Жаңа Конституция – ел дамуының берік негізі
1 шілде күні аудан әкімдігінің кіші мәжіліс залында Алматы облысының әкімі Марат Елеусізұлы Сұлтанғазиевтің төрағалығымен өткен актив отырысы бейнеконференция байланысы арқылы ұйымдастырылды. Жиында Жаңа Конституцияның қабылдануының маңызы мен Қазақстан Республикасы Құрылтайы сайлауын ұйымдастыру мәселелері жан-жақты қаралды.
Бейнеконференцияға ауданның қоғамдық-саяси өміріне белсенді араласып жүрген азаматтар, ардагерлер кеңесінің мүшелері, аналар кеңесінің өкілдері, қоғамдық кеңес төрағасы, аудандық мәслихат төрағасы мен депутаттар, құқық қорғау органдарының басшылары, аудан әкімінің орынбасарлары, ауылдық округ әкімдері, мекеме және бөлім басшылары қатысты.
Жиында облыс әкімі Мемлекет басшысы жүргізіп отырған саяси реформалардың өзегі – халық үніне құлақ асатын мемлекет қағидатын орнықтыру екенін атап өтті. Бұл бағытта Жаңа Конституцияның қабылдануы еліміздегі демократиялық өзгерістерге тың серпін беріп, мемлекеттік басқару жүйесін жетілдіруге, азаматтардың құқықтары мен бостандықтарын қорғауды күшейтуге жол ашқаны айтылды.
Сонымен қатар, Қазақстан Республикасы Құрылтайының ел бірлігі мен қоғамдық келісімді нығайтудағы орны ерекше екеніне тоқталып, алдағы сайлау науқанын заң талаптарына сай, ашық әрі әділ ұйымдастырудың маңыздылығы сөз болды. Сайлау үдерісінің жариялылығы мен заңдылығын қамтамасыз ету, қоғамның барлық институттарының белсенді қатысуы – басты міндеттердің бірі екені ерекше атап өтілді.
Актив отырысы барысында айтылған міндеттерді сапалы орындау– елдегі саяси тұрақтылықты сақтауға, заң үстемдігін нығайтуға және мемлекет пен қоғам арасындағы сенімді арттыруға бағытталған маңызды қадам екені атап өтілді.
Л. Қарасартова.
