Мектептен кетерміз, ұстаздан кеткенді қайдан?

Кейде біз күн сайын көріп жүрген адамдарымыздың қадірін бірден түсіне бермейміз. Күнде амандасамыз, сабаққа кіреміз, тапсырма орындаймыз, кейде ескерту естиміз… Бәрі қалыпты сияқты. Бірақ сол қарапайым күндердің ішінде біздің өмірімізге әсер етіп жатқан үлкен дүниелер бар екенін кейін түсінеді екенбіз.
Мен үшін сондай жандардың бірі- ұстаздарым.
Ұстаз деген сөзді естігенде, менің ойыма ең алдымен білім емес, адам келеді. Себебі ұстаз бізге тек кітаптағы ақпаратты үйретіп қана қоймайды. Ол бізге қалай ойлау керегін, қателіктен қорықпау керегін, еңбектенудің маңызын, кейде тіпті адамды адам ретінде сыйлауды үйретеді.
Әр ұстаздың бізге берген өз сабағы бар.Бірінің сабағы есімізде қалса, бірінің айтқан бір ауыз сөзі жадымызда қалады. Бір ұстаздың ескертуі сол кезде ұнамауы мүмкін, бірақ кейін ойланып қарасақ, сол сөздің біз үшін айтылғанын түсінеміз. Меніңше, ұстаздың ең үлкен ерекшелігі де осында.
Ол өз еңбегінің нәтижесін бірден көрмейді. Бүгін бір нәрсе үйретеді. Ал оның нәтижесі бірнеше жылдан кейін көрінуі мүмкін. Шәкірті өз орнын тауып, жақсы адам болып қалыптасқанда ғана сол еңбектің қаншалықты үлкен екенін түсінесің. Мен кейде «Ұстаздар бізге қанша уақыт пен күш жұмсайды екен?» деп ойлаймын. Бір сабақтың өзіне дайындалу, әр оқушыға көңіл бөлу, түсінбегенімізді қайта түсіндіру, жетістігімізге қуану, қателігімізге алаңдау – мұның бәрі сырт көзге байқала бермейді. Ал біз үшін бұл – күнделікті өмір.Сондықтан бүгін мен жай ғана «Мұғалімдер күні құтты болсын!» дегім келмейді.
Мен өз ұстаздарыма шын жүрегімнен рақмет айтқым келеді.
Маған білім бергендеріңіз үшін рақмет.
Менің қолымнан келетініне сенгендеріңіз үшін рақмет.
Қателессем, түзегендеріңіз үшін рақмет.
Кейде өзім көрмеген мүмкіндікті менен көргендеріңіз үшін рақмет.
Ең бастысы, бізге тек жақсы оқушы болуды емес,жақсы адам болуды үйреткендеріңіз үшін рақмет.
Қымбатты, Іңкәрбек Жұмағұлов атындағы орта мектебінің барша ұстаздары!
5-қазан – сіздерге деген құрметімізді ерекше білдіретін күн. Осы мерекеде әрқайсыңызға зор денсаулық, отбасыларыңызға амандық, жүректеріңізге қуаныш тілеймін. Еңбектеріңіз әрдайым бағаланып, шәкірттеріңіздің жетістігі сіздерге үлкен мақтаныш сыйласын. Әр сабағыңыз жақсы жаңалықпен, әр күніңіз қуанышпен өтсін.Сіздерге қарап, ұстаз болу – жай ғана мамандық емес, үлкен жүректі қажет ететін жол екенін түсінемін.
Бір күні мектеп бітіп, біз әр жаққа кетерміз. Бірақ осы мектепте естіген сөздеріміз, алған біліміміз, көрген тәрбиеміз бізбен бірге қалады.
Сондықтан меніңше, мектептен кетуге болады, бірақ ұстаздан кету мүмкін емес.Өйткені жақсы ұстаздың аты күнделікке ғана емес, шәкіртінің жүрегіне жазылады.Мерекелеріңіз құтты болсын, менің аяулы ұстаздарым!
Жанел Сайлаубек,
І.Жұмағұлов атындағы орта
мектебінің 11-сынып оқушысы.