ЦИФРЛЫҚ МЕМЛЕКЕТ – ХАЛЫҚҚА ҚОЛАЙЛЫ ҚЫЗМЕТ
Қазіргі таңда елімізде мемлекеттік қызмет көрсету жүйесін жетілдіру, халыққа қолайлы жағдай жасау және қызметтердің қолжетімділігін арттыру бағытында ауқымды жұмыстар жүргізілуде. Соның ішінде электрондық үкімет порталы – eGov.kz жүйесінің маңызы ерекше.
Электрондық үкімет – азаматтар мен мемлекет арасындағы байланысты жеңілдететін, мемлекеттік қызметтерді қашықтан алуға мүмкіндік беретін заманауи цифрлық платформа. Оның көмегімен тұрғындар көптеген қызмет түрлерін үйден немесе жұмыс орнынан шықпай-ақ ала алады. Атап айтқанда, анықтамалар алу, мекенжай мәліметтерін тексеру, жылжымайтын мүлікке қатысты ақпарат алу, өтініштер жолдау және басқа да қызметтерді онлайн форматта жүзеге асыруға болады.
eGov порталының басты артықшылығы – уақытты үнемдеу, артық қағазбастылықты азайту және мемлекеттік қызметтердің ашықтығын қамтамасыз ету. Сонымен қатар, азаматтарға электрондық цифрлық қолтаңба (ЭЦҚ) арқылы өздеріне қажетті қызметтерді қауіпсіз әрі жылдам алу мүмкіндігі ұсынылған.
Мемлекеттік қызмет көрсету саласындағы цифрландыру ауылдық елді мекендер үшін де маңызды. Себебі шалғай ауыл тұрғындары аудан орталығына немесе басқа мекемелерге бармай-ақ, интернет арқылы көптеген мәселелерін шеше алады. Бұл – халықтың уақытын үнемдеп қана қоймай, мемлекеттік қызметтердің қолжетімділігін арттыруға ықпал етеді.
Дегенмен, цифрлық қызметтерді пайдалану барысында тұрғындардың электрондық сауаттылығын арттыру да маңызды міндеттердің бірі болып табылады. Осы мақсатта тұрғындарға eGov.kz порталы мен eGov Mobile мобильді қосымшасын пайдалану тәртібі бойынша түсіндіру жұмыстары жүргізіліп, қажетті ақпараттық көмектер көрсетілуі қажет.
Мемлекеттік қызметтің басты мақсаты– халыққа сапалы, қолжетімді және тиімді қызмет көрсету. Ал цифрлық технологияларды дамыту – осы мақсатқа жетудің маңызды тетігі.
Цифрлық сауаттылық – заман талабы, ал электрондық үкімет – халық игілігіне бағытталған маңызды мүмкіндік.
Шолпан Рахымберді,
Кеген ауданының «Тұйық ауылдық округі әкімінің аппараты» ММ-нің құрылымдық бөлімше басшысы.
