«eGov бұрышы» – мемлекеттік қызметтерге қолжетімділікті арттыру жолы

Қазіргі таңда елімізде мемлекеттік қызметтерді цифрландыру және халыққа қолайлы жағдай жасау бағытында ауқымды жұмыстар жүргізілуде. Осы орайда тұрғындарға электрондық мемлекеттік қызметтерді қолжетімді ету мақсатында ауылдық округ әкімдігі ғимаратында «eGov бұрышы» ұйымдастырылған.
«eGov бұрышы»– азаматтардың электрондық үкімет порталы арқылы қажетті қызметтерді өз бетінше алуына мүмкіндік беретін арнайы орын.Мұнда тұрғындар электрондық цифрлық қолтаңба арқылы түрлі анықтамалар алуға, мекенжай анықтамасын, жылжымайтын мүлікке қатысты мәліметтерді сұратуға, мемлекеттік органдарға өтініш жолдауға және басқа да электрондық қызметтерді пайдалануға мүмкіндік алады.
Сонымен қатар, әкімдік қызметкерлері электрондық қызметтерді пайдалану тәртібі бойынша тұрғындарға түсіндіру жұмыстарын жүргізіп, қажет болған жағдайда практикалық көмек көрсетеді. «eGov бұрышының» басты мақсаты – халықтың цифрлық сауаттылығын арттыру, уақытты үнемдеу және мемлекеттік қызметтерді алу кезінде азаматтарға қолайлы жағдай жасау.
Цифрлық мүмкіндіктерді тиімді пайдалану – заман талабы. Ал электрондық үкімет қызметтері әрбір тұрғын үшін мемлекеттік қызметтерді жылдам әрі қолжетімді етудің маңызды тетігі болып табылады.
Г.Рақымбаева,
Кеген ауданы «Қарабұлақ ауылдық
округі әкімі аппараты» ММ-нің бас
маман салық инспекторы.