Ақпараттық кездесу өтті

Ауданда Алматы және Жетісу облыстары бойынша Қылмыстық-атқару жүйесі департаментінің бос жұмыс орындары мен қызметке орналасу мүмкіндіктеріне арналған ақпараттық-түсіндіру кездесуі өтті.
Кездесудің негізгі мақсаты – қылмыстық-атқару жүйесі органдарындағы бос лауазымдар туралы ақпарат беру, жастар арасында тәрбие жұмыстарын жетілдіру, ішкі істер органдары қызметінің беделін арттыру және жас ұрпақтың патриоттық сезімін қалыптастыру. Сонымен қатар колледждер мен жоғары оқу орындарын тәмамдаған түлектерге мемлекеттік қызметке орналасу мүмкіндіктері түсіндірілді.
Жиынға аудан әкімдігінің өкілдері, мекеме басшылары, жауапты мамандар, жастар ісі жөніндегі нұсқаушылар, жұмыссыз жастар мен білім ордаларының түлектері қатысты.
Кездесу барысында Алматы және Жетісу облыстары бойынша Қылмыстық-атқару жүйесі департаменті басшысының орынбасары, әділет полковнигі Сабиров Магис Марижанович, Алматы облысы және Жетісу облысы бойынша ҚАЖ департаменті №10 мекемесі бақылаушылық қызмет бөлімінің бастығы, әділет майоры Сеитов Аслан Манарбекович, сондай-ақ департаменттің жеке құрам жұмысын ұйымдастыру бөлімінің қызметкерлері Аягерім Ақылбекова мен Индира Серікжанова сөз сөйлеп, саладағы қызмет ерекшеліктері мен қойылатын талаптар жөнінде кеңінен баяндады.
Мамандар үміткерлерге қызметке қабылдау тәртібі, қажетті құжаттар, кәсіби біліктілік талаптары және қызметкерлерге ұсынылатын әлеуметтік кепілдіктер туралы толыққанды ақпарат берді. Жиын соңында қатысушылар өздерін толғандырған сұрақтарын қойып, тұшымды жауаптар алды.
Мұндай кездесулер жастардың кәсіби бағдарын айқындап, еңбек нарығындағы мүмкіндіктермен танысуына, сондай-ақ мемлекеттік қызметке деген қызығушылығын арттыруға жол ашады.

Л. Қарасартова.