Облыс әкімі Марат Сұлтанғазиев ауданымызға келді

Облыс әкімі Марат Сұлтанғазиевтің Кеген ауданындағы іс-сапары Кеген ауылында өтті. Әуелгіде облыс басшысы «Кеген су құбыры» КМК-ның жұмыс барысымен және ауыз су жүйесінің мәселелерімен танысып, мекеме нысанын аралап көрді.
– Біздегі елді- мекендер шалғай орналасқандықтан, қыстыкүні апаттық жағдай орын алған кезде, техника жетпей қалады. Арнайы техникаларды ауылдарға апару үшін, бізге тасымалдау жағынан қиындау болып жатыр, тасымалдауға ауыр жүк көлігіне көмектессеңіз? Былтырғы жылы 51 млн теңге қаражат бөлініп, биыл арнайы экскаватор сатып алынды. Қазір кәсіпорынға жақсы қызмет етіп жатыр. Жалғыз эксковатор жетпеуіне байланысты, қазіргі таңда бізге үш техникаға көмектессеңіз? Өйткені, бізде Жалағаш аймағында туристер көптеп келіп жатыр, насостар күйген кезде, бізге кран керек? Өзіңіз кранды көрдіңіз, 15 жылдан аса қызмет жасап жатыр,- деген аудан әкімінің орынбасары Медет Исаев су құбыры мекемесіне техника жетіспеушілігін тілге тиек етті.
Нұрбақыт Теңізбаев, аудан әкімі:
– Ауыз су мәселесі 10 елді мекенде туындап отыр. Бұл мәселе басты назарда. Алты елді-мекенге ауыз жүйесінің құрылысын салу және қайта жаңғырту жұмыстарына жобалық сметалық құжаттары дайындалды, (Жаңа Тасашы, Кеген, Түменбай, Шыбышы, Жылысай) Оның екі елді- мекеннің мемлекеттік сараптамасы шыққан. Жаңа Тасашы және Түменбай ауылдарға облыстық басқармаға бюджеттік өтінім берілді және 2024 жылы 5 елді мекенге (Жалағаш, Тоғызбұлақ, Жалаулы, Сарыкөл, Ұзынбұлақ) ауыз су жүйесінің құрылысын салу және қайта жаңғырту жұмыстарына жобалық сметалық құжаттарын жасауға 105,2 млн теңге бөлініп, зерттеу жұмыстары басталды,- дей келе, алдағы жоспарға тоқталып, 2024 жылы атқарылатын жұмыстар жөнінде баяндады.
Сапар барысында өңір басшысы Кеген аудандық ауруханасының жанындағы Мүмкіндігі шектеулі балаларға арналған оңалту орталығына ат басын бұрып, жұмыстарымен танысты. «Кеген аудандық ауруханасы» КММ-нің директоры Алмас Тілеулиев оңалту орталығындағы емдеу бөлмелерін жеке-жеке таныстырып, қысқаша баяндап өтті. Бұл оңалту орталығына 20 бала есепке тіркелгендігін, алдағы уақытта ем-домдарын алып, ауруларды ерте сатысында анықтауға, уақытылы ем тағайындауға мүмкіндік беретінін жеткізді.
Кеген ауылынан салынатын 150 тұрғын үйдің жобасымен танысу жұмыстары да әкім назарынан тыс қалмады. Өміржан Игібайұлы көшесінің бойында орналасқан нысанның атауы- Жерұйық деп аталады. Бас жобалаушы «Алтын сапа құрылыс компаниясы» ЖШС, бас мердігер «Жібек жолы құрылыс 1978» ЖШС. Тұрғын үйлердің сыртқы келбетімен ішкі интерьерінің көріністері көпшілік назарына ұсынылды.
– Құрылыс жұмыстары тамыз айының бірінен басталады, биыл жоспар бар, жылдың соңына дейін құрылыс жұмыстарын сапалы әрі уақытында аяқтап, 100 үйді тапсырмақшымыз, – деді мердігер компанияның өкілі.
Мұнан соң, облыс әкімі Марат Сұлтанғазиев ауданға еңбегі сіңген зиялы қауым өкілдерімен кездесу өткізді. Жиын барысында облыс басшысы жиналған қауымға жүзеге асқан жұмыстар жайлы кеңінен айтып, алдағы жоспарларымен бөлісті. Кездесуде әр салада еңбек еткен ақсақалдар ауданның қоғамдық өміріне қатысты өзекті мәселелер жөнінде ой қозғап, бірқатар ұсыныстарын айтты.
Сондай-ақ, өңір басшысы Марат Елеусізұлы Түменбай ауылының тұрғындарымен кездесті. Ауылдағы су тасқынына қауіпті аймақты көріп, күрделі жөндеу жұмыстары қажет екені нақтыланды.

Дәурен ӘБУТӘЛІПОВ,
Ғани РАМАЗАН.