Елім деп өткен азамат

Адам өмірден өткен соң оның артында қалатын ең үлкен мұрасы – елге жасаған еңбегі мен адамгершілік болмысы. Кейбір азаматтар көпшілікке жарқырап көрінбегенімен, өз ісіне адалдығымен, жауапкершілігімен, елге істеген қызметімен, айнала ортасына тигізген пайдасымен жүрекке жақын болып қалады. Қанат Біржансал да сондай азаматтардың бірі десем, ешкім маған артық кетің демесі анық. Өйткені ол өзінің тынымсыз журналистік қызметі барысында туған өлкесінің өркендеуі жолында тер төкті және соның арқасында елінің есінде еселі еңбектерімен қалды.
Қанат өзіне тапсырылған жұмысты өте тыңғылықты орындайтын. Кәсіби міндетіне жауапкершілікпен қарап, әр істің соңына дейін жеткізуге арын салатын. Кеген мен Нарынқолдың бары мен жоғын түгендеп, жарқын жаңалықтары мен жоғары жетістіктерін жалпақ жұртқа дер кезінде жеткізетін бірден-бір ақпарат көзі болды десек, артық айтқандық емес. Ұлтымыздың ұлы тұлғасы Ахмет Байтұрсыновтың: «Газет –халықтың көзі, құлағы һәм тілі» деген тұжырымды тәмсілін осы Қанат Біржансал сынды сол баспасөздің отымен кіріп, күлімен шыққан жанкешті журналистерге қарап айтқан болар деп ойлаймын. Өңірде болып өзекті оң өзгерістерді, елдің тыныс-тіршілігін, халықтың мұң-мұқтажын дер кезінде тиісті жерге жеткізіп, ақпарат айдынында емін-еркін самғап, журналистикада саласында өзіндік орнын қалыптастырды.
Оның бойындағы тағы бір ерекшелік – қарапайымдылығы еді. Бәрін ішке түйетін, көп сөйлемейтін. Артық-ауыз әңгімеге бармайтын, көрсетуге тырыспайтын. Бірақ аз сөйлегенімен, атқарған ісі көп еді. Әріптестерімен де, ел азаматтарымен де сыйластық қарым-қатынаста болды. Өзінің сабырлы мінезімен, байыпты ісімен құрметке бөленді.
Қанатпен араласқан жылдары оның туған жеріне, елге деген ықыласын жақсы байқадым. Кеген мен Нарынқолдың әрбір жаңалығын жай ғана ақпарат ретінде емес, ел өмірінің бір бөлшегі ретінде қабылдайтын. Сондықтан оның дайындаған материалдарынан өңірдің тыныс-тіршілігі, қарапайым халықтың тұрмысы мен еңбегі айқын көрініп тұратын.
Қақаң өмірден өткен кезде қаралы митингте оның өмірбаянын халық алдында өзім оқып бердім. Сол сәтте бір нәрсеге ерекше таңғалдым. Марқұм өмірбаянын өзі жазып кетіпті. Бұл мен үшін күтпеген жағдай болды. Адамның өз өмір жолын өзі қағазға түсіруі – оның артында қалатын қарапайым ғана құжат емес, сол адамның ғұмырнамасына берген өзіндік бағасы іспетті екен.
Өмірбаянды оқи отырып, Қанаттың жүріп өткен жолына, атқарған қызметіне, өмірінің әр кезеңіне қайта бір үңілгендей болдым. Сонда оның көп сөйлемейтін, қарапайым мінезінің ар жағында терең ойлы, өз өміріне жауапкершілікпен қарайтын азаматтың болмысы жатқанын тағы бір сезіндім.
Қанаттың өмірі ұзақ болмады. Бірақ адамның ғұмыры оның жыл санымен емес, елге жасаған қызметімен, артында қалдырған жақсы атымен өлшенеді. Ол өзіне жүктелген міндетті адал атқарды, адамдардың алғысын арқалап, әрдайм еңсесін тік ұстап жүрді журналистикада өшпейтін із қалдырды.
Бүгінде Қанат арамызда жоқ. Дегенмен оның есімі, еңбегі, қарапайым болмысы оны таныған азаматтардың жадында сақталады. Елім деп соққан жүрегінің жылуы жылдар бойы жұртшылықтың көңіл төрінен орын алып, ізгі тілектерге қоса айтыларына, жаңалық жаршысы атанған азаматтың жарқын еңбегі журналистиканы таңдағандарға өнеге боларына сенімім мол!

Кеңес Қабылбеков,
Кеген ауданы әкімінің орынбасары.