«Тоғызбұлақ қазаны» көшірмесі Алматы облыстық музейлер бірлестігіне табысталды

«Есік» мемлекеттік тарихи-мәдени музей-қорығында Халықаралық ескерткіштер мен тарихи орындар күніне арналған іс-шарада музей ісі мамандары бас қосып, саладағы өзекті мәселелерді талқылады. «Есік» музей-қорығының директоры  Гүлмира Мұхтарова елімізде ескерткіштер мен тарихи орындарды сақтап, зерттеуде музей ісі мамандары елеулі еңбек сіңіріп отырғанын атап өтті.

Іс-шараға қатысқан «Таңбалы» музей-қорығы директоры Б.Дандығараева, Алматы облыстық тарихи-мәдени мұра басқарма өкілі М. Есмұратов, Алматы облыстық музейлер бірлестігінің директоры м.а. Е.Тоқтар, жазушы, журналист Ш.Құсайынұлы сынды құрметті меймандар өздерінің ыстық лебіздерін жеткізді.

Іс-шара аясында тарих ғылымдарының докторы, музей саласының білікті маманы Ғалия Шаукетқызы Файзуллина арнайы дәріс оқыды.

Атаулы күнге орай, «Тарихи-мәдени ескерткіштерді қорғаудың өзекті мәселелері» атты дөңгелек үстел ұйымдастырылды. Тарихи-мәдени мұра ескерткіштерін сақтау, қорғау, насихаттау мақсатында ұйымдастырылған жиында музей ісі саласының мамандары бас қосып, тәжірибе алмасып, ортақ мәселелерді талықылады.

Шара аясында «Есік» мемлекеттік тарихи-мәдени музей-қорығы 2019 жылы Алматы облысы, Кеген ауданы, Тоғызбұлақ ауылынан табылған көне қазанның көшірмесін Алматы облысының музейлер бірлестігіне тапсырды. «Тоғызбұлақ қазаны» аталған, б.з.д. V-II ғасырларға тән жәдігердің түпнұсқасы «Есік» музей-қорығы экспозициясында сақтаулы.

Кездесу соңында «Есік» музей-қорығы басшылығы музей ісін дамытуға және насихаттауға елеулі үлес қосқан туризм саласындағы гид экскурсоводтар мен БАҚ өкілдерін Алғыс хатпен марапаттап, арнайы сыйлықтар табыстады.

Музей қонақтары «Есік» музей-қорығының экспозициялық залдарымен танысып, Құрмет аллеясына ағаштар отырғызды.

Дәурен ЕРМЕКБАЙ