Ақсу ауданының азаматтары қайырымдылықтан қалыс қалмауда. Соңғы кезде орын алған жағдай барша елдің бірлігін сынауда. Бұл сынақтан ақсулық ағайын аман-есен өтуде.
Жаһанды жайлаған пандемия ақ халаттыларға жауапкершіліктің жүгін артты. Олар күн-түн демей халықтың құлан-таза айығып кетуіне барын салуда.
Тіпті отбасыларынан жырақта, еңбек етуде. Мәселен, Ақсудағы медицина мамандары Е.Сихымов атындағы мектеп-интернатының жатаханасына орналастырылған. Екі айдан бері сол жерді паналап келеді. Онда Аудандық орталық аурухананың провизорлық және жұқпалы аурулар бөлімінде қызмет ететін 64 медицина қызметкерлері тұрақтанған.
Тажалмен бетпе-бет келіп, адам өміріне араша түсіп жүрген жандарды бөлек орналастырудағы мақсат жақындарын кеселден сақтау. Ел басына күн туғанда өз өмірлерін қатерге тігіп, жанын салып жүрген мамандардың жағдайын жасауды Ақсу ауданының азаматтары өз мойындарына алып отыр. Олар 600 мың теңге көлемінде қаржы жинап, індетпен күресіп жүрген ақ халатты абзал жандарға азық-түлік, жеміс-жидек, қой етімен ұлттық сусын қымыз апарып таратқан.
Бұл игі бастама алдағы уақытта да жалғасын таппақ.
