Сыбайлас жемқорлыққа қарсы күрес – қоғамның ортақ міндеті
Сыбайлас жемқорлық – қоғамның дамуына кедергі келтіретін, мемлекеттік басқару жүйесіне және халықтың билікке деген сеніміне нұқсан келтіретін қауіпті әлеуметтік құбылыс. Сондықтан сыбайлас жемқорлықтың алдын алу және құқық бұзушылыққа жол бермеу – бүгінгі күннің өзекті мәселелерінің бірі.
Қазақстан Республикасында сыбайлас жемқорлыққа қарсы саясатты жүзеге асыру, мемлекеттік қызметтің ашықтығы мен әділдігін қамтамасыз ету бағытында жүйелі жұмыстар жүргізілуде. Бұл ретте әрбір мемлекеттік қызметші өзіне жүктелген міндеттерді адал орындап, заңдылық пен қызметтік әдеп талаптарын қатаң сақтауы тиіс.
Мемлекеттік қызметшінің басты қағидаттары адалдық, әділдік, жауапкершілік және халыққа қызмет ету. Қызметтік өкілеттіктерді жеке мақсатта пайдалануға, азаматтардың құқықтары мен заңды мүдделеріне нұқсан келтіруге, қызметтік жағдайды асыра пайдалануға жол берілмеуі қажет.
Сыбайлас жемқорлықтың алдын алуда құқықтық сауаттылықты арттырудың да маңызы зор. Әрбір азамат өз құқықтары мен міндеттерін білуі, заң талаптарын сақтауы және құқық бұзушылықтың кез келген көрінісіне бейжай қарамауы тиіс. Себебі заң үстемдігі орнаған қоғамда ғана әділдік пен тәртіп қалыптасады.
Сонымен қатар, мемлекеттік қызмет көрсету барысында ашықтықты қамтамасыз ету, азаматтардың өтініштерін заң аясында қарау, артық әуре-сарсаңға салмау және қызметтік әдеп нормаларын сақтау – сыбайлас жемқорлық тәуекелдерін төмендетудің маңызды жолдары.
Құқық бұзушылықтың алдын алу тек мемлекеттік органдардың міндеті емес, ол– бүкіл қоғамға ортақ жауапкершілік. Әрбір азамат заңды құрметтеп, қоғамдық тәртіпті сақтауға үлес қосуы қажет.
Қорытындылай келе, сыбайлас жемқорлықпен күрес – бір күндік науқан емес, үздіксіз жүргізілуі тиіс маңызды жұмыс. Адалдық пен әділдік қағидаттарын берік ұстану арқылы біз құқықтық мемлекет қалыптастыруға және өскелең ұрпаққа жарқын болашақ қалдыруға үлес қоса аламыз.
Жемқорлықсыз қоғам – әділетті қоғам. Заңға құрмет – әр азаматтың міндеті!
Шолпан Рахымберді,
Кеген ауданының «Тұйық ауылдық округі әкімінің аппараты» ММ-нің құрылымдық бөлімше басшысы.
