Конституцияны түсіну – болашақты түсіну

Конституцияны түсіну – болашақты түсіну

Ата Заңның маңызы әр азаматтың өмірімен өлшенеді

Әрбір елдің болашағы оның қабылдаған шешімдерімен ғана емес, сол шешімдердің негізінде қалыптасатын қоғамдық құндылықтармен де айқындалады. Ал мемлекет пен қоғам өмірінің негізгі қағидаларын белгілейтін басты құжат – Конституция. Сондықтан Ата Заңның мәнін түсіну, оның мазмұнымен танысу және ондағы қағидаларды зерделеу әр азамат үшін маңызды деп есептеймін.

Конституцияны кейде тек заңгерлерге немесе мемлекеттік қызметшілерге қатысты құжат ретінде қабылдаймыз. Алайда оның мазмұны әлдеқайда кең. Ол адамның құқықтары мен бостандықтарына, азаматтық міндеттеріне, мемлекеттік басқару жүйесіне және қоғамның даму бағыттарына қатысты негізгі ережелерді қамтиды.

Мен үшін Конституцияның маңызын түсінудің алғашқы қадамы – оның адам өмірімен байланысын ұғыну. Әрбір азамат өз құқықтарын біліп, заңда белгіленген мүмкіндіктерді дұрыс пайдалана алуы қажет. Сонымен бірге өзгенің құқығына құрметпен қарау, заң талаптарын сақтау және қоғамдық тәртіпке жауапкершілікпен қарау да азаматтық мәдениеттің маңызды бөлігі болып саналады.

Құқықтық сауаттылық бір күнде қалыптаспайды. Ол отбасындағы тәрбиеден, мектептегі білімнен, қоғамдық ортадағы қарым-қатынастан және адамның өздігінен ізденуінен басталады. Осы ретте Конституцияның негізгі қағидаларын түсіндіру жұмыстарының маңызы зор. Заң мәтінін оқып қана қоймай, оның мәнін қарапайым тілмен түсіндіру азаматтардың құқықтық білімін арттыруға мүмкіндік береді.

Әсіресе жастардың Ата Заң туралы түсінігін қалыптастыруға ерекше көңіл бөлген жөн. Жастар – елдің ертеңі. Олардың өз құқықтары мен міндеттерін білуі, заңға құрметпен қарауы және қоғамдық мәселелерге жауапкершілікпен қатысуы болашақтағы азаматтық қоғамның дамуына ықпал етеді.

Бүгінде әлеуметтік желілер ақпарат алмасудың маңызды алаңына айналды. Сондықтан Конституция туралы мазмұнды әрі түсінікті ақпаратты осы кеңістікте де тарату қажет. Әр азамат ресми ақпарат көздеріне сүйеніп, құқықтық мәселелерге қатысты мәліметтерді саналы түрде қабылдағаны дұрыс. Бұл жалған ақпараттың таралуына жол бермеуге және қоғамдағы құқықтық мәдениетті нығайтуға көмектеседі.

Конституцияның маңызы оның қағидаларын қаншалықты түсініп, заң талаптарын күнделікті өмірде сақтай алатынымыздан да көрінеді. Заңды құрметтеу тек жауапкершіліктен туындамауы керек. Ол адамның ішкі мәдениеті мен азаматтық ұстанымына айналғанда ғана қоғамдық қатынастарға оң ықпал етеді.

Менің ойымша, Ата Заңды тану – бір реттік ақпараттық науқанмен шектелетін жұмыс емес. Бұл – үздіксіз білім алу мен азаматтық жауапкершілікті қалыптастыруға бағытталған үдеріс. Әр азамат Конституцияның мазмұнына үңіліп, оның өз өміріне қатысты тұстарын түсінуге ұмтылғаны жөн.

Конституцияны түсіну – өз құқығыңды тану, міндетіңді сезіну және қоғам алдындағы жауапкершілігіңді ұғыну. Ата Заңның құндылығы да осы қағидаларды күнделікті өмірімізде басшылыққа алудан көрінеді.

Тәліп Нұркен