Көрерменді ықыласқа бөледі
Жуырда аудандық мәдениет үйінде жерлесіміз ақын, Жазушылар Одағының мүшесі, аудармашы Алмат Исәділмен «Аспантауға сәлем!» атты кездесу өтті. Алғаш рет ақынымен кездескен жұрты ақынын төрге оздырып жырдан шашу шашып, әсерлі кештің куәсі болды. Ең алдымен ақын Алмат Исәділ өзі оқыған С.Серкебаев атындағы мектеп- гимназиясына ат басын бұрып, оқушылармен кездесті. Ақынның өлеңдерін жатқа айтқан оқушылар көкейде жүрген сұрақтарын қойып, жерлес ақын ағаларымен сыр- сұхбат құрды.
Аудан әкімі Нұрбақыт Теңізбаевтың ұйытқы болуымен мәдениет үйінде өткен әсерлі кеш, аудан халқына рухани азық сыйлады. Жырға сусып қалған көрермен бір марқайып, жыр әлемінен сусын қандырғандай болды. Ақынын ұлықтаған ел, жыр жауһарларынан жаһұт теріп, өнер өлкесіне қанат қақты. Аудан әкімі Нұрбақыт Теңізбаев ақынын ардақтап, ізгі ниетін білдіріп, қазақы тәмсілмен ақынның иығына шапан жауып, сый-сыяпат табыс етті. Жырдан шашу шашылып, ән көгінде қалықтаған кеште ақынның «Кеңістік» жыр жинағының тұсауы кесіліп, оқырманына жол тартты. Жыр кешінде ақынның сиясы кеппеген жыр жинағын қаламдас бауыры, «Абай» баспасының директоры ақын, жазушы Ақберен Елгезек демеушілік жасап, тарту ретінде жарыққа шыққанын ақын тілге тиек етіп, алғысын білдірді. Сондай-ақ, ақынның қызмет етіп отырған Әл-Фараби атындағы Қазақ Ұлттық университетінің Басқарма төрағасы- редактор Жансейіт Түймебаевтың, ҚазҰУ Ақпарат және коммуникациялар департаментінің директоры Қаншайым Байдәулеттің ұжымы атынан ыстық ықылас сәлемі дүйім жұрттың алдында оқылып, сахна төрінде ақынға табыс етілді.
Өз кезегінде ел ағасы ақын әрі ұстазы Шерізат Мекебаев, Қазақстанның еңбек сіңірген қайраткері, қазақ театр өнерінің майталманы Бекжан Тұрыс ақынның жыр кешінде ақжарма тілектерін білідіріп, өнер өлкесінде қанатың тек биікке самғасын деді. Еркін шығармашылық форматта өткен жыр кешін әнмен көркемдеп, көрерменге көңіл сыйлаған эстрада жұлдызы әнші Ұлту Қабаева, ұстаз- ғалым Мұхтар Байбатшанов, дәстүрлі әнші композитор Қанат Әмірханов ел көңілін көтеріп, ән көгінде қалықтатты.
Жанға жылу, көңілге медет болған жыр кеші рухани мол азық сыйлап, көрерменді ықыласқа бөледі. «Ерім деген ел болмаса, елім деген ер қайдан болсын»,- демекші ел қанатында қалықтап, елдің туын ән қанаты мен жыр қанатында қалықтатып жүрген ақын ерлерін ел ұлықтамаса кім ұлықтар? Елдің ерлігі мен бірлігін жырға бөккен ақынын төріне оздырып, қасиеттеп, құрметтеу ол елдің мәдениетінің бір парасы болмақ. Сондай ізгілікті, ізеттілікті жанға жалау еткен аудан әкімі мен ел жұрты алда да осындай игілікке бастар, ауылдан шыққан майталмандарын ұлықтар кеш өз жалғасын табады деп сенеміз.
Лаура Мұхаметқали,
Фото Дәурен Ермекбай.
