Жұлдызы жарық Жұлдыз
Адамға талант тумысынан беріледі,- дейді. Десе де сол бойға тұнған талантты тұншықтырып алмай дамыту адамның білімі мен ізденісіне тікелей байланысты. Үнемі талпыныс үстінде жүретін бойға біткен талантын шығармашылықпен шыңдап жүрген аудандық мәдениет үйінде майталман мамандар көп ақ. Олай дейтініміздің өзіндік себебі бар. Сахна сыртында біз білмейтін қаншама мамандар жұмыс істеп келеді. Тек сахнаға шығып өнер көрсеткен әртістерден басқа да көрермен залынан бөлек кейіпкердің келбетін әрлеп, кейіпін келтіретін, тіпті дыбысты бақылауда ұстап отыратын, басқа да көзге көріне бермес мамандар жетерлік. Соның бірі аудандық мәдениет үйінде біз көріп, көзайым болып жүрген сахналық көріністердің кейіпін айна қатесіз сенімімізге ендіре отырып, көркемдеп, тіпті әртістің үстіндегі кейіпкерге сай киімінің әрленіуіне бар ынта-жігерін салып келе жатқан Әсет Жұлдызды бірі білсе, біріміз біле бермейміз. Өйткені ішкі жұмыстың көзге көріне бермейтіні, сахнадан тыс тынымсыз, тіршіліктің ышқыны көрерменге сезіле бермейтіні тағы бар. Осы тұста сол бір кейіпкерлердің көпке таныла бермес қырлары мен мүлтіксіз атқарып жатқан ісіне аз кем тоқталмақпыз. Жоғарыда атап өткен Жұлдыз қыздарыңыз үнемі көңіл көзайымы болып, сахнада жалтырап жүрген әртістерімізді өзіндік образына сай кескін кейіпін ойып алғандай дәлдікпен кескіндеп беріп отырған дизайнер. Әсет Жұлдыз аудандық мәдениет үйінде 10 жылдан аса театр әртістерінің қойылымдық костюмдерін, бет бейнесін гримдеп, әрлеп келеді. Біз күткен кейіпті жанар сенетіндей дәрежеге жеткізіп, жасты кәрі етіп, соғыс жылдарындағы жаралы солдатты да грим арқылы бейнесін сомдау осы майталман маманның еткен еңбегінің жемісі десек болар.
Әсет Жұлдыз 2008 жылы Т. Жүргенов атындағы Ұлттық өнер академиясының «Театр» факультетіне қабылданып, аталған оқу орынын 2013 жылы тәмамдап, театр және кино ТВ дизайнері мамандығын алып шыққан. 2013-2014 жылдары «Ерке Нұр» ұлттық компаниясында суретші-үйлестіруші болып жұмыс атқарған. 2014 жылдан бері бүгінгі таңға дейін Кеген халық театрында дизайнер және гримшы болып, әртістерінің кейіпін келістіріп, бет бейнесін кейіпкердің болмысына қарай көркемдеп сахнаға ұсынуда. Сонымен қоса әр қойылымға жоғарыдағы айтқандай бейнесін әрлеп қана қоймай, киімін де келістіріп, өлшеп-пішіп тігеді. Осындай шеберліктің шыңын бағындырған кейіпкерлерін түрлі бағытта ойнатып жүрген Жұлдыздың тағы бір қырына қанық болдық. Ол сурет өнері. Жұлдыз тек дизайнер емес, сонымен қоса, қылқалам иегері де болып шықты. Мәдениет үйіне бас сұққанымызда кереге жайлай түрлі бағытта салынған суреттерді көзіміз шалып қалды. Сол көзге оттай басылған туындылардың иесі де осы дизайнер қыз болып шықты. «Ол меннің хоббиім»,-деп күле жауап берген Жұлдыздың тағы бір жұлдызының жарық екеніне көзіміз жетті.
Себебі, жүректен шыққан туынды бұл картинкалар өз қиялын іске асыра отырып, сурет салу өнерінің түрлі бағытында орын алған туындыларға қарап тамсандық. Гипс арқылы салынған «Қозы ерткен қыз» бейнесі шынайылыққа негізделіп, бар болмысын аша түскендей. Қыл қалам иесінің айтуы бойынша бұл туынды Қастеев сурет мұражайында орын тепкен екен. Әрине, бұл деген суретші үшін үлкен олжамен тең. Жұлдыз Әсетқызының біз бағамдап қалған екінші мамандығы суретші екен. 2006 жылы Қытай Халық республикасындағы Іле педагогикалық институты «Көркем өнер» факультетінде сурет мамандығын алып шыққан. Бір-біріне сәйкес екі мамандық бір арнада біте қайнасып, театр өнерінде өзіндік соқпағын салып келеді. Бәсе деймін да, суреттен қыр жоқ адам қалай ғана адам бейнесінің келбетін өзгертіп, дәлме дәл кейіпкерді сомдай алар еді ау.. Сөйтсек қос қанатын теппе – теңдікте ұстап келе жатқан дизайнер, гримдеуші, суретші қыздарыңыз шеберлігімен талайды тамсантып келеді екен. Сонымен қоса графикалық жұмыс, яғни нүкте арқылы сурет салуда суретшінің шеберлігінің бір көрінісі. Түрлі бағытта қыл қаламды жанына серік еткен Жұлдыз Әсетқызының өнері бір басына жетерлік екен.
Жолдасы екеуі төрт бала тәрбиелеп отырған үлгілі отбасы. Жолдасы Нұрбақыт Аршын аудандық мәдениет үйінде режиссер болып жұмыс істейді. Отбасымен өнерге жақын жандардың таланты тәрбиелеп отырған ұрпағының бойына дарымасына кім кепіл? Өнерге біртабан жақын отбасының әр күні мерекеге, шуаққа толы болар деп сенеміз. Жаны нәзік, жүрегі кең Жұлдыздың өмірлік жолдасын да аудан жұрты жақсы біледі десек қателеспейміз. Аршынның да бойға жиған таланты мен талабы бір басына жетерлік ақ.. Өлең өлкесінде қалықтап, жыр жолдарын тебірене оқығанда сөз мәйегі жүректі тебірентіп, жанға шуақ себері сөзсіз.
Қос жұлдыздың шаңырағына биік мәртебе, лайым жақсылық, отбасына амандық тіледік.
