Ұлағатты ұстаз
Алаштың ардақтысы Мағжан Жұмабаев: «Алты алаштың басы қосылса, төрдегі орын-мұғалімдікі» деген. Мұғалім болу- әркімнің қолынан келеді. Ал, нағыз ұстаз болу үшін көп еңбек пен тер төгу қажет. Бүгінгі мақала 36 жыл саналы ғұмырын ұстаздық жолға арнап, білім саласында елеулі қызмет еткен нағыз ұстаздың бірі- Жанболат Бәйімбетов туралы болмақ. Жанболат Қазыкенұлы өзінің адал еңбегімен, асқан шеберлігімен, ұлтқа деген жанашырлығымен, ұрпаққа деген жауапкершілігімен ерекшеленіп, талай шәкірттің шырағын жақты.
Ұлағат иесі 1968 жылы 27 маусымда Алматы облысы, Кеген ауданы, Ақсай ауылында дүниеге келген.
Ақсай сегіз жылдық орталау мектебіне 1975 жылы 1 сыныпқа қабылданып, 1984 жылы негізігі орта мектепті бітірді. 1984-1988 жылдар аралығында Есік педагогикалық училищесінің еңбек, сызу мамандығы бойынша бітіріп шықты. Алғашқы педагогикалық еңбек жолын Талдықорған облысы, Сарыөзек ауданындағы Пионерлер үйінде үйірме жетекшісі болып қызмет атқарып, 1988 жылдың желтоқсан айында Ленинград қаласында әскери борышын өтеп келді. 1990 жылдың қыркүйек айында Кеген аудандық Білім бөлімінің жолдамасы бойынша Кеген ауданы, Тасашы ауылы, Тасашы орта мектебінде сызу, бейнелеу, еңбек пәнінің мұғалімі болып қызмет атқарды. 1993-1998 жылдар аралығында Абай атындағы Алматы мемлекеттік университетінің бейнелеу өнері, сызу мамандығы бойынша білім алды. Мектеп басшысы жетістіктерімен ұйымдастыру қабілетін байқап, 1999 жылдың қыркүйек айында мектеп директорының бұйрығымен директордың тәрбие ісі жөніндегі орынбасары қызметіне тағайындалса, Алматы облыстық Білім басқармасының бұйрығымен 2000 жылдың қазан айынан Кеген ауданы, Ақсай орта мектебінің директоры қызметіне тағайындалды. 2005-2006 жылдары осы аталған мектепте педагог ұйымдастырушы қызметінде, 2006-2008 жылдары мектеп директорының тәрбие ісі жөніндегі орынбасары, 2008-2014 жылдары мектеп директорының оқу ісі жөніндегі орынбасары, 2014-2024 жылдың желтоқсан айына дейін мектеп директоры қызметін абыроймен атқарды. Алматы қаласындағы педагогтар шеберлігін арттыру орталығында 2016-2017 жылдар аралығында мектепті басқарудың 9 айлық курсын бітіріп, сертификатпен марапатталды. Аудандық директорлар корпусының төрағасы және аудандық Білім бөлімінің алқа мүшесі. 2025 жылдың 18 наурызынан бүгінгі күнге дейін Ұзынбұлақ ауылындағы Ыдырыс Көшкінов атындағы орта мектебінің директоры қызметін атқарып келеді. 2013 жылы Облыстық білім басқармасының бұйрығымен Білім және Ғылым министрлігінің Ұлттық біріңғай тестілеуді ұйымдастырудың өкілі болып тіркелді. Жоғары санатты педагог-зерттеуші.
– Мен бүгінгі таңда білім беру саласында 36 жылдай еңбек етіп келемін. Күн сайын алдымда отырған шәкірттеріме зер сала қараймын. Алға үмітпен талпынған олардың алдында менің де ұстаз ретінде үлкен жауапкершілігім бар екенін іштей сезінемін. Сондықтан менің өзіме қояр талабым, алдыма қойған мақсатым жоғары болуы тиіс, өйткені сол жарқыраған шамшырақты дер кезінде байқап, дер кезінде жаға білу- менің ұстаздық парызым,- деген ұстаз осы салаға келгеніне еш өкінбейтінін, керісінше еліміздің келешек абыройлы азаматтарын тәрбиелеу зор мақтаныш екенін айтады.
Ұстаздың саладағы жетістіктері де аз емес. Ұстаздық еңбек жолында атқарған жұмыс нәтижелерінің қорытындысымен 2013 жылы Білім және Ғылым министрлігінің Алғыс хатымен, 2015 жылы аудан әкімінің Құрмет грамотасымен аудандық білім бөлімінің Құрмет грамотасымен, 2018 жылы желтоқсанда ҚР Тұңғыш Президенті Н.Ә.Назарбаевтың Құрмет грамотасымен, 2019 жылы «Өнер мәдениет және спорт институына 50 жыл» мерекелік медалімен, облыстық «Табысты көшбасшы- 2019» байқауында «Ұйымдастырушы басшы» номинациясымен марапатталды. Аудандық «Білім беру ұйымының табысты көшбасшысы-2019» байқауында 2 орын, аудандық «Білім беру ұйымының табысты көшбасшысы-2021» байқауында 2 орын және аудандық «Мектеп басшыларының белсенді топтар шебер класс алаңы-2021» байқауында 2 орынды иеленген. 2024 жылы Алматы облыстық білім басқармасының «Білім беру сапасын арттырудағы инновациялық қызметтің тиімділігі» тақырыбында белсенділік танытқан үшін Алғыс хатпен марапатталды. Мектепті басқарудағы іс-тәжірибелері 2014-2024 жылдар аралығында аудан, облыстық деңгейде таратылды.
«Дүниеде көп адамды бақытқа кеңелткен адам- бақытты» деген ұлағатты сөз бар. Қаншама шәкірттердің қолына бақыт, білім кілтін ұстатқан ұстаз Жанболат Қазыкенұлы-бақытты жан, аяулы әке. Ұрпағымен жайқалып отырған ұлағатты ұстазға денсаулық тілеп, әлі де қоғамға пайдасын тигізіп, ұрпақтарға үлгі бола берсін деген ниетіміз бар.
Дәурен ЕРМЕКБАЙ.
