ІЛЕ АУДАНЫНДА ЖАСТАРДЫҢ ҚҰҚЫҚТЫҚ ЖӘНЕ ҚАРЖЫЛЫҚ САУАТТЫЛЫҒЫНА АРНАЛҒАН ФОРУМ ӨТТІ
ІЛЕ АУДАНЫНДА ЖАСТАРДЫҢ ҚҰҚЫҚТЫҚ ЖӘНЕ ҚАРЖЫЛЫҚ САУАТТЫЛЫҒЫНА АРНАЛҒАН ФОРУМ ӨТТІ
Бүгін Өтеген батыр ауылында «Менің таңдауым – заң және қаржылық қауіпсіздік» атты форум өтті. Жастардың құқықтық және қаржылық сауаттылығын арттыруға бағытталған іс-шараға Іле ауданының әкімі Қайыржан Жақсымбетов қатысты.
Форумда жастар үшін бүгінгі таңда өзекті дропперлік, интернет-алаяқтық, құмар ойындарға тәуелділік, киберқауіпсіздік және қаржылық сауаттылық мәселелері көтерілді.
Қайыржан Жақсымбетов форум қатысушыларына сөз сөйлеп, цифрлық технологиялардың дамуымен бірге алаяқтықтың жаңа түрлері көбейіп келе жатқанына назар аударды. Оның айтуынша, мұндай жағдайда қаржылық сауаттылық пен цифрлық дағдылар адамның жеке қауіпсіздігінің маңызды бөлігіне айналып отыр.
— Біздің ортақ міндетіміз – заңды құрметтейтін, өз құқығы мен міндетін білетін, адал еңбекке ұмтылатын, қаржылық шешімдеріне жауап бере алатын саналы ұрпақ қалыптастыру, – деді Қайыржан Жақсымбетов.
Форум аясында экономикалық құқық бұзушылықтардың алдын алуға бағытталған жобалар көрмесі ұйымдастырылды. Сала мамандары жастарға дропперлікке тартылудан сақтану, банк карталарын қорғау, қаржылық және цифрлық қауіпсіздік, кибертұрақтылық мәселелері бойынша ақпарат берді.
Бағдарламада теориялық баяндамалармен қатар интерактивті форматтарға да орын берілді. Қатысушылар назарына алаяқтардың әрекет ету тәсілдерін көрсететін «Әже және «служба безопасности»» атты театрландырылған қойылым ұсынылды.
Сонымен қатар форум аясында жастар арасында тоғызқұмалақтан жарыс өтіп, жеңімпаздар марапатталды.
Іс-шара қоғам мен жастардың қауіпсіздігіне кері әсер ететін заңсыз әрекеттер мен зиянды әдеттерге қарсы символдық акциямен қорытындыланды.
