Қара шатқал – халықаралық туризмнің жаңа тартылыс нүктесіне айналады
Қазақстан Республикасының Туризм және спорт вице- министрі Мирас Төлебаев Алматы облысына жұмыс сапары барысында аудандағы туристік әлеуеті жоғары нысандарды аралап, өңірде жүзеге асырылып жатқан инвестициялық жобалардың барысымен танысты. Сапар аясында Қара шатқалда бой көтеретін бірегей туристік кешеннің тұжырымдамасы таныстырылып, болашақта өңірдің туристік мүмкіндігін еселейтін маңызды бастамалар талқыланды.
Кеген өңірі – табиғаты таңғажайып, көркем ландшафтымен, саф ауасымен және ерекше географиялық ерекшелігімен еліміздің ең тартымды туристік бағыттарының бірі. Соңғы жылдары мемлекет тарапынан ішкі және халықаралық туризмді дамытуға ерекше көңіл бөлініп, өңірдің туристік әлеуетін тиімді пайдалану мақсатында ауқымды инвестициялық жобалар қолға алынуда. Жұмыс сапары барысында вице-министрге «ASK Capital» жауапкершілігі шектеулі серіктестігі жүзеге асырып жатқан Қара каньон маңындағы туристік аймақты дамыту жобасы таныстырылды. Ауқымды инвестициялық жоба табиғи ландшафтты сақтай отырып, заманауи туристік инфрақұрылым қалыптастыруды көздейді.
Жоба аясында Қазақстандағы ерекше туристік нысандардың біріне айналатын шыны аспалы көпір салу жоспарланған. Сонымен қатар ұзындығы 420 метрді құрайтын зиплайн, табиғат аясында демалуға арналған глэмпинг аймағы, шолу алаңдары, демалыс орындары мен келушілерге қызмет көрсететін заманауи инфрақұрылым нысандары бой көтермек. Жобаның жалпы инвестициялық құны 1,5 миллиард теңгені құрайды. Жоба толық іске қосылғаннан кейін туристік кешен жыл сайын 150 мыңға дейін туристі қабылдай алады деп күтілуде.
Бұл өз кезегінде өңірдің туристік тартымдылығын арттырып қана қоймай, жаңа жұмыс орындарының ашылуына, шағын және орта бизнестің дамуына, аудан экономикасының нығаюына тың серпін береді.
Сапар барысында тағы бір маңызды бастама– «Компания Строй Индустрия» ЖШС ұсынған Көлсай көлдері арасындағы аспалы жол салу жобасы таныстырылды. Бұл жоба Көлсайдың көркем табиғатын тамашалауға мүмкіндік беріп, екі көлді заманауи аспалы жол арқылы өзара байланыстыруды көздейді.
Мамандардың бағалауынша, аталған жоба жүзеге асқан жағдайда жыл сайын 500 мыңға дейін туристі қабылдауға мүмкіндік туып, еліміздің ең танымал туристік бағыттарының біріне айналмақ. Сонымен қатар жоба туристердің қауіпсіздігі мен қолайлылығын арттырып, өңірдің халықаралық туристік нарықтағы бәсекеге қабілеттілігін күшейтуге ықпал етеді. Вице-министр Мирас Төлебаев өңірдегі инвестициялық жобалардың туристік инфрақұрылымды дамытудағы маңызына тоқталып, мемлекеттік қолдау мен жеке инвестицияның үйлесуі Қазақстан туризмінің жаңа деңгейге көтерілуіне жол ашатынын атап өтті. Сондай-ақ барлық жобаларды жүзеге асыру барысында табиғи ортаны сақтау, экологиялық тепе-теңдікті бұзбау және тұрақты туризм қағидаттарын ұстанудың маңыздылығына ерекше назар аударды.
Бүгінде Кеген ауданы өзінің қайталанбас табиғатымен ғана емес, әлемдік деңгейдегі туристік жобаларды қабылдай алатын әлеуетімен де ерекшеленіп келеді. Қара шатқалдағы шыны аспалы көпір мен Көлсай көлдері арасындағы аспалы жол секілді бірегей жобалар жүзеге асқан жағдайда өңірдің туристік келбеті түбегейлі жаңарып, Кеген халықаралық деңгейдегі экотуризм мен белсенді демалыстың жаңа орталығына айналмақ. Бұл бастамалар – тек туристік инфрақұрылымды дамыту ғана емес, өңір экономикасын әртараптандыруға, халықтың әл-ауқатын арттыруға және Қазақстанның әлемдік туристік картадағы орнын нығайтуға бағытталған маңызды қадамдардың бірі. Қара шатқалдың көркем табиғаты мен заманауи инфрақұрылымның үйлесімі келешекте отандық және шетелдік саяхатшылар үшін жаңа тартымды бағыт қалыптастыратыны сөзсіз.
