап, жас ұрпақтың мәдениет пен өнерге деген қызығушылығын арттыруда үлкен рөл атқарады деп сенеміз. Ауылымыздың барлық тұрғындары мәдениетімізді дамытуға үлес қосып, рухани жәдігерлерімізді ұрпақтан-ұрпаққа жеткізу ісінде белсенділік танытуы тиіс.
Дулат Жантаев,
Жылысай мәдениет үйінің меңгерушісі.
