23 маусым – Мемлекеттік қызметшілер күні мен Қазақстан полициясы күні
Құрмет көрсетілді
23 маусым – еліміз үшін маңызы зор қос мереке. Бұл күні Мемлекеттік қызметшілер күні мен Қазақстан полициясы күні қатар аталып өтеді. Аталған мерекелер – ел дамуы мен қоғам тыныштығы жолында аянбай еңбек етіп жүрген азаматтарға көрсетілген зор құрметтің белгісі. Осыған орай салтанатты жиын ұйымдастырылып, мемлекеттік қызмет пен құқық қорғау саласының үздік өкілдеріне құрмет көрсетілді.
Ел мүддесін бәрінен биік қойып, халық игілігі жолында адал қызмет атқарып жүрген азаматтардың еңбегі ерекше бағаланды. Мерекелік шараға аудан әкімі Нұрбақыт Молдахметұлы қатысып, мемлекеттік қызметшілер мен полиция қызметкерлерін кәсіби мерекелерімен құттықтады. Өз сөзінде аудан басшысы мемлекеттік қызмет пен құқық қорғау саласының қоғамдағы орны мен маңызына тоқталып, елдің тұрақтылығы мен өркендеуіне қосып отырған үлестерін жоғары бағалады.
“Мемлекеттік қызметші – халық пен биліктің арасындағы алтын көпір. Ал полиция қызметкері – қоғамдық тәртіп пен ел қауіпсіздігінің сақшысы. Екі саланың да басты мақсаты – халыққа қалтқысыз қызмет ету, азаматтардың құқықтары мен заңды мүдделерін қорғау,”– деді аудан әкімі. Салтанатты жиын барысында бірқатар қызметкерлерге Алматы облысы әкімінің Құрмет грамоталары мен Алғыс хаттары, Қазақстан Республикасы Мемлекеттік қызмет істері агенттігінің Алматы облысы бойынша департаментінің Алғыстары, сондай-ақ аудан әкімінің Құрмет грамоталары мен Алғыс хаттары табысталды.
Марапат – тек еңбектің өтеуі ғана емес, жауапкершілікті еселей түсетін сенім. Сондықтан да марапатқа ие болған азаматтардың әрқайсысы өз саласында кәсіби біліктілігімен, адалдығымен және еңбекқорлығымен танылған жандар. Жиын барысында Кеген аудандық полиция бөлімінің қызметкерлері мен сала ардагерлері де назардан тыс қалмады. Қоғамдық қауіпсіздікті қамтамасыз ету, құқық бұзушылықтың алдын алу, тұрғындардың тыныштығын сақтау жолындағы қажырлы еңбектері үшін олар түрлі деңгейдегі марапаттарға ие болды. Полиция қызметі – тәулікпен санаспайтын жауапты мамандық. Қоғам тыныштығы үшін күн-түн демей қызмет атқаратын тәртіп сақшыларының еңбегі әрдайым құрметке лайық. Олар азаматтардың қауіпсіздігін қамтамасыз етіп қана қоймай, заң үстемдігін нығайтуға, әділетті қоғам қалыптастыруға да өлшеусіз үлес қосып келеді. Салтанатты шараның мазмұнын байыта түскен тағы бір тағылымды сәт – ардагерлердің ақ батасы мен өнегелі сөздері болды. Мемлекеттік қызмет пен құқық қорғау саласында ұзақ жылдар еңбек еткен ардагерлер жас мамандарға ақжарма тілектерін айтып, қызмет жолында адалдық пен әділдікті ту етуге шақырды. Шын мәнінде, мемлекеттік қызмет – халыққа қызмет етудің ең биік үлгісі. Бұл салада еңбек ететін әрбір маманның басты міндеті – азаматтардың өтінішіне құлақ асып, мемлекет пен қоғам арасындағы сенімді нығайту. Ал полиция қызметі – ел тыныштығының, қоғамдық қауіпсіздік пен құқықтық тәртіптің берік кепілі.
Президент Қасым- Жомарт Тоқаев өз Жолдауларында заң мен тәртіп қағидатының қоғам өміріндегі маңызын үнемі атап келеді. Заң үстемдігі орныққан жерде ғана әділетті қоғам қалыптасып, елдің болашағы баянды болмақ. Сондықтан мемлекеттік қызметшілер мен полиция қызметкерлерінің еңбегі – мемлекет тұрақтылығының негізгі тіректерінің бірі. Мерекелік шара осы игі қағидалардың жарқын көрінісіне айналды. Ел игілігі үшін еңбек етіп жүрген азаматтарға құрмет көрсету – олардың еңбегін бағалау ғана емес, жас буынға үлгі көрсету, адал қызметтің мәртебесін арттыру.
Халыққа қалтқысыз қызмет ету– үлкен жауапкершілік пен биік парасатты талап етеді. Осындай жауапты міндетті абыроймен атқарып жүрген мемлекеттік қызметшілер мен құқық қорғау саласының өкілдері қай кезде де ел құрметіне лайық. Олардың адал еңбегі мен кәсібилігі мемлекетіміздің дамуына, қоғамымыздың тыныштығы мен тұрақтылығына қызмет ете бермек.
Лаура Қарасартова.
