ЖЫРШЫЛАР МЕКТЕБІ ЖАНДАНАДЫ
Рас, ақындық, жыршылық – қанымызда, жанымызда бар, түп тамырымыздан жалғасып келе жатқан игілік. Жыршылық өнері – адам жанын жақсы ойларға жетелейді, ізгілікке ұйытады, жаманнан алыстатып, жақсыға үйір етеді. Кеудеңді сәулелі ойларға толтырып, санаңды серпілтеді. Көңіліңді өзгеше күйіне бөлеп, жаныңды жадыратып тастайды. Өз тұсында бірнеше сағаттап батырлар жырын ұйып, беріле тыңдаған адамның бүгінде осалы аз. Қалай десек те, көне дүниеден алтын арқау, жібек жолын үзбей жалғасып келе жатқан жыршы, жыраулардың ой-толғамдары, жүрек жарды дастандары ақылдың кеніне, даналықтың өзіне айналған.
Міне, сол қастерлі дүниемізді жаңа ғасырдың көшіне ілестіріп, өрісін өсіре дамыту, жаңа ғасырға тән жақсылықтары, бояу-нақышымен әрлеу, айшықтау, өсіп келе жатқан жас ұрпаққа өлместей етіп ұлағаттау – аса маңызды, қымбат та қастерлі. Осыған орай облыстық мәдениет, архивтер және құжаттама басқармасының қолға алуымен соңғы жылдары Хантәңірі, Алатау өлкесіндегі жыршылық, термешілік өнердің тамырына қан жүгіртіп, өркендету тұрғысында мақсатты іс-шаралар қолға алынып келеді. Соның бір парасы әрі жемісіндей облыстың барлық аудандарынан облыстық халық шығармашылығы орталығына қарайтын жыршылар мектебі сәтімен ашылды. Ел қуанып, жан жұбанарлықтай жақсылық десек артық айтқандық емес, соңғы айлардан бері сол ашылған жыршылар мектебіне екі штаттан беріліп, сауатты мамандар, арқалы жыршылар, ақындар жұмыстарын бастап кетті. Бәрекелді! Бұл үшін аталған басқарманың басшысы Әлия Жақыпбековаға, халық шығармашылығы орталығының директоры Ерұлан Жебегеновке алғыстан басқа айтарымыз жоқ.
Өткен апта Кеген аудандық мәдениет үйінде Райымбек, Кеген, Ұйғыр аудандарындағы жыршылар мектебі жетекшілері, айтыс жетекшілері бас қосқан келелі семинар кеңес болып өтті. Пікір алысып, тәжірибе жинақтауға негізделген басқосуды облыстық халық шығармашылығы орталығының жыр-терме мектептерінің үйлестірушісі, ақын, жыршы, жырау, термеші Сүйіндік Серік Әбдірайымов жүргізіп отырды. Арқалы ақын, төкпе жырдың шешені, өлең сөздің дүлділі Серік ақын ең алдымен жыршылар мектебінің жыл бойғы жұмысының жоспары болу керек, соған орай жұмыстар жалғасын табуы қажет деді. Жыршылық, ақындық, термешілік өнерді күн талабына сай жаңғырта жүргізудің жолдарына тоқталып, дәл осы таулы өлкеден шыққан Бөлтірік, Көдек, Құланаян Құлмамбет, Шарғын секілді ақын әрі жыршы, жыраулардың жыр-дастандарынан, өз мақамдарымен мысалдар келтіріп отырды. Басқосуда Райымбек аудандық мәдениет үйінің жанандағы Көдек Байшығанұлы атындағы жыршылар мектебінің жетекшісі Еркін Рақымжан өз ойын ортаға салып өтті. Кеген аудандық мәдениет үйінің жанындағы Бөлтірік Атыханұлы атындағы жыршылар мектебінің жетекшісі Нұрым Байбала қоңыр домбырасын қолына алып, бірнеше мақаммен жыр толғады. Осы күні шәкірттермен жұмыс жүргізгенде киелі қоңыр домбыраны жақсылап меңгерудің қажеттігі, одан соң ежелден келе жатқан халық әндерін, жыршылардың толғауларын ортақ іске пайдаланудың маңыздылығы әңгіменің өзегіне айналды. Семинарға Ұйғыр аудандық мәдениет үйінің жанындағы Шарғын Алғазыұлы атындағы жыршылар мектебінің жетекшісі Берікбол Мұқамжан, Кеген, Райымбек аудандық жыршылар мектебіндегі айтыс жетекшілері Кәдірбек Сүлеймен, Аят Төре, Кеген аудандық мәдениет үйінің режиссері, ақын Аршын Нұрбақыт қатысып, өз пікірлерін ортаға салды.
Сонымен облысымыздың аумағында, Хантәңірі шыңы мен Алатаудың баурайында жыршылар мектебі жұмыстарына кірісіп кетті. Қазірдің өзінде аталған мектептерге жүзден аса өнерлі, дарынды, өлең сөздің қадірін біліп, жыршылық өнеріне ықылас-пейілі ерекше шәкірттер қабылданыпты. Бәрекелді! Іске сәт! Мұндай игі басқосу облыстың барлық өңірлерінде жалғасатын болады.
Қанат Біржансал,
Кеген ауданы.
Суретте: Облыстық халық шығармашылығы орталығының жыр-терме мектептерінің үйлестірушісі Серік Әбдірайымов. Семинардан көрініс.
