Үлгілі келін-2024 келіндер байқау өтті
Қазақ халқының көнеден келе жатқан салт-дәстүрі мен әдет-ғұрыпы ұлттығымыздың ұлықталуы мен бүгінгі ұрпақтың санасына сіңіруді, келешекке мұра болып жалғасуды мақсат тұтқан аудандық мәдениет үйінде аудан көлімінде аудандық Ішкі саясат мекемесі мен аудандық аналар кеңесінің ұйымдастыруымен «Үлгілі келін-2024» келіндер байқауы болып өтті.
Байқау барысында әр округтен келген келіндер төмендегідей кезеңдер бойынша бақ сынасты. «Тегін білу- тектілік!» – кезең бойынша өз тегі мен келген елі жөнінде танстырып өтсе, «Шеше көрген тон пішер»,- кезеңінде қамыр жайып, түйме тағу бойынша шеберліктерін паш етті. Сондай-ақ, «Сыр сандық!» кезеңінде ұмыт қалып бара жатқан ұлттық салт-дәстүрлер мен әдет-ғұрыптар бойынша берілген сұрақтарға жауап беріп, «Аушадияр», «Қынаменде», «Өңір салу», сияқты салт-дәстүрлердің мағынасын ашып түсіндіру тапсырылды. Келесі кезең бойынша бақ сынасқан келіндер сән үлгісін көрсетіп, өз талаттарына қарай шығармашылық кезеңде ән, би, шешендік өнер сынды жаны қалаған өнер саласы бойынша жеке өнерлерін ортаға салды.
Қай ұлттың болмасын өзіне тән салт-санасы, қарым-қабілеті, әдет-ғұрыпы болары сөзсіз. Сондай ата-тектен риасыз сәулелі жарығы мұқалмай келе жатқан нәзіктікке бағамдалған келіннің бейнесі әсемдікті, ұяңдықты, кішпейілділікті, ізеттілікті бойға жиған қазақы салтты, көнерген ескілікке балап бара жатқан ғұрыптарды ашуды мақсат тұтқан шара өз кезеңінде діттеген мұратына жете білді. Бұл дегеніміз – қанында қазақы тәлім мен әлі де қазақылықтың қаймағы бұзылмаған ауылдың келіндерінің бойынан келінге тән қасиеттер байқалып-ақ тұрды.
Еліміздің іргелі қазақ жұртының келіндері сіздердей ақ болсын деген ниетте әділқазылар алқасының ұйғарымымен Бөлексаз ауылынан келген Жиенбаева Жазира Дәулеткелдіқызы Бас жүлдені жеңіп алып, «Үлгілі келін-2024» атағына ие болса, Жалаңаш ауылдық округінің келіні Жеткен Айман 1 орыннан көрінді, 2 орынға табан тіреген Шырғанақ ауылдық округінің келіні Ерниязова Әлия болса, 3 орынға лайықты деп танылған Кеген ауылдық округінің келіні Ерболатқызы Дамира болды. Жылысай округінен келген Сұлтанбекова Арай «Салт-дәстүрді жалғастырушы» номинациясымен марапатталса, Қарқара округінен келген Мархабаева Толқынай «Шебер келін», Ұзынбұлақ округінен келген Иманбек Арайлым «Білімді келін», Қарабұлақ округінен келген Өмірзақова Жадыра «Өнерлі келін» номинациясына ие болып дипломмен марапатталды.
Кешегінің алтын емелі, қазақ жұртының ұстанымы мен қадір-қасиетіне балаған ғұрпы мен салты заман өте келе көнелікке ұшырап, ұмыт қалуға тиісті емес. Осы тұрғыда келешек жастар мен бүгінгі қоғамның күнделікті қағидатына айналар салт-санамызды өшіріп алмай, маздатумыз керектігі шара барысында көзделіп, нақтыланды да. Сол себепті, бүгінгі ұрпаққа насихат ете отырып, келешекке бағыт беруге негіз қалаған осы текті шаралар өз кезегінде тоқтаусыз өтіп тұрса игі. Ұлттық құндылықтарымызды ұлықтап, елдігіміздің іргесін бекемдеп, қазақ деген қайсар ұлттың текті ұрпағы болар ұландар көбейсін!
Лаура Мұхаметқали,
«Qarqara».
