Ұстаз-ұрпаққа жол сілтер шамшырақ

«Ұстаздық еткен жалықпас, үйретуден балаға»- деп ұлы Абай айтқандай, ұстаздық- жай ғана мамандық емес, адам тағдырына әсер ететін үлкен жауапкершілік. Әр адамның жүрегінде өзіне жол көрсететін,алғаш білімге жетелеген, жақсы сөздерімен жігер берген бір ұстазы болады.
Ұстаз – баланың қолына кітап ұстатып қана қоймай, оның жүрегіне арман ұялатады. Кейде оқушы ұстазының айтқан сөзінің қадірін сол сәтте түсінбеуі мүмкін. Алайда жылдар өте келе сол ақылдың өмір жолындағы маңызды бағыт болғанын ұғынады.
Бүгінгі мектеп оқушысы – ертеңгі ел үміті. Оның бойындағы білім, тәрбие, адамгершілік қасиеттердің қалыптасуына ұстаздың қосқан үлесі өлшеусіз. Сондықтан шәкіртінің әрбір жетістігі – ұстаз еңбегінің жемісі.
Нағыз ұстаз әр баланың бойынан бір ерекшелік көре біледі. Бірінің білімге, бірінің өнерге, енді бірінің спортқа немесе шығармашылыққа қабілеті болуы мүмкін. Бүгінгі мұғалімдер күні – бізге білім мен тәрбие беріп жүрген ұстаздарға алғыс білдіретін ерекше сәт. Олардың әрбір сабағы, әрбір кеңесі, әрбір жылы сөзі:шәкірт жүрегінде қалатын құндылық.
Құрметті ұстаздар! Сіздерге шәкірттеріңіздің биігіне бірге қуанып, болашақта үлкен табысқа жетуді тілеймін. Дендеріңізге саулық, еңбектеріңізге береке тілеймін. Өйткені ұстаздың ең үлкен марапаты – шәкіртінің жетістігі, ал ең үлкен еңбегі – сол жетістікке апарар жолды көрсету.
Ұстаз есімі – ұрпақ жадында қалатын ұлы есім!

Кәусар Абдиразакова,
Ө.Жаңабаев атыңдағы орта
мектеп 11сынып оқушысы.