Көктен шуағын төккен күн нұры төгіліп, көк аспанда түйір бұлт болмады. Ертеңгілік мезгілде аяғын асыға басқан бүлдіршіндер ата – анасы, жетегіндегі болашағынан үміт күттірген балапандарын жетелеп, «Балауса» бөбекжай балалар бақшасына асығып жатқаны байқалады. Ауласына аяқ басқаныңызда аңқыған ал қызыл гүлдері, тал – терегі тамылжыған балалар патшалығы кімді болсада бұл көрініс көңіл күйін көкжиекке көтерері анық. Қарбалас шақты бастарынан күнделікті өткізетін балабақша тәрбиешілері әр топпен тиімді жұмыс жасауда аянбай жүргендерін байқайсыз. «Балауса» бөбекжай балалар бақшасындағы тіл мерекесіне арналған «Ана тілім – Айбыным» атты бүлдіршіндер байқауына Кеген аудандық білім бөлімінің әдіскерлері Нұргүл Сәрсенбайқызы, Әйкен Нұрзатқызы мен баспасөз қызметкерлері және ата – аналар қатысты. Ертеңгіліктің ашылу салтанатын «Татулықта күшіміз» әнімен «Күншуақ» тобының бүлдіршіндері Айлин мен Алинұрдың орындалуында шымылдық пердесі ашылды. Байқауға «Көгершін» ортаңғы тобы Бақыт Райымбек, Шәкен Асылым, «Қызғалдақ» ортаңғы тобынан Рауан Ұланұлы, Нұрдәулет Нұрәли, «Күншуақ» тобынан Болат Бегайым, Марат Медина, Жұмахат Айлин, «Еркетай» мен «Айгөлек», «Балбөбек» және «Санаторлық» ересек тобынан Әбілжан Айғаным, Нұрақын Айзере, Тоқтасын Асылжан, Талғат Айкөркем, Төлеген Аяла, Қонақбай Мусилима, Қуанышбек Нурикамал өз өнерлерін ортаға салды. Сазды әуенмен әрленген кішкентай бишілер би билеп, әр тақырыпта бүлдіршіндер тіл туралы көркемсөз оқыды. Мағжан Жұмабаев атамыз «Тіл адамның тілмашы, тіл кем болса, адамның кем болғаны» деген екен. Ана тілімен тәрбиеленген бүлдіршіндер қазақ тіліндегі тіл туралы ақын аталары жазып қалдырған өлеңдер мен дана сөздерді бүкпесіз ортаға салуы өнегенің дәл өзі дер едім. Дана халқымыз «Тілден асқан байлық жоқ» – деп бекерге айтпаса керек. Тон – торқа, мал – мүлік, алтын – күміс байлығы түпкілікті емес. Күндер жылдар өткен сайын сарқылады, тозады. Халқымызбен бірге мәңгі жасайтын тіл екенін ұмытпағанымыз жөн. Балдырғандар байқауында ана тіліміздің мәртебесін кішкентай бүлдіршіндеріміз тосылмай сөйлеуі өзімізгеде ой салды. Қуандық, риза болдық әр қатысқан ботақанға сәттілік тіледік. Жарыстың аты жарыс, байқауда озық шыққан бүлдіршіндерге арнайы дипломдар табыс етілді.
Ендігі жерде қазақ тілінің мәртебесін көтеру балабақшадан бастау алғаны кімді болса да қуантады, мерейін өсіреді.
Барлық бүлдіршіндерге сәттілік тілей отырып, ұстаз тәрбиешілердің дендері сау, іс әрекетіне оңшылық, отбасы ошаққасына амандық тіледік.
Нұрболат БАЛАБЕКҰЛЫ,
Кеген ауылы.
