Тазалық – туған жерге деген тағзым «Таза Қазақстан» акциясы аясында сенбілік өтті

Туған жердің тазалығы – әр азаматтың елге деген құрметінен басталады. Адамның мәдениеті мен қоршаған ортаға деген көзқарасы оның күнделікті әрекетінен көрінеді. Көшенің көркі, ауылдың ажары, айналаның тазалығы – сол елде өмір сүріп жатқан жұрттың ортақ мәдениетінің айнасы. «Таза Қазақстан» республикалық экологиялық акциясы аясында ауданда кезекті жалпыхалықтық сенбілік өтіп, аудан көлемінде тазалық пен абаттандыру жұмыстары кеңінен жүргізілді. Игі бастамаға аудан әкімі Нұрбақыт Молдахметұлы, аудан әкімінің орынбасарлары, мекеме басшылары, мемлекеттік қызметкерлер, еріктілер және аудан тұрғындары белсене қатысып, туған өлкенің тазалығы мен көркеюіне өз үлестерін қосты. Ауданның көрікті орындарының бірі саналатын Жастар аллеясына да игілікті жұмыстар жүргізілді. Мұндағы орындықтар сырланып, аумақ ретке келтіріліп, санитарлық тазалау жұмыстары атқарылды. Көпшілік демалатын орындардың жинақы әрі таза болуы – тұрғындарға қолайлы орта қалыптастырудың маңызды бөлігі. Жаңарған орындықтар мен тазартылған аллеяның көрінісі айналаға ерекше сән беріп, қоғамдық орындардың тазалығына деген жауапкершілікті арттыра түсті. Сенбіліктің ауқымы да көңіл қуантады. Аудан бойынша өткен тазалық жұмыстарына 730-дан астам тұрғын қатысты. Бұл – туған жердің көркеюіне бейжай қарамайтын азаматтардың көп екенін көрсетеді. Бірі қолына күрек алса, бірі қоқыс жинап, енді бірі аумақты ретке келтіріп, абаттандыру жұмыстарына атсалысты. Мемлекеттік қызметкерлер мен мекеме ұжымдары, жастар мен еріктілер, аудан тұрғындары бір мақсат төңірегіне топтасты.
Мұндай шаралардың ең үлкен мәні де осында. Тазалық жұмысы барысында адамдар тек қоршаған ортаны ретке келтіріп қана қоймайды, сонымен бірге бір-біріне үлгі көрсетеді. Жастар үлкендерден еңбекке деген құрметті үйренсе, аға буын кейінгі ұрпақтың табиғатқа деген жанашырлығына куә болады.Туған жердің бір тал шөбін жұлып, бір түйір қоқысын жинаған әр адамның еңбегі сырт көзге елеусіз көрінуі мүмкін. Алайда осындай шағын әрекеттер біріге келе үлкен нәтижеге айналады.
Сенбілікке қатысқан аудан әкімі Нұрбақыт Молдахметұлы сөз сөйлеп, қоршаған ортаның тазалығы– өңірдің келбеті мен тұрғындардың мәдениетінің айқын көрсеткіші екенін атап өтті. Шынында да, тазалық – адамның ішкі мәдениетімен сабақтас ұғым. Таза көшеде жүріп, қоқысты белгіленген орынға тастау, қоғамдық орындарға ұқыпты қарау, табиғатты бүлдірмеу– қарапайым ғана талаптар болып көрінгенімен, оның ар жағында үлкен азаматтық жауапкершілік жатыр.
Аудан басшысы мұндай игі бастамалардың аудан көлемінде тұрақты түрде жалғасуы және әрбір тұрғынның туған жерге жанашырлықпен қарауы маңызды екенін жеткізді. Бұл– бүгінгі сенбіліктің ғана емес, жалпы қоғамның алдында тұрған маңызды міндеттердің бірі. Өйткені туған жердің тазалығы тек тазалық қызметкерлеріне немесе белгілі бір мекемелерге жүктелетін жұмыс емес. Ол – баршаға ортақ жауапкершілік.
«Таза Қазақстан» акциясының басты мақсаты – қоршаған ортаны таза ұстау ғана емес, қоғамда экологиялық мәдениетті қалыптастыру, азаматтардың туған жерге деген жауапкершілігін күшейту.
Осы тұрғыдан алғанда, ауданда ұйымдастырылған сенбіліктің тәрбиелік мәні де зор. Әсіресе жастардың, еріктілердің белсенділігі – келешек ұрпақтың қоршаған ортаға деген көзқарасының қалыптасып келе жатқанын көрсетеді.
Кеген – табиғаты көркем, тауы мен даласы астасқан, өзен-сулары мен жасыл алқаптары жарасқан қасиетті өлке. Мұндай табиғи байлықты сақтау – оны мекендеген әр азаматтың парызы.
Сенбілік барысында атқарылған жұмыстар ауданның тазалығын сақтауға ғана емес, елді мекендердің көркін арттыруға да бағытталды. Қоғамдық орындардың тазалануы, Жастар аллеясының абаттандырылуы, орындықтардың сырлануы – тұрғындарға жайлы орта қалыптастыруға жасалған нақты қадамдар.