Ауылым – алтын бесігім

Үстіміздегі жылдың 30 қыркүйек – 4 қазан аралығында мәдениет күндері аталып өтуіне орай аудандық мәдениет үйінде «Ауылым -алтын бесігім» атты аудандық мәдениет күндерінің байқауы өтті. Аудандық мәдениет үйінің директоры Ернат Ысқақ сөз сөйлеп, барша өнерпаздарға сәттілік тіледі. Байқауға әр округтен келген әжелер ансанбілі, өнерлі жастар топтастырылып, тақырып аясында өнерлерін ортаға салды. Байқаудың негізгі мақсаты ауданның өзіне тән мәдениетін өркендету, таныту, рухани білімділік пен мәдениетті байланыстыра отырып, аудан мәдениетін жаңғырту, мәдени өрлеу мен жаңаша өмір жетістіктерін таныстыру, ұлттық өнерді дәріптеу. Мәдениет күндерінің шарықтау шегі аудан көлемінде түбегейлі өзгерісін, дарынды жеке тұлғалардың есімдерін анықтау және оларды насихаттау, туған жердегі тұлғаларды насихаттауды көздейді.
Байқаудың шымылдығын ашып, «Өнерін ел таныған жұмақ өлке» тақырыбында мәдениет үйінің кіре беріс залында қойылған әр округ өнерпаздарының қолөнер бұйымдары мен ұлттық салт-дәстүрді дәріптер құндылықтар, қолөнер бұйымдары, шеберлер мен суретшілер туындылары, ұлттық тағамдар қойылған көрме ұсынылды.
Байқаудың алғаш шымылдығын ашып, өз өнерлерін ортаға салған Ұзынбұлақ ауылдық мәдениет үйінің өнерпаздары көрерменге бағдарламасын ұсынды.
О, туған жер, кең пейіл, құшағың кең,
Саған көңіл бұлқынар күш ағынмен.
Сағынышты қанат қып, саған қарай,
Балапандай талпынып ұшамын мен, – деп бастаған жүргізушілердің жүрек жарды сөзімен өнерпаздары шабыттанып сахна төрінен орын алып, бар өнерлерін ортаға салды.
Көгінде күн нұрын төккен,
Жерінде гүл жұпар сепкен.
Неткен сұлу, неткен көркем,
Осы менің туған өлкем,- дей келе «Ауылға сағыныш» атты халық әнін «Тұмар» әжелер тобы шырқап, көрермен өткенге бір сәт оралтқандай күй кешті. Ақиық ақын Мұқағалидың сөзіне жазылған «Қарасаздың шыбығын жел тербеген» әнін Серік Жалтаңбаевтың сүйемелдеуімен вокал тобы орындап шықты. Шығармашылық байқаудың әр нөмірін ауылдың берекетіне ұйыстырған Ұзынбұлақ ауылдық мәдениет үйінің өнерпаздары, қазақи нақышты жалау етіп, бойға жиған өнердің қайнар бұлағы ауылдың қасиетінен дарығанын көрсете білді. Бұл дегеніміз ел мәдениеті ауылдан бастау алады деген сөз. Ел бірлігі ұйысып, көңіл көкжиегі өнермен ұштасса мәдениеттің ошағы осы емес па?
Өз кезегінде аулының құндылығын, оның мәдениеті мен салт-дәстүрін дәріптеуді мақсат тұтқан Жылысай ауылдық мәдениет үйінің өнерпаздары ауыл – әрбір адамның жүрегіндегі қасиетті мекен екенін тілге тиек етті.
Сағи Жиенбаевтың сөзіне жазылған «Айналдым елім» әнін әуелете шырқаған «Жылысай» әжелер ансамбілі көптің көңіліне демеу сыйлады. Ауыл- әр адамның ата-тегінің бесігі, арқа сүйері, балалық шақтың мекені. Атамекенге деген махаббат, Атамекенге деген сағыныш ауылдан бастау алатынын жүрекпен сезіндіргендей болды. Мұхтар Шахановтың «Арман» атты туындысын Айнұр Рауанқызы оқыса, «Ерке наз» би тобы биден шашу шашты.
Туған жердің топырағы да ауасы да ерекше. Ауылдағы ағайынның арасындағы татулық пен ынтымақтастық ауылдың ең басты байлығы екенін негізге ала отырып, өнерден ауыл халқы шеттемес екендігін дәріптеп, өнер өлкесінде қалықтаған өнерпаздар арқаланып, өнерлерін паш етті. Көңілге ой, санаға серпін беріп, Сұлухан Үмбеталиева «Қариялар» атты термесін қолына домбыра алып әуелетсе, Қазақ биі «Қамажай» биін мың бұрала билеп, Мәдіш Ақнұр «Ризамын» әнін әуелетіп көрермен көзайымына айналды.
Тұйық ауылдық округі мәдениет үйінің өнерпаздары «Тау ішінде» С.Сейфуллиннің әнін Сәрсенбаев Еркінбек орындаса, «Абырой» атты Бектұр Мақсұтқанұлының термесін Жанболат Сұлтанұлы, «Менің әжем дара» әнін Әубәкір Ақбаян әуелетті. Өз мәдениеті мен өнерін ұштастыра отырып, ел бірлігінің бекемдігін, ауыл мәдениетінің беріктігін әнге арқау еткен майталмандар жүрек төріндегі елге, туған жерге деген ілтипатын әнмен әуелеткендей.
Өз кезегінде Бөлексаз аулдық мәдениет үйінің өнерпаздары «Жастар» халық күйін оркестр орындаса, «Гүлдер ай» би тобы «Қара жорға» Халық биін мың бұрала билеп, Үміт Медеуованың «Домбыра болып сөйледім» әнін Кәден Гүлзат шырқаса, Шал Ақынның «Жігіттерге өсиет» термесін Нұрқалиева Мөлдір орындап, қазақы өнердің өзіндік соқпағы мен әуезін келтіре, өнердің өрелі биігін танытқандай болды.
«Халқым менің!
Айбарым асқақтаған алтын кенім!», деп өнерін халықпен біте қайнастырған Тасашы ауылдық мәдениет үйінің өнерпаздары «Тасашы таулы – құт мекен!» атты мерекелік бағдарлама аясында төмендегідей өнерлерін паш етті. «Аруана» әжелер ансамблі «Тасашы таулы құт мекен!» Жақсылық Абдрамановтың әніне жазылған ел мен жердің тынысы мен тіршілігін айшықтар ауыл халықының ұранына айналған әуенді қалықтатса, Латиф Хамидидің әні «Бұлбұл» әнін облыстық Жетісу жұлдыздар байқауының бас жүлдегері ауданымыздың жас әншісі Тасашы мәдениет үйінің жанына құрылған вокал үйірмесінің жетекшісі Өзекбаева Таңшолпан нақышына келтіре орындап, ел көңілінен орын алды. «Майлықожаның термесін» Төребаева Адай, халық әні «Сәулем-ай» Бақыт Халықова орындап, құлақ құрышын қандырса, «Балауса» бишілер тобы «Шабыт» биін мың бұрала билеп, әсем бидің ырғағында көрерменді би әлеміне жетеледі. «Туған ел» әнін вокалдық топ орындап жанға жылу сыйлады. «Жігіттер» тобы «Өз елім» әнін әуелеткенде еліне деген ықыластың көрік беріп, әнмен қоса әуенге еліткен көрермендер еліміздің еркіндігін, тәуелсіздіктің теңдессіз екендігі, бақыттың мекені туған жер екендігіне жан жадырап, көңіл марқайды.
Өз мәресіне жетіп аудандық мәдениет үйінің сахнасын туған жерге деген махаббатпен салтанат құрған мерекелік кеш көптің көңіліне ыстық ықылас орнатып, туған жерге деген ішкі сезімін одан әрі жандандырғандай болды.
Өз жері мен өз елінің ырысы мен ынтымағын әуезді ән мен сырға толы жыр жолдарына арқау еткен өнерпаздардың жүрек жарды сөздері мен әуезді әндері жүректерді тербетті десек болар. Көңіл қанатын қатайтып, жанға шуақ сепкен кештің соңында сөз алған әділ қазылар алқасының мүшесі, аудандық мәдниет үйінің режиссеры Аршын Нұрбақыт: «байқаудың шарты–ауылымыздың тегіс мәдениеті мен өнерін ұштастыра отырып, ел бірлігінің қайнар көзі ұйыған ауылдың мәдениетін көрсету, бірлігін дарыту, өнерін паш етеуді көздейді. «Ел іші алтын қазына»-, дейді сондықтанда ауылдың мәдениетінен асқан мәдениет жоқ. Өз ауылыңыздың ерекшелігі мен біртұтастығын шығармашылыққа арқау ете отырып, дәріптеуді негізге алған байқау болуы шарт», екенін тілге тиек етті. Сондай-ақ, байқаудың қорытындысы, марапаттау рәсімі 9 қазан күні өтетін гала концертте айқындалып, жеңіске жеткен округтер мен жеке дара өнерпаздар номинация арқылы марапатталатын болады деді.

Бірлік пен бекемдікті, ынтымақ пен ырысты өз дәрежесінен аласартпай биігінде бекемдер – ел мәдениеті екенін ұмытпайық!
Бірлігіміз артып, мәдениетіміз тұғырынан алсармасын!